وڭتۇستىك قازاقستان وبلىسىنىڭ اكىمى جانسەيىت تۇيمەباەۆ ايماقتىڭ سپورت سالاسى قىزمەتكەرلەرىمەن كەزدەستى. باسقوسۋعا وبلىسىمىزدىڭ سپورت ارداگەرلەرى مەن وسى سالادا ەڭبەك ەتىپ جۇرگەن قىزمەتكەرلەر جانە ۇزدىك سپورتشىلار، سونداي-اق، قر مادەنيەت جانە سپورت مينيسترلىگى دەنە شىنىقتىرۋ جانە سپورت كوميتەتىنىڭ توراعاسى ەلسيار قاناعاتوۆ قاتىستى.

جيىندا وبلىستىق دەنە شىنىقتىرۋ جانە سپورت باسقارماسىنىڭ باسشىسى الىبەك نۇرتاەۆ وسى جىلدىڭ 9 ايىندا اتقارىلعان جۇمىستار مەن الدا تۇرعان مىندەتتەر جايىن باياندادى.

اتاپ ايتقاندا، ەسەپتى مەرزىمدە وبلىس اۋماعىندا 3,5 مىڭنان استام بۇقارالىق سپورتتىق ءىس-شارالار وتكىزىلىپ، وعان 431 مىڭنان استام ادام قاتىسقان. سونىمەن بىرگە، سالاۋاتتى ءومىر سالتىمەن تۇراقتى تۇردە شۇعىلدانۋشىلار سانى 674172 ادامدى قۇراپ، وبلىستاعى بارلىق جاستاعى حالىقتىڭ قامتىلۋى 23,7 % جەتىپ وتىر.

بۇگىنگى تاڭدا، وبلىس كولەمىندە 59 (36 وليمپيادالىق، 23 وليمپيادالىق ەمەس) سپورت تۇرلەرى دامىتىلىپ جاتسا، وعلاندارىمىز قر چەمپيوناتتارى مەن بىرىنشىلىكتەرىنە قاتىسىپ، 390 التىن، 384 كۇمىس، 377 قولا مەدالعا قول جەتكىزگەن. ال ازيا چەمپيوناتتارىندا 19 التىن، 15 كۇمىس جانە 19 قولا مەدالگە يە بولدى. وسى مەرزىم ارالىعىندا سپورت تۇرلەرى بويىنشا وتكەن الەم چەمپيوناتتارى مەن كۋبوكتارىندا 16 التىن، 8 كۇمىس جانە 7 قولا مەدال جەڭىپ الدى.

وتىرىستا جيىنعا قاتىسۋشىلار سالاداعى بۇگىندە وزەكتى بولىپ تۇرعان ماسەلەلەردىڭ جايىن جەتكىزدى.

ناقتىراق ايتقاندا، ولار اۋىلدىق جەرلەردە جۇيەلى تۇردە دەنە شىنىقتىرۋ جانە سپورتپەن شۇعىلدانۋعا بالالار مەن جاستاردىڭ جەتكىلىكسىز دارەجەدە تارتىلۋىنا الاڭدادى. سونداي-اق، وبلىستاعى سپورت نىساندارىنىڭ ءتيىستى قۇرالدارمەن جابدىقتالۋىنىڭ تومەندىگىنە بايلانىستى اتالعان نىساندار مەن عيماراتتارعا قولجەتىمدىلىكتىڭ جوقتىعى جانە سپورت الاڭشالارىنىڭ ازدىعىنا نازا اۋداردى. سونداي-اق، سپورت جاناشىرلارى باسقارماعا قاراستى وبلىستىق دارىگەرلىك-دەنە شىنىقتىرۋ ديسپانسەرىنىڭ مەديتسينالىق جابدىقتارمەن، فارماكولوگيالىق جانە قالپىنا كەلتىرۋ قۇرالدارىمەن جابدىقتالماۋىن، ولاردى ەمدەۋدە كۇندىزگى ستاتسيوناردىڭ بولماۋىن ءسوز ەتتى.

بايانداماشىلاردى مۇقيات تىڭداعان وبلىس اكىمى سپورتتاعى بىرقاتار سالالار بويىنشا ويىن ءبىلدىرىپ، تاپسىرمالار بەردى.

سپورت نىساندارىنىڭ جوسپارلى تۇردە ءوز مەرزىمىندە سالىناتىنىن ەسكەرتكەن ج.تۇيمەباەۆ قولداعى بار سپورت عيماراتتارىن ءتيىمدى پايدالانىپ، ۇيىرمەلەردىڭ باعاسىن قولجەتىمدى ەتۋ ارقىلى وعان جاستاردى كوپتەپ تارتۋدى جۇكتەدى.

ايماق باسشىسى، اسىرەسە، سپورتتىڭ كوركەم گيمناستيكا تۇرىنە قىزىعۋشىلىق ءبىلدىرىپ، جاس جەتكىنشەكتەردىڭ بويىنا ەستەتيكالىق تۇرعىدان سۇلۋ  سانالاتىن وسىناۋ سپورتتىڭ نەگىزىن قالاۋدى تاپسىردى.

وبلىس اكىمى نازارعا العان تاعى ءبىر ماسەلە - 4 جىل سايىن وتەتىن حالىقارالىق جازعى وليمپيادا ويىندارىنا جارتى جىل قالعاندا ەمەس، وسى باستان دايىندالۋ قاجەتتىگى ەدى. بۇل رەتتە، ول ەل تاۋەلسىزدىگىنىڭ 25 جىلدىعىنا ءتۇرلى شارالار وتكىزىپ، ونىڭ ىشىندە، اۋىل، ايماقتاردان جارىستار ۇيىمداستىرۋ ارقىلى جاس تالانتتاردى ىزدەۋدى تاپسىردى.

ال بۇقارالىق سپورتتى دامىتۋدا ءوڭىر باسشىسى كوپ قاباتتى تۇرعىن ۇيلەردىڭ جوبالىق سمەتالىق قۇنىن ازىرلەگەندە ءۇي الدىنان سالىناتىن قۇرىلعىلارمەن قامتاماسىز ەتىلگەن الاڭقايلاردىڭ دا مىندەتتى تۇردە كىرۋى كەرەكتىگىن ەسكەرتتى. سونىمەن بىرگە، اكىم بولاشاقتا وبلىس ورتالىعىنان جاڭا سپورت سارايى مەن ستاديون سالىنۋ قاجەتتىگىنە كوڭىل ءبولىپ، بۇل جوبانى الداعى ۋاقىتتا قاراستىراتىنىن جەتكىزدى.                  

اباي اقپارات