تاياۋدا "بولاشاعى جارقىن - وڭتۇستىك جاستارى" فورۋمىنا قاتىسۋشى 150-دەن استام جاس شىمكەنتتەگى «وڭتۇستىك» ارنايى ەكونوميكالىق ايماعىندا بولىپ، ونداعى كاسىپورىنداردىڭ جۇمىسىمەن تانىستى. بەلسەندى جاستار ەگەمەندىك العان جىلداردان بەرى شىعارىلىپ جاتقان وتاندىق ونىمدەردى كورىپ، ساپاسىن بايقادى. 

ەڭ الدىمەن، ولار ايماقتاعى «بال تەكستيل» كىلەم فابريكاسىندا بولدى. ازىرگە، قازاقستاندا تەڭدەسى جوق سەرىكتەستىك ءوز جۇمىسىن 2013 جىلى «يندۋستريالاندىرۋ كارتاسى» باعدارلاماسى اياسىندا باستاعان. بۇل ءوندىرىس ورنى تەك كىلەم توقۋمەن عانا ەمەس، «BCF»، «Heat-Set»، «Frize» ماركالى پوليپروپيلەن جىپتەرىن يىرۋمەن دە اينالىسۋدا. «بال تەكستيلدىڭ» كىلەم جانە كىلەم ونىمدەرىن شىعارۋ قۋاتتىلىعى – جىلىنا 5 ملن. شارشى مەتردەن استام. ال پوليپروپيلەن ءجىبىن ءيىرۋ قۋاتتىلىعى – جىلىنا 4000 توننانى قۇرايدى. بۇگىندە مۇندا 245 ادام جۇمىسپەن قامتىلعان.

بۇگىنگى تاڭدا ارنايى ەكونوميكالىق ايماقتا 10 جوبا جۇمىس ىستەپ تۇرسا، ءوندىرىس ورىندارىمەن تانىسقان جاستارعا بۇل ونەركاسىپ ورىندارى دا كەڭىنەن تانىستىرىلدى. ياعني، «وڭتۇستىكتە» كىلەمدەرمەن بىرگە، شۇلىق توقىلىپ، ماقتادان يىرىلگەن جىپتەر دايىندالاتىنى، قاعاز شىعارىلىپ، قوراپتار ازىرلەنەتىنى ايتىلدى. 

وزىمىزدە وندىرىلەتىن ونىمدەرگە كۋا بولعان بەلسەندىلەر وڭىردەگى وسىنداي كاسىپورىنداردا جۇمىس ىستەپ، ايماقتاعى بارلىق سالانىڭ دامۋىنا اتسالىسقىسى كەلەتىندەرىن جەتكىزدى. بۇل رەتتە، ۇيىمداستىرۋشىلار تاراپىنان الداعى ۋاقىتتا وبلىستاعى وزگە دە ونەركاسىپ ورىندارىنا، ونىڭ ىشىندە، اۋدان، قالالارداعى يندۋستريالدى ايماقتارعا وسىنداي ءىسساپار ۇيىمداستىرىلاتىنى بەلگىلى بولدى. 

ەسكە سالايىق، سەيسەنبى كۇنى وبلىس اكىمى ج.تۇيمەباەۆتىڭ قاتىسۋىمەن "بولاشاعى جارقىن - وڭتۇستىك جاستارى" وبلىستىق فورۋمى وتكەن بولاتىن. وندا ايماق باسشىسى ەلىمىزدىڭ ەرتەڭى – جاستارىمىزعا وڭىرىمىزدە وندىرىلەتىن وتاندىق تاۋارلاردى كورىپ، تانىستىرۋ تۋرالى تاپسىرما بەرگەن بولاتىن. 

Abai.kz