كۇردەلى جوندەۋ جۇمىستارى جۇرگىزىلگەن قالا اكىمدىگىنىڭ ەسكى عيماراتى قايتا پايدالانۋعا بەرىلدى. بۇل تۋرالى شىمكەنت قالالىق اكىمىنىڭ رەسمي سايتى جازادى.

ەندىگى جەردە وندا قالا اكىمدىگىنىڭ ءۇش قۇرىلىمدىق ءبولىمى، اتاپ ايتقاندا، ءبىلىم ءبولىمى، جولاۋشىلار كولىگى جانە اۆتوموبيل جولدارى ءبولىمى جانە تۇرعىن ءۇي-كوممۋنالدىق شارۋاشىلىق ءبولىمى، سونىمەن قاتار، ءال-فارابي اۋدانى اكىمدىگى ورنالاساتىن بولادى. كۇنى بۇگىنگە دەيىن اتالعان بولىمدەر قالانىڭ ءار اۋماعىندا عيماراتتاردى جالعا الىپ كەلگەن ەدى.

 – عيماراتتىڭ كۇردەلى جوندەۋ جۇمىستارى تولىعىمەن اياقتالدى، – دەيدى شىمكەنت قالاسى اكىمى اپپاراتىنىڭ جەتەكشىسى راشيد ايۋپوۆ. – الداعى ۋاقىتتا عيماراتتا قالا اكىمدىگىنىڭ بىرنەشە قۇرىلىمدىق ءبولىمىن ورنالاستىرۋدى جوسپارلاپ وتىرمىز. بۇعان دەيىن ءجيى ورىن اۋىستىرىپ كەلگەن ءبولىم قىزمەتكەرلەرىمەن بايلانىسۋ اسىرەسە، قالا تۇرعىندارىنا ايتارلىقتاي قيىندىق تۋىنداتقانى راس. ءوز كەزەگىندە، بىرقاتار قۇرىلىمدىق بولىمدەردى قالا مەنشىگىندەگى عيماراتقا ورنالاستىرۋ ارقىلى بيۋدجەت قارجىسىن ۇنەمدەۋگە دە مۇمكىندىك بار.

ايتا كەتەيىك، ەڭبەكشى جانە اباي اۋدانى اكىمدىكتەرىن دە اتالعان ورىنعا كوشىرۋ ماسەلەسى الداعى ۋاقىتتا ناقتى شەشىلەتىن بولادى. بۇعان دەيىن قالا اكىمدىگى اتالعان اۋدان اكىمدىكتەرى ءۇشىن جاڭا بىرىڭعاي ۇلگىدەگى عيماراتتاردىڭ قۇرىلىسىن جۇرگىزۋدى جوسپارعا ەنگىزگەن دە بولاتىن. 

Abai.kz