بۇگىن اۋدان اكىمى ا. مامىتبەكوۆ تورتكۇل اۋىل وكرۋگىنە جۇمىس ساپارىمەن باردى. ماقسات - كۇرمەۋلى ماسەلەلەردى كورىپ، ونىڭ شەشىلۋ جولدارىن قاراستىرۋ. الدىمەن شارۋالاردىڭ جاعدايىمەن تانىسىپ، ماقتا القاپتارىن ارالادى. ى.بەردەش 4 گەكتارعا اق التىننىڭ «تۇكسىز 47-27» جانە «ليديا» سۇرىپتارىن ورنالاستىرعان. اۋداننىڭ قۇرمەتتى ازاماتى، ەڭبەك ارداگەرى ا.تولىقبەك ماقتا ەگۋدەگى يننوۆاتسيا جايىن ءسوز ەتە كەلە، دۇرىس باپتالعاندا عانا ءونىم مول بولاتىنىن ايتتى. بيىلعى جاۋىن-شاشىننىڭ مول ءتۇسۋى ماقتا ەككەن ديحاندارعا قولايلى بولعان. ولار: «ەسەسىنە، ءونىمىمىز بيىل كوپ تۇسەدى»، - دەپ ءۇمىتىن ۇكىلەۋدە.

قىزىلجار اۋىلىنداعى دەمەۋشىلەر ەسەبىنەن بوي كوتەرگەن سپورتزالدىڭ بۇگىنگى احۋالىن كوردى. اۋىل تۇرعىندارى جاسوسپىرىمدەردى باۋلۋ ماقساتىندا ارنايى سپورت سەكتسيالارىن اشۋ جونىندە ۇسىنىس ايتىپ، كومەك سۇرادى. 

سونىمەن قاتار، تازا اۋىز سۋ جۇيەسىندە دە تۇيتكىلدى تۇيىندەر بار ەكەن. اۋىلدىق ارداگەرلەر كەڭەسىنىڭ توراعاسى ج.شالتايۇلى تورتكۇلدىڭ جوعارعى اۋماعىندا قولدانىلمايتىن ۇڭعىما بارىن، ەگەر ول ىسكە قوسىلسا تازا اۋىز سۋمەن قامتىلاتىندار قاتارى ارتاتىنىن اتاپ ءوتتى. اۋدان باسشىسى اۋىل اكىمىنە اتالعان ءجايتتى ەسكەرىپ، ۇڭعىماعا قاتىستى جسق ازىرلەۋدى تاپسىردى. قولدانىستاعى ۇڭعىمانىڭ اينالاسىن رەتتەۋگە، كوگالداندىرۋعا 1 اي مەرزىم بەردى. سونىمەن قاتار، قاراۋىلدىق شتات اشۋدى قاراستىرۋ قاجەتتىگىن ەسكەرتتى. 

دەمەۋشىلەر ەسەبىنەن جاسالعان تاعى ءبىر نىسان - تورتكۇل اۋىلىنداعى جاستار اللەياسى. اۋىلدىڭ 1989 جىلى تۋىلعان ازاماتتارى مەكتەپ بىتىرگەندەرىنە 10 جىل تولۋىنا وراي تۋعان جەرىنە وسىنداي توسىن سىي جاساعان. قۇپتارلىق ءىس. ەندىگى ماسەلە، وسى اللەياعا سۋ جۇيەسىن تارتۋ. سۋ تارتىلسا وسىندا ەگىلگەن اعاشتار مەن گۇلدەر اللەيانىڭ عانا ەمەس، اۋىلدىڭ اجارىن اشقالى تۇر. 

جۇمىس ساپارىنىڭ سوڭىندا الماسبەك كەڭەسبەكۇلى اۋىل تۇرعىندارىمەن كەزدەسىپ، اۋىل وكرۋگى اكىمى وتەمىس مۇحتارحاننىڭ 6 ايدا اتقارىلعان جۇمىستار جونىندە ەسەبىن تىڭدادى. 

14 مىڭنان استام تۇرعىنى بار اۋىل وكرۋگىندە شارۋاشىلىق جاقسى دامىعان. 10 331 گەكتار سۋارمالى جەر ەل يگىلىگىندە. ديحانشىلىقپەن قاتار مال شارۋاشىلىعىنىڭ دا قىر-سىرىن مەڭگەرگەن تورتكۇلدىكتەر 8780 ءىرى قارا، 800 جىلقى، 308 تۇيە، 33 005 ۋاق مال باعىپ وتىرعان جايى بار. 

ايتسە دە، تۇرعىنداردى تولعاندىرعان ماسەلە دە جەتەرلىك. سىپاتاەۆ اۋىلىنىڭ ازاماتتارى تازا اۋىز سۋ جۇيەسىنىڭ ەرتەرەك تارتىلۋىن سۇرانسا، كوكارالدىقتار باتىس ەۋروپا-باتىس قىتاي حالىقارالىق ءدالىزىنىڭ ماڭىنان جاناما جول جۇرگىزىپ بەرۋدى ءوتىندى. اعىن سۋعا قاتىستى كوتەرىلگەن ماسەلەلەر دە ارنالاردىڭ جۇمىسىن رەتتەۋ ارقىلى شەشىلەتىن بولدى.

وتەمىس مۇحتارحاننان كەيىن ءسوز العان اۋىلدىڭ ۋچاسكەلىك پوليتسەيى ابزال مىڭباەۆ تورتكۇل اۋماعىنداعى قىلمىس جايىن سارالادى. 

اۋدان اكىمى الماسبەك كەڭەسبەكۇلى كەزدەسۋ بارىسىندا تۇرعىندار تاراپىنان تۇسكەن ۇسىنىس-تىلەكتەردىڭ مىندەتتى تۇردە نازارعا الىناتىنىن، زاڭ اياسىندا جۇمىس جۇرگىزىلەتىنىن مالىمدەدى. سونىمەن قاتار، اۋىل اكىمىنە جەرگىلىكتى تۇرعىنداردى ارىز-شاعىمدارىمەن تۇراقتى قابىلداپ وتىرۋدى، ولاردى اتقارىلعان جۇمىستارمەن تانىستىرىپ وتىرۋدى تاپسىردى.

Abai.kz