قازاقستاننىڭ حالىق بانكىنىڭ مەنشىگىنە تيەسىلى «Altyn Bank» 60 پايىز اكتسياسىن قىتايلىق كومپانياعا ساتتى، - دەپ حابارلايدى «forbes.kz» پورتالى.

«قازاقستاننىڭ حالىق بانكى» اق  قىتايلىق ءىرى قارجى ينستيتۋتىمەن ستراتەگيالىق ماقساتتا ينۆەستيتسيا تارتۋ تۋرالى كەلىسىم جاساسقان. سونىڭ ناتيجەسىندە «Altyn Bank-تىڭ» 60 پايىز اكتسياسى قىتايداعى Chinا CITIC Bank Corporation Limited قارجى ينستيتۋتىنا بەرىلگەن.

رەسمي اقپاراتارعا سۇيەنسەك، ەكى جاقتى كەلىسسوزدەر جۇرگىزىلىپ، قازاقستان-قىتاي قارجى ينستيتۋتتارىنىڭ تالقىسىنان كەيىن عانا قابىلدانعان مەموروندۋم 2017 جىلدىڭ العاشقى جارتىسىندا زاڭدى كۇشىنە ەنبەك.

ال «Altyn Bank» ءارى قاراي دا قىزمەتىن جالعاستىرا بەرەدى-ءمىس.

«سونداي-اق، وسى كەلىسىمدەردىڭ ناتيجەسىندە بىرقاتار ماڭىزدى جوبالاردى جۇزەگە اسىرۋعا مۇمكىندىك اشىلىپ وتىر. Halyk Groupتىڭ «نۇرلى جول»، «جىبەك جولى – ەكونوميكالىق بەلدەۋى»، ء«بىر بەلدەۋ. ءبىر باعىت» سەكىلدى جوبالاردى جۇزەگە اسىرۋدا نەگىزگى ءرولىن ايقىندايدى»، - دەيدى «حالىق بانك» اق باسقارماسىنىڭ ءتورايىمى ءۇمىت شاياحمەتوۆا. سونداي-اق، باسقارما ءتورايىمى ءۇمىت شاياحمەتوۆا بانك اكتسيالارىن ساتۋعا – ساياسي جاعدايلار سەبەپ بولعانىن ايتقان.

ەستەرىڭىزگە سالا كەتەيىك، 2014 جىلى «حالىق بانك» اق «HSBC بانك قازاقستاننىڭ» 100% اكتسياسىن 31 ملرد تەنگەگە ساتىپ العان ەدى. كەيىن بانك اتاۋى "Altyn Bank" بولىپ وزگەرگەن. ەندى مىنە، سول «Altyn Bank-تىڭ» نەگىزگى اكتسيالارى قىتايعا ساتىلىپتى.

نۇرزات توعجان

Abai.kz