ەلباسى جاپونياعا ساپارى بارىسىندا گوي بەيبىتشىلىك قورىنىڭ 2016 جىلعى «يادرولىق قارۋسىزدانۋ جانە ونى تاراتپاۋ ىسىنە قوسقان ەلەۋلى ۇلەسى ءۇشىن» بەيبىتشىلىك مادەنيەتى ارناۋلى سىيلىعىمەن ماراپاتتاۋ راسىمىنە قاتىستى دەپ حابارلايدى aqorda.kz سايتى.

مەملەكەت باسشىسى سالتاناتتى شارادا بيىلعى بەيبىتشىلىك مادەنيەتى ارناۋلى سىيلىعىنىڭ وزىنە تابىس ەتىلۋى سەمەي پوليگونىنداعى يادرولىق سىناق زۇلماتىن باسىنان وتكەرگەن قازاقستان حالقىمەن نيەتتەستىكتىڭ كورىنىسى ەكەنىن اتاپ ءوتتى.

قازاقستان پرەزيدەنتى پوليگوننىڭ جابىلعان كۇنىنىڭ اسا ماڭىزدى بەلەس ەكەنىن، ويتكەنى ءدال سول كەزدەن باستاپ ءبىزدىڭ ەل يادرولىق قارۋدان ادا الەم قالىپتاستىرۋ جولىنا بەت بۇرعانىن اتاپ ءوتتى.

– حيروسيماعا تاستالعان اتوم بومباسىنىڭ ەكى جارىم مىڭىمەن تەڭەسەتىن 500-گە جۋىق جارىلىس يادرولىق قاتەرگە دەگەن ءبىزدىڭ كوزقاراسىمىزدى تۇبەگەيلى وزگەرتتى. سوندىقتان دا ءبىز يادرولىق پوليگوندى جاپقان ءبىرىنشى ەل بولدىق، قۋاتى جونىنەن ءتورتىنشى ورىن الاتىن يادرولىق ارسەنالدان باس تارتتىق، سونداي-اق ورتالىق ازيادا يادروسىز ايماق قالىپتاستىردىق، – دەدى نۇرسۇلتان نازارباەۆ.

مەملەكەت باسشىسى كەلەسى جىلى قازاقستان ءوز تاريحىندا تۇڭعىش رەت بۇۇ قاۋىپسىزدىك كەڭەسىنىڭ 2017-2018 جىلدارداعى تۇراقتى ەمەس مۇشەسى رەتىندەگى جاۋاپتى ميسسياسىنا كىرىسەتىنىن ايتتى.

– بۇل – حالىقارالىق قوعامداستىق تاراپىنان بىزگە كورسەتىلگەن زور سەنىم. تاراتپاۋ ماسەلەلەرىمەن قاتار، ءبىز جاپونيامەن جانە باسقا دا ارىپتەستەرىمىزبەن بىرگە ازىق-تۇلىك، سۋ جانە ەنەرگەتيكا قاۋىپسىزدىگى ماسەلەلەرىن شەشۋگە دە اتسالىسپاقپىز، – دەدى قازاقستان پرەزيدەنتى.

نۇرسۇلتان نازارباەۆ XXI عاسىردا ادامزاتتىڭ يادرولىق قاتەردەن ادا الەمگە لايىقتى جول تابا الاتىنىنا سەنەتىنىن جەتكىزدى.

– سىندارلى ۇجىمدىق ءىس-قيمىلدى قولعا العان الەمدىك قوعامداستىقتىڭ ەرىك-جىگەرى مەن پاراساتى جەر شارىنىڭ يادرولىق اپات قۇردىمىنا كەتۋىنە جول بەرمەيدى دەپ سەنەمىن. ءبىز حيروسيما مەن ناگاساكيدەگى، سونداي-اق سەمەيدەگى، مارشال ارالدارىنداعى جانە باسقا جەرلەردەگى قاسىرەتتەر تۋرالى ۇمىتپاۋعا ءتيىسپىز. الەمدى يادرولىق اپات قاتەرىنەن قۇتقارۋ ءۇشىن تالماي كۇرەس جۇرگىزۋگە شاقىرامىن، – دەدى مەملەكەت باسشىسى.

گوي قورىنىڭ بەيبىتشىلىك مادەنيەتى ارناۋلى سىيلىعى بەيبىتشىلىك مادەنيەتىن تاراتۋعا جانە ونى ىلگەرىلەتۋگە قوسقان مەيلىنشە ماڭىزدى ۇلەسى ءۇشىن جەكەلەگەن تۇلعالار مەن ۇيىمدارعا بەرىلەدى.

Abai.kz