وڭتۇستىك قازاقستان وبلىسى اۋىلشارۋاشىلىق باسقارماسىنىڭ جەلتوقسان ايىنداعى مالىمەتتەرىنە سۇيەنسەك، بيىل وڭىردە «سىباعا» باعدارلاماسى بويىنشا مال شارۋاشىلىعىنا ايرىقشا قولداۋ كورسەتىلىپ وتىر.

ماسەلەن، «سىباعا» باعدارلاماسىمەن 25,4 مىڭ باس انالىق ساتىلىپ الىنعان.  بۇل شارۋاشىلىقتاعى ءىرى قارا مالدىڭ تۇقىمىن ىرىلەتۋ ماقساتىندا جۇزەگە اسىرىلىپ وتىر. وبلىستاعى اتالعان سەكتور ماماندارىنىڭ پىكىرىنشە باعدارلاما بويىنشا مال باسىن اسىلداندىرۋعا 76,5 مىڭ ءىرى قارا قاتىستىرىلادى.

بۇل وڭىردەگى انالىق باس مالدىڭ 20,2 پايىزىن قۇرايدى. ال اتالعان كورسەتكىش رەسپۋبليكا بويىنشا ۇلەسى 29,6 پايىز.

وڭتۇستىك قازاقستان وبلىسى اكىمىنىڭ ءباسپاسوز قىزمەتى تاراتقان مالىمەتكە سۇيەنسەك، وڭىردە «سىباعا» باعدارلاماسى بويىنشا ءبىر باس سيىر ءۇشىن 154 مىڭ تەڭگە كولەمىندە سۋبسيديا بولىنەدى.

جەلتوقسان ايىنىڭ قورىتىندىسىنا نازار اۋدارساق، «سىباعا» باعدارلاماسى وڭتۇستىكتىڭ اۋدان، قالالارىنان بولەك كەنتاۋلىق شارۋالاردى دا قۋانتۋدا.  ماسەلەن، قارناق اۋىلىنداعى «بەرەكە» جانە «مۋراد»، حانتاعى اۋىلىنداعى جەكە كاسىپكەر گۇلنازيا جاناباتىروۆا اسىل تۇقىمدى بۇقالار الىپ، 100-گە جۋىق سيىرعا تۇقىمدىق تۇرلەندىرۋ جۇمىستارىن جۇرگىزىپ كەلەدى. تاڭەرتەڭنەن كەشكە دەيىن قاقتاپ ساۋساڭ دا جارتى شەلەك ءسۇت بەرمەيتىن سيىرلاردان شەلەكتەپ ءسۇت بەرەتىن اسىل تۇقىمدى سيىرلار الدەقايدا ارتىق. شارۋالاردىڭ «سىباعا» باعدارلاماسىنا قىزىعاتىندىعىنىڭ تاعى ءبىر سەبەبى، سەلەكتسيا جانە اسىل تۇقىمدى مال ساتىپ الۋعا مەملەكەت 1 باس ءۇشىن 154 مىڭ تەڭگە سۋبسيديا تولەيدى. تۇقىمدى تۇرلەندىرۋ ماقساتىندا 1 باسقا 18 مىڭ تەڭگە بولەدى. بىلاي ايتقاندا، مەملەكەتتىك قولداۋ شارۋالاردى ەكى جەپ بيگە شىعارىپ وتىر.

اباي-اقپارات