- بۇدان بىلاي ءبىزدى گازەت-جۋرنالعا كۇشتەپ جازدىرمايتىن بولىپتى.

بۇل مەن الدەبىر شارۋامەن كەلىپ ءشاي ءىشىپ وتىرعان ءۇيدىڭ حوزيايكاسى. جاسى شامامەن 35-تەردەگى كوزىلدىرىكتى ارىق قارا كەلىنشەك، مەكتەپتە مۇعالىم ەكەن. 

- راس پا، ونى قايدان ءبىلدىڭىز؟

- ۆاتساپپەن كەلدى.

- ءا-ءا. جالپى ءار مۇعالىم مۇنشا سوماعا جازىلسىن دەگەن تالاپ بار ما؟

- جوق، ونداي جوق. بىرلەستىك دەگەن بولادى، سونىڭ جەتەكشىسى 30-40 مىڭنىڭ گازەتىنە جازىلادى دا مۇعالىمدەرگە بولە سالادى. اۋىلدىڭ مۇعالىمدەرىن 9-10 مىڭ تەڭگەگە جازعىزادى عوي. بىزگە 2-3 مىڭ عانا شىعادى. ويتكەنى ءبىز 6 ايعا عانا جازىلامىز.

- قانداي گازەتتەر مىسالى؟

- وي "كاراۆانعا" دەيىن جازىلامىز!

- قويىڭىزشى... 

- وتىرىك ايتىپ وتىر دەيسىز بە؟ ونشاقتى "كاراۆان" الامىز. ورىسشا گازەتتەردەن "ليتەر" دەگەن دە بار، بىراق جازىلعانىمىز بولماسا ونى ءوز باسىم كورگەن ەمەسپىز (ورىس مەكتەپتەرىن "ايقىنعا" جازدىرا ما ەكەن دەپ ويلاپ وتىرمىن ىشتەي). 

- مىناۋ قايسىسى؟ ورىسشا ەكەن، "ليتەر" وسى ەمەس پە؟

كەلىنشەك ءاسۇيدىڭ تەرەزەسىنە ۇستاپ قويعان گازەتكە ءبىراز قاراپ كوزى جەتپەگەن سوڭ جانىنا باردى.

سوسىن:

- جوق، بۇل "كازپراۆدا", - دەدى. 

- ممم.

تارەلكاداعى قيار مەن پوميدوردىڭ سالاتىن تاۋىسۋعا اينالعانىمدى كوردى دە، تاعى دا جۋىپ اكەپ تۋراي باستادى. اڭگىمەسىن ايتىپ جاتىر.

- 12 جىلدىقتى ەنگىزگەننەن بولۋ كەرەك، بيىل ساعات ازايدى، بىراق جازاتىن قاعازىمىز كوبەيدى. جۋرناليست ەكەنسىز، وسى تۋرالى جازساڭىزدارشى.

- جۋرناليست بولعاندا مەن نەگىزى جۋرناليست تە ەمەسپىن. فەيسبۋككە جازباسام..، - مىڭقىلداي باستاپ ەدىم ول ءسوزىن جالعاستىرا بەردى.

- مۇعالىمنىڭ ستاتۋسى دەگەن جوق. قيت ەتسە، ءبىزدى كرايني قىلىپ شىعارادى. دەنە ساباعىندا ويناپ جۇرگەن قىز جىعىلىپ كولگوتكيىن جىرتىپ السا دا اتا-اناسى ونى بىزگە تولەتىپ الادى. قايتەسىڭ ەندى، مۇعالىم بالانى ۇردى-سوقتى دەگەن ۆيدەولارمەن ابدەن قورقىتىپ تاستاسا. 

باسىمدى شايقاپ قويىپ تىڭداۋدامىن، ايتىپ وتىرعاندارىنىڭ راس ەكەنىنە كۇمانىم دە جوق. اتا-انادان اقشا جيناۋ تۋرالى سۇراۋعا ىڭعايسىزدانا باستاپ ەدىم، ونى ءوزى ايتىپ كەتتى.

- ءبىر جاقسىسى، اقشا جيناۋدى قويدىق ايتەۋىر. قازىر جىل سوڭىندا بىردەڭە بەرىپ جاتسا الامىز، بەرمەسە رەنجىمەيمىز.

- ول الماتىعا جاڭا اكىم كەلگەلى بولعان جاقسىلىق پا، قالاي؟

- جوق، ودان ەمەس بولۋ كەرەك. ءبىزدىڭ ديرەكتور ءوزى كرىشاسى دا جوق، قورقاقتاۋ ادام. بىراق اتا-انادان جيناماعانمەن، بىزدەن جينايدى.

- نەگە؟

- تەكسەرۋلەر كەلەدى، كوبىنە سەس-تەن كەلەدى. اناۋىڭ دۇرىس ەمەس، مىناۋىڭ دۇرىس ىستەمەيدى، شتراف سالامىز دەيدى. سونى سالعىزباۋ ءۇشىن جيناپ بەرەمىز. وقۋشىلاردىڭ باسىنان سىركە شىقسا دا جينايمىز.

وسى كەزدە كۇيەۋى سوزگە ارالاستى.

- اناۋ الگى تەلەكانالدى ايتسايشى.

بىراق كەلىنشەك ول جايلى ۇندەي قويمادى. 

- نە جاعداي ول؟

- بىردە مەكتەپتىڭ ۇستىندەگى تۋ كىرلەپ قالىپتى. سونى قالاي ءبىلىپ قويعانىن، ءبىر تەلەكانالدىڭ جۋرناليستەرى جەتىپ كەلىپ ءتۇسىرىپ الىپتى. سولاردى اكە-كوكەلەپ قالتالارىنا ءبىر قالىڭ كونۆەرت سالىپ بەرىپ ارەڭ قۇتىلعانبىز. جاعامدى ۇستادىم، باسقا-باسقا جۋرناليستەردەن ونداي شىعادى دەپ تەگى ويلاماپپىن". 

ءوز وبالىڭ وزىڭە. جۋرناليست ەدىم دەپ نەڭ بار ەدى؟ سىباعاڭدى الىپ بولساڭ ءجونىڭدى تابا عوي ەندى.

ەرجان ءابدىرامان

Facebook-تەگى پاراقشاسىنان