«اقتاستاعى احيكو» دراماسى - م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ 91 ماۋسىمىنىڭ العاشقى پرەمەراسى. تەاتر بۇل جاڭا قويىلىمىن قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارناپ وتىر.

قارلاگتى زەرتتەۋشى، زاڭ عىلىمدارىنىڭ دوكتورى، پروفەسسور، قازاقستان رەسپۋبليكاسى پارلامەنتى ءماجىلىسىنىڭ دەپۋتاتى نۇرلان دۋلاتبەكوۆ پەن تەاتر ديرەكتورى ەرلان ءبىلالدىڭ يدەياسى بويىنشا دراماتۋرگ اۆتورى ءمادينا وماروۆا جازىپ، قازاقستاننىڭ ەڭبەك سىڭىرگەن قايراتكەرى، رەجيسسەر اسحات ماەميروۆ ساحنالاعان بۇل قويىلىم تەاتر ۇجىمىنىڭ قازاقستان رەسپۋبليكاسىنىڭ  تاۋەلسىزدىگىنىڭ 25 جىلدىعىنا ارناعان ۇلكەن جوباسى.

«قارلاگ» – كەڭەس وداعىنداعى لاگەرلەردىڭ باس باسقارماسى گۋلاگ-تىڭ قازاقستانداعى ەڭبەكپەن تۇزەۋ لاگەرلەرىنىڭ ءبىرى بولدى. قۋعىن-سۇرگىنگە ۇشىراعانبىر ميلليونعا جۋىق ادام كارلاگتا نەبىر ازاپتى كەزەڭدى باستان وتكەردى. ولاردىڭ اراسىندا قازاقتارمەن قاتار ورىستار، ۋكرايندار، لاتىشتار، ەستوندار،  پولياكتار، ەۆرەيلەر، نەمىستەر، جاپوندار، فرانتسۋزدار، يتاليالىقتار، تاعى دا باسقا كوپتەگەن ۇلتتار وكىلدەرى بولدى. سولاردىڭ ءبىرى - جاپوندىق احيكو تەتسۋرو.

سپەكتاكلگە وسى احيكونىڭ قيلى تاعدىرى ارقاۋ بولدى. ناقتىراق ايتقاندا، كەڭەس ۇكىمەتى كەزىندە ستاليندىك قۋعىن-سۇرگىنگە ۇشىراپ، 17 جاسىندا جازىقسىزدان جازىقسىز اتاقتى قارلاگ تۇرمەسىنە ءتۇسىپ، جاستىق شاعىن ازاپتى ومىرمەن وتكىزگەن، بوساپ شىققان سوڭ، قاراعاندى ماڭىنداعى اقتاس قالاسىندا تۇراقتاپ، قونىستانىپ قالعان احيكو ەسىمدى جاپون ازاماتىنىڭ تاعدىرى كوركەم باياندالادى.

كەيىن اكەسىمەن جانە باۋىرلارىمەن قاۋىشقان احيكو تەتسۋرو ءوزىنىڭ تاريحي وتانىنا بارادى، بىراق، قازاقستانعا قايتا ورالادى.

قازىر احيكو اقساقال 85 جاستا. 11 نەمەرە، 5 شوبەرە ءسۇيىپ، ۇلكەن اۋلەتتىڭ باسى بولىپ وتىر. 

احيكو تەتسۋرونىڭ تاعدىر جولى – ستاليندىك زۇلمات جىلدارىندا قازاقستانعا قونىس اۋدارعان، ايدالىپ، جازىقسىز سوتتالىپ لاگەرلەرگە اكەلىنگەن مىڭداعان ادامداردىڭ، ءتۇرلى ۇلت وكىلدەرىنىڭ تاعدىرى. قويىلىمدا احيكونىڭ تاعدىرى ارقىلى، حح عاسىرداعى ەڭ اۋىر كەزەڭدە، ازاپ لاگەرلەرىندە وتىرىپ، ءوزىنىڭ ادامي بەينەسىن ساقتاپ قالعان رۋحى مىقتى، جاسامپاز جانداردىڭ جيىنتىق بەينەسى جاسالعان.

قويىلىم سوڭىنداعى احيكونىڭ مونولوگى «پەيىلى كەڭ، قۇشاعى ىستىق قازاقستانداي ەلىمىز بار. تىرشىلىگىمىزدىڭ ءالسىز شىراعى سونەر شاقتا، پانا بولدى. سان مىڭداعان رۋحتى امانات ەتىپ قابىلداپ، كوبەسىن بۇزباي، قاتارىن سيرەتپەي وتان-انالارىنا قايتاردى. مەن بولسام، وزىڭە قايتا ورالدىم، قازاقستانىم. ءوز وتانىمدى سۇيمەگەندىكتەن ەمەس، سەنىڭ الدىڭدا بورىشتار بولعاندىقتان. تۇعىرى – اسقاق، بولمىسى – پاڭ، ءبىتىمى – بەكزات قازاق ەلى – ەندى مەنىڭ ەلىم. ىنتىماقتىڭ ۇياسى، جەرۇيىق مەكەن قازاقستان – ەندى مەنىڭ وتانىم»، - دەگەن وزەكجاردى سوزدەرمەن اياقتالادى.

قازاقستاننىڭ تەاتر كەڭىستىگىندە تۇڭعىش رەت كوزى ءتىرى ساياسي قۋعىن-سۇرگىن قۇربانىنىڭ تاعدىرى دەرەكتى دراماعا ارقاۋ بولىپ، ساحنادان العاش رەت كورسەتىلەدى.احيكو تەتسۋرو بەينەسى - بارلىق قازاقستاندىقتاردى ەلدىك پەن بىرلىككە، كەلىسىم مەن ىنتىماققا ۇندەيدى.

سپەكتاكل  پرەمەراسى 22, 23 قازاندا بولادى.

تەاتردىڭ ءباسپاسوز قىزمەتى

بايلانىس تەلەفوندارى: 394-65-45

                                  8778-620-59-54

 Abai.kz