اتىراۋ قالاسىندا ماكس بوقاەۆ پەن تالعات ايانوۆتىڭ ءىسى بويىنشا باستى سوت وتىرىسى ءالى جالعاسىپ جاتىر. قازىرگى ۋاقىتتا ىسكە قاتىسى بار كۋاگەرلەردەن جاۋاپ الىنىپ، وقيعانىڭ ءمان-جايى انىقتالۋ ۇستىندە.

بۇگىن اتىراۋ قالاسى اكىمىنىڭ بۇرىنعى ورىنباسارى، قازاقستان حالقى اسسامبلەياسىنىڭ اتىراۋ وبلىسى بويىنشا حاتشىسى گۇلميرا شاكىروۆا كۋالىك ەتتى. قورعاۋشى تاراپ كۋاگەردەن نەلىكتەن يساتاي-ماحامبەت الاڭىندا ميتينگ وتكىزۋگە رۇقسات بەرىلمەگەنىن سۇرادى. اتاپ وتسەك، م.بوقاەۆ پەن ت.ايانوۆتىڭ وتىنىشىنە رەسمي تۇردە گ.شاكىروۆا جاۋاپ بەرگەن بولاتىن.

«مەن اتىراۋ قالاسى اكىمىنىڭ قاۋلىسى نەگىزىندە يساتاي-ماحامبەت الاڭىندا ميتينگ وتكىزۋگە رۇقسات ەتىلمەيدى دەپ جاۋاپ بەردىم. مەن بۇنى جالعىز ءوزىم ويدان شىعارعان جوقپىن، حاتتى دايىنداۋ كەزىندە قالا اكىمىنىڭ قاۋلىسى، ءماسليحاتتىڭ شەشىمى نەگىزگە الىندى. حات جازىلعاننان كەيىن زاڭگەرلەر تەكسەرۋىنەن ءوتتى. ماكس جانە تالعات، سىزدەر كەزدەسكەن سايىن زاڭگەر ەكەندىكتەرىڭىزدى ايتاسىزدار. 2013 جىلدان بەرى وسى الاڭدا ميتينگ وتكىزۋگە رۇقسات بەرىلمەيتىنىن جاقسى بىلەسىزدەر، قانداي ورىنداردا رۇقسات ەتىلگەنىنەن دە حاباردارسىزدار»، - دەدى گ.شاكىروۆا.

تالعات ايانوۆ يساتاي-ماحامبەت الاڭىندا ميتينگ وتكىزۋگە رۇقسات بەرىلمەيتىنىن بۇرىننان بىلگەنىن، دەگەنمەن، قاساقانا سول الاڭدا وتكىزۋدى كوزدەگەنىن ايتتى.

 «ماعان تالعات ايانوۆ «الاڭدى بەرسەڭىزدەر دە، بەرمەسىڭىزدەر دە، ءبارىبىر سول جەردە وتكىزەمىز. ءبىز سولاي شەشتىك. ۇگىت-ناسيحات جۇمىستارىن دا باستاپ كەتتىك» دەگەن بولاتىن. ياعني، ايانوۆ اكىمدىكتەن رۇقسات سۇراماس بۇرىن حالىقتى 24 ساۋىردە ساعات 14.00-گە يساتاي-ماحامبەت الاڭىنداعى شەرۋگە شاقىرىپ، ۇگىت-ناسيحات جۇمىستارىن باستاپ كەتكەن. م.بوقاەۆ پەن ت.ايانوۆ ميتينگ وتكىزۋ جايىن جاقسى بىلەدى، سەبەبى ولار بۇعان دەيىن تالاي رەت رۇقسات سۇراعان»، - دەدى گ.شاكىروۆا.

كۋاگەردىڭ ايتۋىنشا، بيىلعى جىلدىڭ باسىندا بەيبىت شەرۋگە ارنالعان ورىندار قايتا بەكىتىلگەن بولاتىن. جاڭا ورىنداردى بەكىتۋگە ۇسىنۋ گ.شاكىروۆاعا، قۇقىقتىق ءبولىم، ىشكى ساياسات ءبولىمى مەن جەرگىلىكتى پوليتسياعا جۇكتەلگەن. ماسەلەن، سول كەزدە م.بوقاەۆتىڭ ءوزى بۇرىننان نارازى بولعان قۇنانباي كوشەسىندەگى ورىن الىنىپ تاستالعان. سەبەبى ول جەردىڭ جولى ناشار بولعان. كۋاگەردىڭ مالىمەتىنشە، ميتينگ وتكىزۋگە رۇقسات ەتىلگەن ورىنداردا اسفالت جول بولۋى ءتيىس، سونداي-اق ولاردىڭ ماڭىندا مەكتەپ پەن ماڭىزدى عيماراتتار ورنالاسپاۋى كەرەك. كۋاگەر بۇنداي ورىنداردا اسفالت جول، ورىندىقتار مەن بەينەكامەرانىڭ بولعانى ءجون دەيدى. ونىڭ ايتۋىنشا، قالاداعى الاڭداردا ادەتتە جىلدىڭ باسىندا بەكىتىلگەن مەرەكەلىك شارالار عانا وتكىزىلەدى.

اتاپ وتسەك، سوت پروتسەسىندە ت.ايانوۆتىڭ كوپتەگەن جايتتاردى ىستەگەنىن مويىنداپ وتىرعانىن، ال م.بوقاەۆتىڭ ءجيى اقتالاتىنىن انىق بايقاۋعا بولادى.

ەسكە سالا كەتسەك، م.بوقاەۆ پەن ت.ايانوۆقا قر قىلمىستىق كودەكسىنىڭ ءۇش بابى بويىنشا ايىپتار تاعىلۋدا. اتاپ ايتساق، ولار: 174 باپتىڭ 2 تارماعى، ياعني، الەۋمەتتىك جانە ۇلتتىق الاۋىزدىق تۋعىزۋعا باعىتتالعان قاساقانا ءىس-ارەكەتتەر جاساۋ، ازاماتتاردىڭ ۇلتتىق نامىسى مەن قادىر-قاسيەتىنە ءتىل تيگىزۋ; 274 باپتىڭ 4 تارماعى، ياعني، قوعامدىق ءتارتىپتى بۇزۋعا قاۋىپ توندىرەتىن كوپە-كورىنەۋ جالعان اقپارات تاراتۋ; 400 باپ، ياعني، زاڭسىز شەرۋلەردى ۇيىمداستىرۋ، وتكىزۋ جانە وعان قاتىسۋ.

Abai.kz