وقو-دا قر ءماجىلىس دەپۋتاتتارى تاسساي يندۋستريالىق ايماعىنىڭ جۇمىسىمەن تانىستى.

ەلىمىزدىڭ وڭتۇستىك وڭىرىندەگى يندۋستريالىق ايماقتاردىڭ ءبىرى - تاسساي يندۋستريالىق ايماعىنىڭ تىنىس-تىرشىلىگىمەن ءبىر توپ قر ءماجىلىس دەپۋتاتى تانىسىپ قايتتى، دەپ حابارلايدى «Abai.kz»  پورتالى Bnews.kz سايتىنا سىلتەمە جاساي وتىرىپ. 

قر ءماجىلىس دەپۋتاتتارى بەرىك وسپانوۆ، ۋاليحان قاينازاروۆ، ەرجان قۇدايبەرگەن جانە تاعى باسقا دەپۋتاتتار يندۋستريالىق ايماقتا ىسكە اسىرىلىپ جاتقان «مەگا سمارت» جشس-نىڭ جىلتىر مدف پليتالارىن وندىرەتىن زاۋىتىنىڭ قۇرىلىس بارىسىمەن تانىستى، دەپ ءمالىم ەتتى وڭتۇستىك قازاقستان وبلىسى اكىمدىگىنىڭ ءباسپاسوز قىزمەتى.

جالپى، يندۋستريالىق ايماق قۇرىلىسىنا ۇلتتىق قوردان 1,0 ملرد تەڭگە ءبولىنىپ، بيىلعى جىلدىڭ سوڭىنا دەيىن اياقتاۋ جوسپارلانعان. بۇل ايماقتا جالپى قۇنى 18,7 ملرد تەڭگەگە 18 جوبا ىسكە اسىپ، 1500-گە جۋىق جاڭا جۇمىس ورنى اشىلۋدا. ياعني، بيۋدجەتتىك 1 تەڭگەگە 18,7 تەڭگە جەكە ينۆەستيتسيا تارتىلماق. سونداي-اق، مۇندا جىل سوڭىنا دەيىن 5 جوبانىڭ ىسكە قوسىلۋى كۇتىلۋدە. وندا 200-دەن استام جۇمىس ورنى اشىلاتىن بولادى. ايماققا ينۆەستيتسيا تارتۋ بويىنشا جۇمىستار جالعاسۋدا.

اباي اقپارات