(ك.ءماسىموۆ پەن ب.بوقاۋوۆ)

قازاقستان ۇكىمەتىنىڭ باسشىسى كارىم ءماسىموۆ جاقىندا ءىس-ساپارمەن پاۆلودار وبلىسىندا بولدى. پاۆلودارلىق كاسىپكەرلەرمەن كەزدەسۋ بارىسىندا پرەمەر-مينيستر كارىم قاجىمقانۇلى قر ءبىلىم جانە عىلىم ءمينيسترىن مىسال ەتىپ، ونىڭ بالمۇزداق ساتىپ ءجۇرىپ، مينيستر دارەجەسىنە دەيىن كوتەرىلگەنىن ايتتى،-دەپ جازادى «ratel.kz» پورتالى.

پاۆلودار وبلىسىنا جاساعان ساپارى بارىسىندا  پرەمەر-مينيستر جەلەزين اۋدانىندا ورنالاسقان «پاحار» شارۋا قوجالىعىندا بولىپ، ونان سوڭ «نۇرلى جول» باعدارلاماسى اياسىندا سالىنىپ جاتقان «ەرتىس» كوپىرىنىڭ قۇرىلىسىمەن تانىسقان.  اتالعان كوپەردىڭ قۇرىلىسى اياقتالۋعا جاقىن قالعانىمەن، قۇرىلىس ءالى اياقتالماعان. دەسە دە بيىلعى جىلدىڭ جەلتوقسان ايىندا پايدالانۋعا بەرىلەدى دەپ جوسپارلانىپ وتىرعان كورىنەدى. مەملەكەتتىك باعدارلاما بويىنشا، «ورتالىق - شىعىس» جوباسىنا  بيۋدجەتتەن 50 ميلليارد تەڭگە ءبولىنىپتى. ال كوپىردىڭ ۇزىندىعى 12,6 شاقىرىمدى قۇرايدى ەكەن.

ادەتكى ستسەناري بويىنشا رەسمي كەزدەسۋلەر اياقتالعان سوڭ، ۇكىمەت باسشىسى تىكۇشاقپەن قۇرىلىس الاڭىنا كەلىپ، قۇرىلىسشىلارمەن كەزدەسكەن ەدى. مۇندا دا ءماسىموۆ مىرزانى ءماز بولىپ قارسى العان قاۋىم وعان ماداق سوزدەر ايتىپ تاۋسىلدى.  

ءوڭىر باسشىسى بولات بوقاۋوۆتىڭ ارنايى دايىنداعان پرەزەنتاتسياسى اينالاسى 15 مينۋتتا تامىمدالعان سوڭ، ۇكىمەت باسشىسى اسىعىس-ۇسىگىس كولىگىنە وتىرىپ،  پاۆلودار وبلىسىنىڭ ورتالىعىنا اتتاندى. ايتپاقشى، پرەمەر-مينيستر جەلتوقساندا اشىلۋى كەرەك دەپ جوسپارلانعان كوپىردى قر تاۋەلسىزدىگىنىڭ 25-جىلدىعىنا وراي اتاۋدى ۇسىنعان.

(ۇكىمەت باسشىسى جۇمىسشىنىڭ قولىن قىسىپ تۇرعان ءساتى)

«بۇل كوپىردى قازاقستان تاۋەلسىزدىگىنىڭ 25-جىلدىعىنا وراي اتاۋىمىزعا بولادى. پرەزيدەنتكە وسىنداي ۇسىنىس جاساۋ كەرەك»،-دەدى ۇكىمەت باسشىسى.

وسىدان كەيىن رەسمي جيىن وبلىس ورتالىعىندا جالعاستى. وندا پرەمەر-ءمينيستردى بەلسەندى ستۋدەنتتەر مەن ۇستازدار، دارىگەرلەر مەن الەۋمەتتىك سالا قىزمەتكەرلەرى توسىپ تۇرعان.

ادەتتەگىدەي جينالعان توپ ۇكىمەت باسشىسىنا العىستارىن ايتىپ، ءوڭىردىڭ تىنىس-تىرشىلىگى كۇن ساناپ جاقسارىپ كەلە جاتقانىن جەتكىزگەن.

دەسە دە، جيىنعا كەلگەن «جاسىل ەل» وتريادىنىڭ ەرىكتىلەرى جىل سايىن جالاقىلارىنىڭ كەشەۋىلدەپ كەلەتىنىن، كەيدە، ءتىپتى، بيۋدجەتتەن ءبىر تيىن دا بولىنبەي قالاتىنىن ايتىپ شاعىمدانعان.

ودان ءارى ءوڭىر باسشىسى پرەمەر-مينيسترگە العىسىن ايتىپ، وڭىردەگى قىمىزدان جاسالاتىن بالمۇزدىققا سۇرانىستىڭ ارتىپ جاتقانىن ايتقان.

مۇنداي «پيار جۇرىستەردىڭ» ناق شەبەرىنە اينالىپ ۇلگەرگەن پرەمەر-مينيستر ءازىل-شىنى ارالاس، بالمۇزداقتان ءدام تاتۋ كەرەكتىگىن ايتقان.

«وندا ءدامىن تاتىپ كورۋ كەرەك!»،-دەگەن ۇكىمەت باسشىسى جاس كاسىپكەرلەرگە قر ءبىلىم جانە عىلىم ءمينيسترى ەرلان ساعاديەۆتى مىسال ەتكەن.

«ستارتاپشى ساعاديەۆ تە كەزىندە بالمۇزداق ساتۋدان باستاعان. قازىر قاراشى، مينيستر بولدى»،-دەدى كارىم ءماسىموۆ.

ول ول ما، ەڭ قىزىعى  ءوڭىر جاستارىنىڭ اتىنان ءسوز العان ستۋدەنت قىز پرەمەر-مينيسترگە ءۇش تىلدە بايانداما جاساپ، ءوڭىر جاستارىنىڭ ەكسپو-2017 كورمەسىنە ەرىكتى رەتىندە قىزمەت ەتۋگە دايىن ەكەنىن جەتكىزدى.

(قر ءبىلىم جانە عىلىم ءمينيسترى ە.ساعاديەۆ)

ء«سىز ساعاديەۆتى تانيسىز با؟»،-دەگەن پرەمەر-مينيستر ءۇش تىلدە بايانداما جاساعان بويجەتكەنگە قاراپ. سودان سوڭ ءبىلىم جانە عىلىم ءمينيسترى ساعاديەۆكە بۇرىلىپ: «سەن دە وعان ءۇش تىلدە جاۋاپ بەرسەڭشى»،-دەپ ازىلدەگەن.

پرەمەردىڭ ءازىلى اۋىر ءتيدى مە، الدە ونى كەكەسىن رەتىندە قابىلدادى ما، ساعاديەۆ مىرزا سەلت ەتكەن جوق. «بىزدە ءارى كورىكتى، ءارى ساۋاتتى ەرىكتىلەر جەتەرلىك. پاۆلودار وبلىسىنا راقمەت»،-دەپ قايىردى ءسوزىن مينيستر. ودان ءارى جيىن ءداستۇرلى ستسەناري بويىنشا جالعاستى.

نۇرزات توعجان

Abai.kz