سوزاق اۋدانىنا جاساعان ساپارى بارىسىندا وڭتۇستىك قازاقستان وبلىسىنىڭ اكىمى جانسەيىت تۇيمەباەۆ «قازاتومونەركاسىپ» ۇاك» اق باسقارما توراعاسى اسقار جۇماعاليۆپەن كەزدەستى. وندا ولار تاۋكەنتتەگى «قانجۋعان» ءوندىرىس ايماعىنداعى «پۆ-5» كەن ءوندىرۋ ورىندارىن ارالاپ، جۇمىسشىلارمەن تىلدەستى، دەپ حابارلايدى وبلىس اكىمىنىڭ ءباسپاسوز قىزمەتى.

كەزدەسۋ بارىسىندا ايماق باسشىسى ج.تۇيمەباەۆ «قازاقستان ۋران وندىرۋدە دۇنيەجۇزى بويىنشا ۇزدىكتەردىڭ قاتارىنا ەنەدى. كاسىپورىن مەن كەنىشتى ارالاۋ بارىسىندا وندىرىستە سوڭعى ۇلگىدەگى جاڭا تەحنولوگيالاردىڭ پايدالاناتىندىعىن كوردىم. ءبىز ۇلتتىق كومپانيامەن ىنتىماقتاسا وتىرىپ، ءىسىمىزدى دامىتا بەرەمىز. «قازاتومونەركاسىپ» اۋداننىڭ عانا ەمەس، وبلىستىڭ دا ەكنوميكاسىن ىلگەرىلەتۋگە ۇلەس قوسىپ كەلەدى. وندىرىسكە قاجەتتى كوپتەگەن زاتتار وسى وبلىستان الىنۋدا. كومپانيانىڭ سۇرانىسىنىڭ ناتيجەسىندە شولاققورعاندا جەكەلەگەن كاسىپورىندار اشىلىپ، ءونىم شىعارىپ جاتىر. كاسىپورىن قىزمەتكەرلەرىنىڭ 70 پايىزىن، ياعني، 7 مىڭىن سوزاق اۋدانىنىڭ تۇرعىندارى قۇرايدى. مۇنداي ىنتىماقتاستىق تەرەڭدەتە بەرۋىمىز كەرەك»، - دەدى.

ءوز كەزەگىندە، ا.جۇماعاليەۆ كاسىپورىننىڭ وڭتۇستىك قازاقستان وبلىسىنىڭ الەۋمەتتىك-ەكونوميكالىق دامۋىنا تيگىزىپ جاتقان ۇلەسىن بايانداپ، كاسىپورىن تاراپىنان الەۋمەتتىك نىساندار سالىنعانىن جەتكىزدى.

«جاقىندا ەلباسىنىڭ قابىلداۋىندا بولدىم. ەكونوميكانى وڭتايلاندىرۋ مەن جەكەشەلەندىرۋگە قاتىستى ۇلتتىق كومپانيا وزىنە مىندەتتەمەلەر العان ەدى. سوعان سايكەس، «قازاتومونەركاسىپكە» قاراستى 27 كومپانيانى جەكەمەنشىككە وتكىزدىك. ترانسفورماتسيانى ەنگىزۋدىڭ ناتيجەسىندە بيىل 17 ملرد. تەڭگەگە ۇنەم جاسادىق. ال 2025 جىلعا دەيىن 136 ملرد. تەڭگەنى ۇنەمدەۋ جوسپاردا بار. دەگەنمەن، وڭتۇستىك قازاقستان وبلىسىنىڭ الەۋمەتتىك-ەكونوميكالىق سالاسىن دامىتۋعا 2025 جىلعا دەيىن 79 ملرد. تەڭگە بولەتىن بولامىز. 2014 جىلى ءبىزدىڭ ونەركاسىپ پەن وقو اكىمدىگى اراسىندا تۇزىلگەن مەموراندۋم اياسىندا وتكەن جىلى جەرگىلىكتى اتقارۋ ورگاندارىنا قايتارىمسىز تۇردە قۇنى 1 ملرد. 663 ملن. تەڭگە بولاتىن 12 الەۋمەتتىك نىسان بەرىلدى. ودان بولەك، جاڭا الەۋمەتتىك نىسنادار سالۋعا 800 ملن. تەڭگە ءبولىندى. بيىل جىل سوڭىنا دەيىن تاعى 800 ملن. تەڭگە ءبولۋ كوزدەلۋدە. قازاقستان جىلىنا 19 مىڭ توننا ۋران ءوندىرىپ، بۇل سالادا ۇزدىكتەردىڭ قاتارىنا ەندى. مۇندا سوزاق اۋدانىنان الىناتىن قۇندى تابيعي بايلىقتاردىڭ ورنى ەرەكشە»، - دەدى «قازاتومونەركاسىپ» باسشىسى.

باسقوسۋ بارىسىندا ەكىجاقتى وسىناۋ ۋاعدالاستىقتى ودان ءارى جالعاستىرىپ، نىعايتۋ ماقساتىندا وڭتۇستىك قازاقستان وبلىسىنىڭ اكىمدىگى مەن «قازاتومونەركاسىپ» ۇاك» اق اراسىندا مەموراندۋم ءتۇزىلدى.

اتالمىش كەلىسىم قۇجاتى الەۋمەتتىك دامۋ سالاسىنداعى قارىم-قاتىناستاردى نىعايتىپ، قولداۋ كورسەتۋ، ونداعى قىزمەتكەرلەردىڭ جۇمىس ورىندارى مەن جالاقىسىن قىسقارتۋعا جول بەرمەۋ، ەڭبەك زاڭناماسىنىڭ تالاپتارىن ساقتاۋ، ونىڭ ىشىندە جالاقى بەرەشەگىن وتەۋ بويىنشا جۇمىستاردى جانداندىرۋ، سونىمەن قاتار، جەرگىلىكتى قامتۋدى دامىتۋ سالاسىندا قولداۋ كورسەتۋدە قوس تاراپقا دا پايدالى بولماق.

اباي اقپارات