شىمكەنتتەگى جەڭىل اتلەتيكالىق سپورت كەشەنىندە كاراتە-دودان جاستار مەن جاسوسپىرىمدەر اراسىنداعى قازاقستان رەسپۋبليكاسى  چەمپيوناتىنىڭ اشىلۋ سالتاناتى ءوتتى.

سپورتتىق شارانىڭ اشىلۋ راسىمىنە وڭتۇستىك قازاقستان وبلىسىنىڭ اكىمى ج.تۇيمەباەۆ، قر كاراتە-دو فەدەراتسياسىنىڭ پرەزيدەنتى، باس پروكۋروردىڭ ورىنباسارى م.احمەتجانوۆ، قر مادەنيەت جانە سپورت مينسيترلىگى دەنە شىنىقتىرۋ جانە سپورت كوميتەتىنىڭ توراعاسى ە.قاناعاتوۆ، «قازاتومونەركاسىپ» ۇاق» اق باسقارما توراعاسى ا.جۇماعاليەۆ، قر كاراتە-دو فەدەراتسياسىنىڭ  ۆيتسە-پرەزيدەنتى ج.ساناۋوۆ پەن كاراتە-دودان قازاقستان رەسپۋبليكاسىنىڭ باس باپكەرى پ.مانسۋروۆ سىندى بىرقاتار ەلىمىزدىڭ سپورت جاناشىرلارى قاتىستى.

اشىلۋ سالتاناتىندا ءسوز العان وبلىس اكىمى جانسەيىت تۇيمەباەۆ ەلىمىزدىڭ ەڭ باستى وقيعاسى بولىپ تابىلاتىن ەگەمەندىگىمىزدىڭ شيرەك عاسىرلىق مەرەيتويى قارساڭىندا باستاۋ العان ەل بىرىنشىلىگى رەسپۋبليكامىزدىڭ باسقا ايماقتارىنان كەلگەن 350-دەن اسا سپورتشىنىڭ باسىن قوسىپ وتىرعانىن اتاپ ءوتتى.

«وبلىس تۇرعىندارى اتىنان بارشا قاتىسۋشى كوماندالارعا ساتتىلىك تىلەي وتىرىپ، قاسيەتتى وڭتۇستىك قازاقستان وبلىسىنا كەلگەندەرىڭىز ءۇشىن شىنايى العىسىمدى بىلدىرەمىن. وسى ءساتتى پايدالانا وتىرىپ، بۇگىنگى ەل چەمپيوناتىنىڭ اشىلۋىنا ارنايى كەلىپ، قاتىسىپ وتىرعان قازاقستان رەسپۋبليكاسى كاراتە-دو فەدەراتسياسىنىڭ قۇرمەتتى پرەزيدەنتى مارات احمەتجانوۆقا 2020 جىلى جاپونيا ەلىندە وتەتىن جازعى وليمپيادا ويىندارىنا كاراتە-دو سپورتىنىڭ ەنۋىمەن شىن جۇرەكتەن قۇتتىقتايمىن» -دەدى اكىم.

ءۇش كۇنگە جالعاساتىن جارىسقا استانا، الماتى قالالارى مەن  ەلىمىزدىڭ ءار وڭىرىنەن كەلگەن 24 سالماقتاعى 300-دەن استام  سپورتشى قاتىسىپ، ءدۇبىرلى دودادا 10-13 جاس ارالىعىنداعى ۇل مەن قىز باق سىنايدى.

بۇگىنگى تاڭدا، وڭتۇستىك قازاقستان وبلىسىندا 3 وبلىستىق، 8 قالالىق جانە اۋداندىق بالالار مەن جاسوسپىرىمدەر سپورت مەكتەپتەرى بار. وندا 35 جاتتىقتىرۋشى  832 بالاعا كاراتە-دودان وقۋ-جاتتىعۋ جۇمىستارىن جۇرگىزەدى.

ايتا كەتەيىك، وبلىستا كاراتە-دو سپورتىنان ەرەسەكتەر، جاستار، جاسوسپىرىمدەر مەن كادەتتەر اراسىنداعى اشىق رەسپۋبليكالىق تۋرنير جىل سايىن شىمكەنت قالاسىندا وتكىزىلىپ كەلەدى.

وسى سپورت ءتۇرى بويىنشا قاسيەتتى جەرىمىزدەن بىرنەشە سپورت تارلاندارى ونىڭ ىشىندە، ازيا ويىندارىنىڭ جەڭىمپازى دارحان اساديلوۆ، حالىقارالىق دارەجەدەگى سپورت شەبەرى، ەرەسەكتەر اراسىندا ازيا چەمپيونى مادينا وتەلباەۆا، حالىقارالىق دارەجەدەگى سپورت شەبەرى، جاستار اراسىندا الەم چەمپيوناتىنىڭ قولا جۇلدەگەرى قايسار الپىسباي، حالىقارالىق دارەجەدەگى سپورت شەبەرى، الديار مەلدەحانوۆ، حالىقارالىق دارەجەدەگى سپورت شەبەرى، ازيا ويىندارىنىڭ قولا جانە كۇمىس جۇلدەگەرى، بۇگىندە وڭتۇستىك قازاقستان وبلىسىنىڭ وسى سپورت ءتۇرى بويىنشا اعا جاتتىقتىرۋشىسى، قازاقستان رەسپۋبليكاسىنا ەڭبەگى سىڭگەن جاتتىقتىرۋشى، قازاق دالاسىنىڭ باتىرى، داڭقتى بالۋان قاجىمۇقان مۇڭايتپاسوۆتىڭ نەمەرەسى شاتتىق قاجىمۇقان شىعىپ وتىر.

اباي اقپارات