دۇيسەنبى, 9 جەلتوقسان 2019
«سوقىر» فەميدا 3123 0 پىكىر 10 قاراشا, 2016 ساعات 11:39

ۇبت تالاپتارى وزگەردى... تۇلەكتەر ورىس تىلىنەن ەمتيحان تاپسىرادى

2017 جىلدان باستاپ ۇلتتىق بىرىڭعاي تەستىلەۋدىڭ فورماتى وزگەرەتىن بولدى. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ءبىلىم سالاسىنىڭ ماماندارى ايتتى، - دەپ حابارلايدى BNews.kz.

ءبىلىم جانە عىلىم مينيسترلىگىنىڭ باقىلاۋ كوميتەتى توراعاسىنىڭ ورىنباسارى نۇربەك ورشۋبەكوۆتىڭ ايتۋىنشا، ەندى 11 سىنىپتىڭ وقۋشىلارى مەكتەپ اتتەستاتىن الۋ ءۇشىن 5 ءپان بويىنشا ەمتيحان تاپسىرادى.

«ەلىمىزدە ۇبت 13 جىل بويى وقۋشىلاردىڭ ءبىلىمىن سارالايتىن مەحانيز رەتىندە جۇمىس جاساپ كەلدى. وسى جىلدار ىشىندە تەستىلەۋگە 1 جارىم ميلليون تۇلەك قاتىستى. راس، اتا-انالار تاراپىنان ۇبت تەرىس پىكىرلەر ايتىلىپ، بۇقارا حالىق "تەست سۇراقتارىن وقۋشىلار جاتتاپ الادى، وعان تۇلەكتەر ءوز بىلىمىنە سەنىپ ەمەس، باعىنىڭ جانعانىن تىلەپ بارادى" دەگەن سەكىلدى ويلارىن ايتاتىن. بيىل ءبىزدىڭ مينيسترلىك ۇبت جاڭا فورماتىن جاساپ شىعاردى. ەندى مەكتەپ بىتىرۋشىلەر اتتەستات الۋ ءۇشىن ءبىلىم وشاقتارىندا ارنايى ەمتيحاننان وتەدى، سونان كەيىن جوعارى وقۋ ورىنان ءتۇسۋ ءۇشىن تەست تاپسىرادى»، – دەدى نۇربەك ورشۋبەكوۆ.

ءباسپاسوز ءماسليحاتىندا اتالعان مينيسترلىكتىڭ مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى جاڭىل جونتاەۆا مەكتەپتە وتەتىن ەمتيحاننىڭ ەرەجەسىن ەگجەي-تەگجەي بايانداپ بەردى. ونىڭ ايتۋىنشا، ءبىتىرۋشى تۇلەك ەڭ الدىمەن قازاق ءتىلى مەن ادەبيەتىنەن ەركىن تاقىرىپتا ەسسە جازسا، ەكىنشى ءپان قازاقستان تاريحىنان سۇراقتارعا جاۋاپ بەرەدى.

«تاريح ءپانى بويىنشا بۇل جەردە وقۋشىعا تەروريالىق جانە شىعارماشىلىق باعىتتاعى سۇراقتار قويىلادى. ياعني، بالا ءۇشىنشى سۇراعىندا كارتامەن جۇمىس جاسايدى. ال ءۇشىنشى پاندە وقۋشى الگەبرادان جازباشا ەمتيحان تاپسىرادى. مۇنان سوڭ ولارعا قازاق نەمەسە ورىس تىلىنەن (ورىس مەكتەپتەرى قازاق تىلىنەن، قازاق مەكتەبىندەگىلەر ورىس تىلىنەن) تەست سۇراقتارى بەرىلەدى. ەڭ سوڭعى ەمتيحان وقۋشىلاردىڭ وزدەرى تاڭداعان پانىنەن بولادى. وسى جەردە ايتا كەتەيىن، بۇل ەمتيحاندار كەلەسى جىلدىڭ 1-15 ماۋسىم ارالىعىندا وتەدى. مۇنان كەيىن تۇلەكتەر جوعارى وقۋ ورىنان ءتۇسۋ ءۇشىن ۇبت تاپسىرادى. ول 20 ماۋسىم مەن 1 شىلدە ارالىعىندا بولادى»، – دەدى دەپارتامەنت ديرەكتورى.

ءبىلىم سالاسىنىڭ ماماندارى، سونداي-اق، تەستىلەۋ بۇرىنعىداي 125 سۇراقتان 120-عا قىسقارعانىن ايتتى. ەڭ باستى ەرەكشەلىگى ءبىتىرۋشى تۇلەكتىڭ ءبىلىمىن سارالايتىن باسەكە 5 پاننەن، ونىڭ 3-ءى مىندەتتى جانە 2-ءى ءوزى تاڭداعان پاننەن بولادى. سونىمەن قاتار، تەستىلەۋ ۋاقىتى بۇرىنعىداي 3 ساعات 30 مينۋت. ەلىمىز بويىنشا ۇبت 165 ورىندا وتەدى.

ايتا كەتەيىك، كەلەسى جىلى بولجام بويىنشا تەستىلەۋگە 137 715 ءبىتىرۋشىنىڭ 96 400 قاتىسادى.

اباي-اقپارات

 

0 پىكىر