قر پرەمەر-ءمينيسترىنىڭ ورىنباسارى يمانعالي تاسماعامبەتوۆ 1916 جىلعى ۇلت-ازاتتىق كوتەرىلىسىنىڭ باتىرى – كەيكى باتىردىڭ سۇيەگىن جەرلەۋ ماسەلەلەرى جونىندە كەزەكتى جۇمىس كەڭەسىندە تۇتاس ءبىر ۇلتتىڭ نامىسىن ارقالاعان اقبەرەن قولباسشىنىڭ  باس سۇيەگىنىڭ ەلگە قايتارىلۋى ەلدىگىمىز بەن ەرلىگىمىزدى پاش ەتكەن يگىلىكتى ءىس ەكەنىن باسا ايتتى.

حالىق اۋزىندا كەيكى باتىر اتىمەن تانىمال نۇرماعانبەت كوكەمبايۇلى – 1916 جىلعى رەسەي پاتشالىعىنىڭ قازاقتان اسكەرگە ادام الۋ تۋرالى جارلىعىنا قارسى كوتەرىلگەن تورعاي قازاقتارى كوسەمدەرىنىڭ ءبىرى. ول كوتەرىلىسشىلەردىڭ نەگىزگى قارۋلى كۇشى – مەرگەندەر جاساعىن باسقارعان.

ەسكە سالا كەتسەك، 6 قازان كۇنى كەيكى باتىردىڭ باس سۇيەگى رەسەيدەن قازاقستانعا جەتكىزىلدى. ول 93 جىل بويى سانكت-پەتەربۋرگ قالاسىنداعى كۋنستكامەرادا ساقتالىپ كەلدى.

 باتىردىڭ اتى مەن ەرلىگىن بارىنشا دارىپتەپ، ونىڭ دەنەسىن سالت-داستۇرىمىزبەن ارۋلاپ جەرلەۋ قابىرعالى حالىق، ىرگەلى ەل ەكەندىگىمىزدىڭ كورىنىسى. سوندىقتان، يمانعالي تاسماعامبەتوۆ كەيكى باتىردىڭ دەنەسىن جەرلەۋ ءراسىمىن ۇيىمداستىرۋ جونىندەگى ناقتى ءىس-قيمىل جوسپارىن قۇرۋ ماڭىزدى ەكەنىن اتادى.

دەگەنمەن، ارادا باتىردىڭ باس سۇيەگىنە كەتپەن تيگەن سەكىلدى قاڭقۋ سوزدەر دە ايتىلىپ قالعانى راس. انتروپولوگيانىڭ بۇگە-شىگەسىنە دەيىن زەرتتەيتىن ۆەنگرلىك عالىمداردىڭ مالىمەتىنشە، كەيكى باتىردىڭ باس سۇيەگىنە بالتا، نە، اۋىر سەمسەر سەكىلدى  قارۋدىڭ زاقىم كەلتىرگەنى انىقتالىپ وتىر. بۇل تۇرعىدا سەممەلۆەيس ۋنيۆەرسيتەتىنىڭ (بۋداپەشت قالاسى) راديولوگيا جانە ونكوتەراپيا كلينيكاسىندا باسسۇيەكتىڭ جانە جاق سۇيەگىنىڭ  كومپيۋتەرلىك توموگرافياسى جاسالدى.

ءبىر نارسە انىق، باتىردىڭ باس سۇيەگى ءمايىتى تابىلعان كەزدە  جەرلەنەدى، دەنەسىن ىزدەۋ ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنە جۇكتەلىپ وتىر.

كەڭەس بارىسىندا يمانعالي تاسماعامبەتوۆ مادەنيەت جانە سپورت مينيسترلىگىنە قوستاناي وبلىسىنىڭ اكىمدىگىمەن بىرلەسىپ كەيكى باتىردىڭ كەسەنەسىن جوبالاۋ جانە ودان ءارى قۇرىلىسىن جۇرگىزۋ ءۇشىن قاجەتتى بارلىق شارالاردى قابىلداۋ جونىندە تاپسىرما بەردى.

ۆيتسە-پرەمەر حالقىمىزدىڭ رۋحى مەن مارتەبەسىن كوتەرۋ تۇرعىسىندا وسىناۋ جوبانىڭ تاريحي ماڭىزىنا ەرەكشە توقتالىپ، ونى جۇزەگە اسىرۋ ءۇشىن قۇزىرلى مەكەمەلەر جانە قوعام وكىلدەرىمەن بىرلەسىپ ءىس-قيمىل جاساۋعا دايىن ەكەنىن مالىمدەدى.

سونىمەن قاتار، كىتاپتار، پەسا جازىلىپ، كوپتەگەن ءىس-شارالار وتكىزۋ جوسپارلانىپ وتىر.

عالىمجان سارسەن،

دەرەككوز: ۇلت پورتالى