كۇمىس دەگەن كارينا قولانى قاناعات تۇتتى

برازيليانىڭ ريو-دە جانەيرو قالاسىندا ءوتىپ جاتقان جازعى وليمپيادا ويىندارىندا اۋىر اتلەتيكادان 63 كەلىگە دەيىنگى سالماقتا ونەر كورسەتكەن قازاقستاندىق كارينا گوريچەۆا قولا جۇلدەگەر اتاندى. 

63 كەلى سالماقتا سىنعا تۇسكەن جەرلەسىمىز جۇلقا كوتەرۋدە 111 كەلى كوتەرىپ ەكىنشى ورىننان كورىندى. الايدا سەرپە كوتەرۋدە 132 كەلىدەن ءارى اسا الماي، ءۇشىنشى ورىنعا تۇراقتادى. وسىلايشا، 243 كەلىمەن جۇلدەلى ءۇشىنشى ورىنعا يە بولدى.

بۇل سالماقتا ءبىرىنشى ورىن قىتايلىق دەن ۆەيدىڭ ەنشىسىنە بۇيىرسا، كۇمىس جۇلدەنى سولتۇستىك كورەيا سپورتشىسى چحۆە حيو سيم ەنشىلەدى.

جارىس الدىندا جۋرناليستەرگە سۇحبات بەرگەن قۇرامانىڭ باس باپكەرى الەكسەي گەنناديەۆيچ ني كارينانىڭ دايىندىعى جوعارى ەكەندىگىن ايتقان ەدى.

"كارينانىڭ ريوعا كەلەردەگى دايىندىعى وتە جوعارى. ول قازىر ءدال بابىندا تۇر. ەگەر ءوزىنىڭ تولقۋىن تىيىپ، ەسىن جينايتىن بولسا، كارينا قازاقستانعا مەدەل سىيلايدى. ءبىزدىڭ جوسپار بويىنشا كارينا بۇگىن كۇمىس الۋى كەرەك",-دەپتى ني مىرزا.

جازيرا التىن الۋعا مىندەتتى

ال بۇگىن استانا ۋاقىتىمەن ساعات 00:30-دا قازاقستاندىق اۋىراتلەتتەر جازيرا جاپارقۇل مەن نيدجات راقىموۆ سىنعا تۇسەدى.

باق-قا سۇحبات بەرگەن باس باپكەر ني: "جازيرا جاپپارقۇل – قازاقستان اۋىر اتلەتيكا مەكتەبىنىڭ تۇلەگى. ونىڭ الەم چەمپيوناتىنداعى كۇمىس جۇلدەسىن وليمپيادادا التىنعا اۋىستىرۋعا مۇمكىندىگى بار",-دەپ بولجام جاساعان.

جازيرانىڭ جەتىستىكتەرى:

1. اۋىراتلەتتەردىڭ اراسىندا تۇڭعىش جۇلدەگەر جازيرا جاپپارقۇل العاشقى حالىقارالىق جۇلدەسىن (التىن مەدال) 2010 جىلى سينگاپۋردە وتكەن جاسوپىرىمدەر اراسىنداعى جازعى وليمپيادادا الدى.

2. 2012 جىلى گۆاتەمالادا وتكەن جاسوسپىرىمدەر اراسىنداعى الەم بىرىنشىلىگىندە دە چەمپيون اتاندى.

3. 2013 جىلى ميانماداعى جاستار اراسىنداعى ازيا چەمپيوناتىندا جازيرا جيىنى (شتانگانى جۇلقا جانە سەرپە كوتەرۋ – رەد.) 232 كيلوگرامم كوتەرىپ، كۇمىس مەدال الىپ قالدى. 

4.2014 جىلى الماتىداعى الەم چەمپيوناتىندا، 69 كيلوگرامم سالماق دارەجەسى بويىنشا سولتۇستىككورەيالىق اتلەتتەن (265 كيلوگرامم ناتيجەمەن – رەد.) ءۇش كيلوگرامم عانا از كوتەرىپ (263 كگ),  كۇمىس مەدالدى قاناعات تۇتتى.

حالىقارالىق اۋىر اتلەتيكا فەدەراتسياسى (IWF) سايتى جازيرا جاپپارقۇلدى «اۋىر اتلەتيكادان الەم چەمپيوناتىندا جۇلدە العان العاشقى قازاق قىزى» دەپ جازدى.

ال بۇگىن جارىسقا شىعاتىن تاعى ءبىر اتلەت  نيدجات راقىموۆ تا جۇلدەدەن ءۇمىتتى سپورتشىلارىمىزدىڭ ءبىرى. باس باپكەر الەكسەي ني، «بۇگىن بىزدەن مەدال كۇتىڭىزدەر. بۇگىن ءبىر التىن، ءبىر كۇمىس الامىز»،-دەگەن ەدى. ەندەشە قازاقستاندىق سپورتشىلار باپكەر ءنيدىڭ ەمەس، بۇكىل قازاقستاننىڭ ۇمىتتەرىن اقتايدى دەپ سەنەمىز.

نۇرزات توعجان

اباي اقپارات