بۇگىن ءوڭىر باسشىسى ج.تۇيمەباەۆ وڭتۇستىك قازاقستان وبلىسىنا جۇمىس ساپارىمەن كەلگەن «بايتەرەك» ۇلتتىق باسقارۋشى حولدينگى» اق باسقارما توراعاسى ەربولات دوساەۆپەن بىرگە، حولدينگتىڭ ەنشىلەس كومپانيالارى قارجىلاندىرعان بىرقاتار نىسانداردا بولدى.

جۇمىسشى توپ، ەڭ الدىمەن، «اسار» شاعىن اۋدانىنا بارىپ، «نۇرلى جول» ينفراقۇرىلىمداردى دامىتۋعا ارنالعان مەملەكەتتىك باعدارلاماسىنىڭ شەڭبەرىندە «بايتەرەك» ۇلتتىق حولدينگىنىڭ قولداۋىمەن بوي كوتەرىپ جاتقان كوپقاباتتى ۇيلەردىڭ قۇرىلىسىمەن تانىستى. بۇگىنگى تاڭدا شاعىن اۋداندا 1496 پاتەردەن تۇراتىن 5 قاباتتى 34 ءۇيدى 4 مەردىگەر كومپانيا سالۋدا. ءوز كەزەگىندە، باسقارما توراعاسى تانىستىرىلعان جۇمىستاردى وڭ باعالاپ، قۇرىلىستى ساپالى ءارى ۋاقىتىلى ىستەيتىن مەردىگەر مەكەمەلەردى قولداۋعا ارقاشاندا دايىن ەكەنىن جەتكىزدى.  

جۇمىس ساپارى بارىسىندا ەربولات اسقاربەكۇلى «وڭتۇستىك» يندۋستريالدى ايماعىنا بارىپ، ماتور مايلارى مەن مايلاۋ ماتەريالدارىن ءوندىرۋ زاۋىتىنىڭ قۇرىلىسى جوباسىن كوردى. باسقارما توراعاسى ونداعى «بايتەرەك» اق-نىڭ ەنشىلەس كومپانيالارى قارجىلاندىراتىن جاڭا جوبالارمەن تانىسىپ، جۇمىسىنا قانىق بولدى.

«وڭتۇستىك» ارنايى ەكونوميكالىق ايماعىندا ورنالاسقان «بالتەكستيل» كىلەم فابريكاسى دا ە.دوساەۆتىڭ نازارىنان تىس قالعان جوق. «بيزنەستىڭ جول كارتاسى 2020» باعدارلاماسى اياسىندا قولداۋ تاۋىپ، قارجىلاندىرىلعان جوبا 2014 جىلى ىسكە قوسىلىپ، كىلەم فابريكاسىمەن 1722,6 مىڭ ش.م. كىلەم مەن كىلەم ونىمدەرى دايىندالعان. بۇگىنگى تاڭدا مۇندا 245 ادام جۇمىسپەن قامتىلعان.

مۇنان بولەك، جەتەكشىلىك «AzalaTextile» جشس-ءى توقىما-تىگىن فابريكاسىنىڭ وندىرىسىمەن تانىستى. اتالعان فابريكا دا حولدينگ تاراپىنان «بيزنەستىڭ جول كارتاسى 2020» باعدارلاماسى بويىنشا قولداۋ العان. «AzalaTextile» جشس-ءنىڭ ەرەكشەلىگى سول، مۇندا قولدانىلاتىن شيكىزاتتاردىڭ بارلىعى وتاندىق. بۇگىنگى تاڭدا كومپانيانىڭ ونىمدەرى ليتۆا، لاتۆيا، يتاليا مەن گەرمانيا، چەحيا، رەسەي، قىتاي مەن ەستونيا سىندى بىرقاتار مەملەكەتتەرگە ەكسپورتتالادى.

ساپار قورىتىندىسى بويىنشا باسقارما توراعاسى اتالعان ونەركاسىپ ورىندارىندا وندىرىلەتىن ونىمدەردى شەتەلدىك نارىققا شىعارۋ قاجەتتىگىنە توقتالىپ، ونى ورتالىقتاندىرۋ ماقساتىندا ارنايى عالامتوردان سايت اشۋ كەرەكتىگىن ايتتى. بۇل ءوز كەزەگىندە، شەتەلدىك ساتىپ الۋشىلارعا وڭتايلى جاعداي تۋعىزباق.

Abai.kz