وقو اۋداندارىنىڭ شارۋاشىلىق ىڭعايى ءارتۇرلى بولىپ كەلەدى. مىسالى، بايدىبەك اۋدانىندا ءىرى ءوندىرىس ورنى بولماعانىمەن، اۋىل شارۋاشىلىعى قارقىندى دامىپ كەلەدى.

88 جىلدىق تاريحى بار، ءۇش رەت قۇرىلىپ، ەكى رەت تارقاپ، اتاۋى ءۇش رەت وزگەرگەن، سوڭعى رەت 1996 جىلى ەلباسى نۇرسۇلتان نازارباەۆ بايدىبەك اتا كەسەنەسىنە بارعان كەزدە مەملەكەت باسشىسىنىڭ ۇسىنىسىمەن بايدىبەك اتالعان اۋدان ورداباسىمەن كورشىلەس، شەكارالاس جاتىر. بىراق ەكەۋىنىڭ تىنىس-تىرشىلىگى ەكى باسقا. ورداباسىدا ءوندىرىس وشاقتارى ءجيى شوعىرلانسا، بايدىبەك اۋدانىندا مۇنداي ءىرى بىردە-ءبىر ءوندىرىس ورنى جوق. جەرگىلىكتى تۇرعىنداردىڭ نەگىزگى اينالىساتىن شارۋاسى — اۋىل شارۋاشىلىعى. تابيعاتى قاتال، جەلى ادۋىندى اۋداندا مال جانە ەگىن شارۋاشىلىعى جولعا قويىلعان.

اۋداننىڭ جۋىردا تاعايىندالعان جاڭا اكىمى باقىتبەك تاناگوزوۆ وتە بايسالدى، وقىعان-توقىعانى مول، ءىستىڭ كوزىن تابا بىلەتىن، تاجىريبەلى ازامات ەكەنىن العاشقى كەزدەسۋىندە-اق اڭعارتىپ ۇلگەردى. «قالامنىڭ ۇشىندا نايزانىڭ قۇدىرەتى، سۇسى بار دەيدى. قالاممەن كەرەمەت دۇنيەنى دە جازۋعا بولادى، ۇكىم دە جازۋعا بولادى». العاش تانىسقان ساتتە-اق ءوزىنىڭ وسىنداي ويىمەن بولىسكەن اۋدان باسشىسى جىلى جۇزىمەن اڭگىمەنى تومەندەگىدەي جالعادى.

— اۋدانعا باسشى بولىپ كەلە سالا تالداۋ جاسادىم. قاراجاتتىڭ 7,2 پايىزى، ياعني 648 ميلليون تەڭگەسى عانا جەرگىلىكتى بيۋدجەتتىڭ ۇلەسى ەكەن. بۇل — وتە تومەن كورسەتكىش. اۋىلدىق وكرۋگتەردىڭ اكىمدەرىن جيناپ، جەرگىلىكتى بيۋدجەتتىڭ كولەمىن كوتەرۋ ماسەلەسىن كۇن تارتىبىنە قويدىم. ەلدى كوركەيتۋ ءۇشىن جەرگىلىكتى تابىستىڭ ماڭىزى وراسان. قازىر دوتاتسيالى اۋدان ەسەپتەلەمىز، بىراق بولاشاقتاعى ماقسات — ءوزىن-ءوزى قامتاماسىز ەتە الاتىن اۋدان اتانۋ. ول ءۇشىن ينۆەستيتسيا تارتىپ، جاڭا ءوندىرىس ورىندارىن اشىپ، قايتا وڭدەۋ سالالارىن دامىتۋ اسا قاجەت، — دەيدى اۋدان باسشىسى باقىتبەك تولەنۇلى. 

Abai.kz