فوتو: tengrinews.kz

قاراپايىم قيسىنعا سالساق، مەملەكەت پەن قوعامنىڭ تۇراقتىلىعى، قاۋىپسىزدىگى تۇرعىسىنان قاراعاندا، بيلىك اقتوبە مەن الماتىدا بولعان وقيعالاردان سوڭ جەدەل تۇردە سالافيزيم اعىمىنا زاڭمەن تىيىم سالۋى كەرەك ەدى. بىراق، تىيىم بولمادى. الماتىداعى جالعىز ادامنىڭ سالعان لاڭىنان، قىرعىنان كەيىن ساراپشىلار «بيلىك اقتوبەدەگى وقيعادان ساباق المادى» دەدى. بۇل ءسوزدىڭ استارىندا تەررورلىق ارەكەت دەپ باعالانعان اقتوبە وقيعاسىنان كەيىن-اق بيلىك سالافيزمگە تىيىم سالادى ءارى ونى دەرەۋ ىسكە اسىرادى دەگەن ساراپشىلار قاۋىمىنىڭ ءۇمىتى بولعانى بايقالادى. الايدا، بيلىك ەكى بىردەي قاندs وقيعانىڭ بولعانىنا قاراماستان تەرىس اعىمعا تىيىم سالۋعا اسىعار ەمەس. نەگە اسىقپايدى؟ قاشان تىيىم سالادى؟ بۇل ساۋالداردىڭ جاۋابىن قوعام ءۇنسىز كۇتىپ وتىر. تىم-تىرىس دەۋگە دە بولماس، سالافيزمگە توقتاۋ سالۋ قاجەتتىگى ايتىلىپ تا جاتىر.

ماسەلەن، ءدىنتانۋشى دوساي كەنجەتاي (سۋرەتتە) ءوزىنىڭ facebook الەۋەمتتىك جەلىسىندەگى جەكە پاراقشاسىندا بىلاي دەپ جازادى: «بيلىك ەندى سالافيتتەردى توقتاتۋعا ءماجبۇر. سالافيتتىك قۇبىلىس قازاقتىڭ ويانۋىنا جىلدامدىق الىپ كەلدى. بۇدان ءارى بيلىك كەشىكسە، كوررۋپتسيا جايلاعان ەلدەگى بۇلىكتىڭ اۆتورلارى دا وسى سالافيلەر بولادى. ونىڭ ارتى نە بولارىن كەسىپ پىشە المايدى. سوندىقتان ولاردىڭ بەلسەندىلىگىن توقتاتۋ بيلىكتىڭ باياندىلىعى ءۇشىن شارت. سەبەبى: قازاقستانداعى سالافيلىك ول - «ساياسي يسلامنىڭ» جاتىرى. ال سوپىلار بولسا، ولار ساياسي يسلاممەن قاتىسى جوق، جەكە ادامنىڭ رۋحانياتى مەن بيزنەسى عانا بولاتىن... سوندىقتان دا ساياسي يسلام قۇبىلىسى، ياعني ەكسترەميزم، تەرروريزم، فۋندامەنتاليزم قازاقستاندا سالافيزممەن بايلانىستى ءورشىپ وتىر. ەندى كەشىكسە، «نەبىر "كۇزدەر" مەن "كوكتەمدەر", قىزىلدى-جاسىل توڭكەرىستەر» تاڭسىق بولماي قالادى».

مەملەكەت پەن قوعام جانە ونىڭ ۇلتتىق قۇندىلىقتارى مەن سالت-داستۇرىنە قارسى قانداي دا كۇش قوعامدى بىرىكتىرەتىنى انىق. الايدا، قاۋىپتى كورە تۇرىپ، ونىڭ تامىرىن كەسۋگە اسىقپاي وتىرعان بيلىكتىڭ ارەكەتى قاۋىپتى ءتىپتى زوراياتا تۇسەتىندەي...

ءبىز الماتىداعى قاندى وقيعادان سوڭ، «بيلىك تەرىس ءدىني اعىمدارعا قارسى قانداي شارا قولدانادى؟» دەگەن ساۋالدى وقىرماندارعا قويىپ ەدىك (سۋرەتتە).

بەرىلگەن جاۋاپ نۇسقالارىنىڭ ىشىندە «ءوز مۇددەسىنە پايدالانادى»  دەگەن جاۋاپ ەڭ كوپ داۋىس جيناعان ەكەن. ساۋالناما قورتىندىسىنا قاراساق، ەلدىڭ ۇمىتىنەن كۇدىگى باسىم. دەمەك، بيلىك قوعامنىڭ كۇدىگىن ودان ءارى قويۋلاتپاي، ءۇمىتىن اقتايتىن قادامعا بارۋى قاجەت ەكەنى ايتپاسا دا تۇسىنىكتى. الايدا، بەلگىسىزدىك جەكە ادامدى عانا ەمەس، قوعامدى دا دىڭكەلەتىنىن ۇمىتپاعان ءجون...

اباي بولايىق، اعايىن!

نۇرا ماتاي

abai.kz