دۇنيەجۇزىنىڭ كوپتەگەن ساياساتكەرلەرىنىڭ اراسىندا الەۋمەتتىك جەلىلەردە پاراقشا اشىپ، وندا بەلسەندى جۇمىس جۇرگىزۋ سانگە ءام ادەتكە اينالىپ كەتكەنى جاسىرىن ەمەس. بۇلاردىڭ قاتارىندا ءبىزدىڭ پرەمەر دە بار.  «ينستاگرامم» پاراقشاسىندا جۇمىس جۇرگىزۋدىڭ حاس شەبەرى – قر ۇكىمەت باسشىسى كارىم قاجىمقانۇلى.

جۇرت كۇندە كورە بەرمەيتىن (حالىق اراسىنا ءجيى شىعا بەرمەيتىن), كورمەك تۇگىلى ماڭايىنا جولاي المايتىن پرەمەر-ءمينيستردىڭ نە ىستەپ، نە تىندىرىپ جۇرگەنىن دە ءدال وسى الەۋجەلىدەگى پاراقشاسىنان ءبىلىپ جۇرەمىز.

جاقىندا قازاقستان پرەمەر-ءمينيسترى كارىم ءماسىموۆ استانادان بۋرابايعا قاراي ۆەلوسيپەدكە وتىرىپ جولعا شىعىپتى. ۇكىمەت باسشىسىنىڭ ۆەلوسيپەد تىزگىندەگەن فوتوسى، ونىڭ «ينستاگرامداعى» پاراقشاسىندا جاريالاندى. سۋرەتتىڭ استىنا: «ۆەلوسەرۋەن» دەپ جازىلعان ەكەن.

قازاقستاننىڭ پرەمەرى وسىعان دەيىن دە ءوز «پرەمەراسىن» بەرىپ ۇلگەرگەن-ءتىن. الماتى جۇرتى اتىستن ەس جيا الماي جاتقان كەزدە جەلىدە كارىم ءماسىموۆتىڭ ستۋدەنتتىك جىلدارىنداعى ۆيدەوسى دا جاريالانعان ەدى. بۇنى دا سايكەستىك بولار دەپ قويدىق.

ال وسىدان ءسال ەرتەرەكتە، استانادا وتكەن دۋاتلون جارىسىنا قاتىسىپ، اياعىنا ەكى ءتۇرلى شۇلىق كيىپ كەلگەن «پرەمەر» تاعى دا جەلى جۇلدىزىنا اينالعانى ەل ەسىنەن ۇمىتىلا قويعان جوق.

جوعارىدا الەۋجەلىلەردە بەلسەندى جۇمىس جۇرگىزۋ الەمدىك ساياساتكەرلەر اراسىندا كەڭىنەن تانىمالدىلىققا اينالدى دەدىك. مىسالى، گەرمانيا كانتسلەرى انگەلا مەركەل، اقش پرەزيدەنتى باراك وباما، تۇركيا پرەزيدەنتى رەجەپ ەردوعان، رەسەي پرەمەر-ءمينيسترى دميتري مەدۆەدەۆ ت.ب. باسشىلار الەۋمەتتىك جەلىنىڭ ەڭ تۇراقتى قولدانۋشىلارى. بۇلاردىڭ ساپىندا قر ۇكىمەت باسشىسى كارىم ءماسىموۆ تە بار. ال مەملەكەت باسشىسىنىڭ رەسمي پاراقشاسى «AkordaPress»-تە قازىرگى تاڭدا 10 مىڭنان استام جازىلۋشى بار ەكەن.

بۇل ءبىر جاعىنان پيار بولسا، ەكىنشى جاعىنان الەۋمەتتىك ماسەلەلەردى شەشۋدىڭ ينتەراكتيۆتىك جولى بولىپ تابىلادى. سوندىقتان دا الماتى قالاسىنىڭ جاس اكىمى باۋىرجان بايبەك مىرزا الەۋمەتتىك جەلىدە اكىمشىلىكتىڭ رەسمي پاراقشاسىن اشىپ، وندا قالاداعى تۇيتكىلدى ماسەلەلەردى شەشۋ ءۇشىن تىكەلەي بايلانىس ورناتقان. سونىڭ ناتيجەسىندە الماتى قالاسىنداعى الەۋمەتتىك پروبلەمالاردىڭ 87 پايىزى شەشىمىن تاپقان.

ال ەكىنشى جاعىنان الەۋمەتتىك جەلىلەردى سۋرەت جاريالاۋ قۇرالى رەتىندە عانا پايدالانۋ ادامدى پسيحيكالىق دەرتكە شالدىقتىرادى. مىسالى اقش-تىڭ Adobo Chronicles پسيحياتريالىق اسسوتسياتسياسى سەلفيگە، سۋرەتكە تۇسۋگە اۋەستىكتى رەسمي تۇردە ادام پسيحيكاسىنىڭ اۋىتقۋشىلىعى دەپ جاريالادى. اسسوتسياتسيا باسىلىمىندا جاريالانعان ماقالادا جاڭا دەرتتىڭ اتاۋى «selfies» دەپ كورسەتىلگەن. «selfies – وبەسسيۆتىك-كومپۋلسيۆتىك بۇزىلۋ (لاتىنشا obsessio – قورشاۋ، مەڭدەتۋ، obsessio – قۇلاي بەرىلۋ، بارىن سالۋ، compello – ماجبۇرلەيمىن، compulsio – ىقتيارسىز كوندىرۋ), ياعني ۇنەمى ءوزىن سۋرەتكە ءتۇسىرىپ، ونى الەۋمەتتىك جەلىلەرگە سالىپ وتىرۋ، ءسويتىپ وزىنە جەتىسپەگەن قۇرمەت-قوشەمەتتىڭ ورىن تولتىرۋ» دەپ ءتۇسىندىردى باسىلىم. 

ۇلكەن كرەسلودا وتىرعان شەنەۋنىكتەردىڭ ءار نارسەگە تاۋىلدىلىكتەرى بولاتىنى بەلگىلى. ءبىرى اقشاعا، ءبىرى اتاققا ت.س.س. ال ءبىزدىڭ پرەمەر الەۋمەتتىك جەلىگە ماتاپ تاستاعان قانداي كۇش؟ بالكىم، ءماسىموۆ مىرزاعا قوشەمەت جەتپەي جۇرگەن شىعار.

نۇرگەلدى ابدىعانيۇلى

Abai.kz