اۋىر اتلەتشىلەرىمىز حالىقتان كەشىرىم سۇراپ، بيۋدجەتتەن العان قىرۋار قارجىنى قايتارسىن،-دەپ جازادى "qazaquni.kz" پورتالى.

كەشە عانا حالىقارالىق وليمپيادالىق كوميتەتتىڭ ەلىمىزدىڭ ءتورت بىردەي اۋىر اتلەتىن وليمپيادا مەدالىنەن ايىردى. كۇللى الەمگە وزدەرىن دە، ءوز ەلىن دە ماسقارا قىلدى دەسەك، ارتىق ايتقاندىق ەمەس.

بىرىنشەدەن، حوك سەكىلدى بەدەلدى ۇيىم داۋلى حابارلاما عانا جاساۋمەن اينالىساتىن مەكەمە ەمەس قوي. جانە ءبىزدىڭ سپورتشىلارىمىزدان باسقا الەمنىڭ نەبىر الپاۋىت ەلدەرىنىڭ سپورتشىلارى دا مەدالدەرىنەن قاعىلدى.

ەكىنشىدەن، حالىق اراسىندا «ويباي، يليا ءيليندى كورە المايدى، اياقتان شالدى»  دەگەن سوزدەر ءجيى ايتالادى. الەمدىك دەڭگەيدە يليا سىندى سپورتشى جوق دەيمىز بە سوندا؟ ەكى دۇركىن وليمپيدا چەمپيونى بولعان سپورتشىلار جەتىپ ارتىلادى. اقش-تىڭ ايگىلى مايكل فەلپسى شە؟ جيىرما ءۇش رەت وليمپيادا چەمپيونى اتانعان فەلپس نەمەسە توعىز دۇركىن وليمپيادا چەمپيونى ۋسەين بولتتى دوپينگ قولداندى دەپ ايىپتامادى عوي. جانە بۇكىل الەمدە، قازاقستاندا تەك قانا يليا يلين وسى قارا تىزىمگە ەنسە وندا ويلانۋعا بولار ەدى.

ۇشىنشىدەن، اۋىر اتلەتتەردىڭ «كوسەمى» الەكسەي ني وسى جاعدايدىڭ ءبارىن تەرىسكە شىعارىپ وتىر. قازاقتا ماقال بار، «ساسقان ۇيرەك قۇيرىعىمەن جۇزەدى» دەگەن. ارينە، تەرىسكە شىعارادى. «يا، ءبىز قابىلداپ ەدىك» دەپ ايتۋعا ءداتى قايدا، بايعۇستىڭ… ال، سول ءنيدىڭ «نەادەكۆاتنىي» پىكىرلەرىنە بولا الەمدىك وليمپيادالىق كوميتەتتىڭ جۇمىسىنا سەنبەۋگە بولا ما؟

تورتىنشىدەن، اۋىر اتلەتشىلەردىڭ «قىلمىسى» دالەلدەندى. ال، ەندى ولارعا بيۋدجەت ەسەبىنەن، ءسىز بەن ءبىزدىڭ قالتامىزدان بەرىلگەن قىرۋار قارجى نەگە قايتارىلمايدى؟ بيۋدجەت دەگەنىڭىز – ءسىزدىڭ اي سايىنعى ايلىعىڭىزدان ۇستالاتىن ون پايىز اقشا! بۇلارعا بەرىلگەن 250 مىڭ دوللار، بالەنباي-تۇگەنباي مىڭ دوللاردىڭ ءبارى، ءسىز بەن ءبىزدىڭ تىرنەكتەپ جيعان تابىسىمىز. سوندا ولاردىڭ ەلدى الداپ، الەمگە قارا بەت بولعاندارىنا وسىنشاما اقشا تولەۋىمىز كەرەك پە؟

نەسىپ يمانباي

Abai.kz