كەشە رەسەيشىل ءبىر جىگىتپەن پىكىر تالاستىرىپ قالدىم. "كۇيرەگەن كسرو قايتا قۇرىلار بولسا، مەن العاشقىلاردىڭ ءبىرى بولىپ، سول مەملەكەتكە بارىمدى سالىپ قىزمەت ەتەر ەدىم" دەيدى ول. "قازاققا جاسالعان گەنوتسيدكە بۇگىنگى رەسەي جاۋاپتى ەمەس" دەپ تاعى دا ايدى اسپاننان شىعاردى. اقش-تى قۇبىجىق رەتىندە سۋرەتتەپ، ءبىراز مازانى الدى. رەسەيدىڭ الەمدى بيلەۋدەگى مۇمكىندىگىن ايتىپ، اۋزىنىڭ سۋى قۇرىدى.

مەن وعان اقش-تاعى ايفون وندىرەتىن Apple كومپانياسىنىڭ جىلدىق بيۋدجەتىنە رەسەيدىڭ جىلدىق كىرىسىنىڭ جەتپەيتىنىن ناقتى دەرەكتەرمەن ايتىپ بەردىم.

ءبىز ءوزى قالتاسى تەسىك، ەكونوميكالىق الەۋەتى وتە تومەن رەسەيمەن وداقتاسىپ وتىرعانىمىزدى، الەمدىك نارىققا شىعارار شيكىزاتىمىز بەن اۋىلشارۋاشىلىق ونىمدەرىمىزبەن بەيشارا ەلدى اسىراۋعا بەل شەشە كىرىسىپ جاتقانىمىزدى ايتتىم. ول از بولسا، تابيعي تۇردە السىرەپ، قولدانىستان شىعىپ بارا جاتقان ورىس تىلىنە ەرەكشە قامقورلىق جاساپ، مەشىتتەرگە دەيىن ورىسشا ۋاعىز ايتۋدى ءھام ەلىمىزدەگى ءبىلىم وردالارىن ءۇشتىلدى مەكتەپتەرگە اينالدىرىپ جاتقانىمىزدى كۇيىنە اڭگىمەلەدىم.

ءبىر قىزىعى مەنىڭ وپپوننەنتىمە تەك Apple-دىڭ بيۋدجەتى عانا اسەر ەتسە كەرەك، "بۇل فاكتىنى سەن ويدان شىعاردىڭ، رەسەي دەگەن الىپ ەل" دەپ قاسارىسىپ باقتى. اقىرى ينتەرنەتتىڭ كومەگىنە جۇگىندىك.

وندا بىلاي دەپ جازىلىپتى. "Apple كومپانياسىنىڭ 2015 جىلعى كىرىسى 234 ملرد. دوللاردى قۇراعان. ال، وسى جىلداعى رەسەي بيۋدجەتىنىڭ كىرىسى 197 ملرد. دوللارعا ارەڭ جەتكەن".

تاۋەلسىز ەل بولعانىمىزعا 25 جىل ۋاقىت ءوتتى. وسى جيىرما بەس جىلدا ءبىزدىڭ كەيبىر ازاماتتارىمىزدىڭ ساناسىنىڭ وزگەرمەۋىنە رەسەيلىك باق-تىڭ بۇعاۋىنان بوساي الماۋىمىز سەبەپ بولىپ وتىر-اۋ تەگى... ەگەر دە رەسەيلىك اقپارات قۇرالدارىن جاۋىپ، ناقتى شىنايى اقپاراتتارعا قول جەتكىزسەك، بىزدە بىردە-ءبىر رەسەيشىل ازامات قالماس ەدى. 

اقش-تىڭ ءبىر عانا كومپانياسىنىڭ تابىسىن تابا المايتىن الەمنىڭ "سوتقار بالاسىنىڭ" قىلىعىنا كۇلىپ قاراپ وتىرار ەدىك. 

ورىسشا سويلەۋدى ابىروي سانايتىن ازاماتتارىمىز ول ەلدىڭ مەشەۋ قالپىن بىلەر بولسا، ونىڭ تىلىندە سويلەۋگە ارلانار ەدى. 

ۇكىمەت جينالىسىن وزگە تىلدە وتكىزبەگەندەردى تەزگە سالىپ، مەشەۋ ەلمەن وداق بولۋدان ءۇزىلدى-كەسىلدى باس تارتار ەدى. 

امال نە، رەسەي ءبىزدىڭ شەنەۋنىكتەرىمىز بەن كەيبىر ازاماتتارىمىزعا ءالى - ۇلى ەل! 

ۇلى ەل ەمەس، ۋ-لى ەل ەكەنىن قاشان تۇسىنەر ەكەنبىز...

قانات ابىلقايىر

Abai.kz