وتكەن اپتادا ءۇش وتباسىنىڭ ويرانىن شىعارعان وقيعا بولدى. الماتى وبلىسى جامبىل اۋدانىنىڭ ورتالىعى ۇزىناعاش كەنتىندەگى مال بازارىنا 18 قىركۇيەك كۇنى مال اكەلگەن 1979 جىلعى دولدانۇلى جارقىنبەك، 1973 جىلعى زارلىحانۇلى مۇقيات پەن ءالىمحان قادىلبەك ەسىمدى ازاماتتاردىڭ جوعالعانى بەلگىلى بولىپ، ارتىنشا ول جىگىتتەردىڭ سۇيەگى تابىلدى. تاۋەلسىزدىك العاننان كەيىن، ەلى مەن جەرىن اڭساپ جەتكەن ءۇش ازاماتتىڭ قازاسى ءار قازاقتىڭ قابىرعاسىن قايىستىرىپ كەتكەنى راس.

قازاق قازىر مىڭعا ءبولىندى. رۋشىلدىعىمىز اسقىنىپ تۇر. دىنشىلدىگىمىز باسىمىزدى ءبىر داستارحاندا تۇيىستىرمەيتىن بولدى. ورىستىلدىلەر مەن قازاقتىلدىلەر بولىپ، تاعى قىرقىسىپ جاتامىز. ەندى كەلىپ، جەرگىلىكتى قازاقتار مەن ورالماندار اتانىپ الىپ، قاق جارىلۋدىڭ الدىندا تۇرمىز. اقپارات قۇرالدارىنان ەستۋىمىزشە كورشى ەلدە «قازاقستاندا قىتايدان كەلگەندەردى قىرىپ جاتىر ەكەن؟» دەگەن قاۋەسەت تاراپ جاتقان كورىنەدى.

قازاقتىڭ باسىن قوسپاۋ، «ەلىم مەن جەرىم» دەپ وتىرعان اعايىننىڭ ىستىق كوڭىلىن سۋىتۋ ءۇشىن ءالى تالاي قيتۇرقى ارەكەتتەر جاسالۋى مۇمكىن. دەسەك تە، قازاقتىڭ سانالى ۇرپاعى مۇنداي ارانداتۋشىلداردىڭ سوزىنە ەرمەيدى دەپ ويلايمىز.

ءۇش جىگىتتىڭ ولىمىنە سەبەپ، ولاردىڭ ورالمان بولۋى ەمەس. بۇل - ىسكەر جىگىتتەردىڭ تاپقانىنا كوز الارتقان جەندەتتەردىڭ ءىسى. قىلمىسكەرلەردىڭ كوكەيىن تەسكەن – اقشا. سول سەبەپتى اقشا ءۇشىن جاسالعان قىلمىس الەۋمەتتىك نارازىلىققا ۇلاسپاۋى ءتيىس. شەتتەن كەلگەن ءتۇرلى دياسپورانى قۇشاعىنا سىيعىزعان قازاق ءوز قانداسىن دا وزەكتەن تەپپەيدى. وسىنى قانداستار تۇسىنسە دەيمىز.

بىراق، ءار ەلدە، ءار جەردە ءبىر تەنتەكتىڭ بولاتىنى راس. قىلمىسكەردىڭ ۇلتى مەن تەگى بولمايدى. سوندىقتان دا، ەلىمىزدەگى تەنتەكتەرىمىزدى باستىقتىرا الماعانىمىز ءۇشىن، شەتتەن كەلگەن ءار اعايىننان جەرگىلىكتى قازاقتار كەشىرىم سۇراۋعا ءتيىسپىز. 

بۇل ماسەلەگە قازاقستان رەسپۋبليكاسىنىڭ ىشكى ىستەر ءمينيسترى قالمۇحانبەت قاسىموۆ مىرزا باستاپ، وزگە دە قۇزىرەتتى ورگاندار تىكەلەي ارالاسىپ، كىنالىلەر ءادىل جازاسىن الۋى قاجەت.

ءبىزدىڭ ازىرگە ايتارىمىز وسى.

ءشارىپحان قايسار

Abai.kz