وقو اي سايىن اۋىلشارۋاشىلىق سالاسىنىڭ تىنىسىن اشقان جاڭا جوبالار ىسكە قوسىلادى. ماسەلەن، وقو ورداباسى اۋدانىندا تراكتور قۇراستىراتىن زاۋىتتىڭ ىسكە قوسىلعانىن حابارلاعان ەك.  بۇل وڭتۇستىك شارۋالارىنىڭ بەينەتتى تىرشىلىگىنە جاڭا لەپ سىيلاعانداي ەدى. اۋىلشارۋاشىلىق سەكتورى قارقىندى دامىعان وڭتۇستىك قازاقستان وبلىسىندا ەگىستىك القاپتارىنا ەندى ءوز تەحنيكالارى قولدانىلاتىن بولادى.

سونداي-اق، قازىرگى تاڭدا اتالعان زاۋىتتا قازىر 33 ادام بار جۇمىس ىستەپ جاتسا، تۇراقتى ىسكە كىرىسكەن جاعدايدا جۇمىسشىلار سانى 76-عا جەتەدى. جالاقىلارى 60-140 مىڭ تەڭگەنىڭ ارالىعىندا. بارلىعى دا اۋىلدىڭ ادامدارى. دانەكەرلەۋشى، ەلەكتريك دەگەن سەكىلدى ماماندار عانا شىمكەنتتەن قاتىناپ ىستەيدى. بۇل ماقساتتا زاۋىتتان كولىك قارالعان، تۇسكى استارى دا كاسىپورىن ەسەبىنەن.

بۇل ءوز كەزەگىندە وڭىردەگى جاڭا جۇمىس ورىندارىنىڭ اشىلۋىنا ءام ەڭبەك كۇشىنىڭ وسۋىنە دانەكەر بولادى. ءوڭىر حالقىن قۋانتقان جاڭالىقتىڭ شارۋالار ءۇشىن پايداسى مول ەكەنى ناق.

كاسىپورىننىڭ قۋاتتىلىعى جىلىنا ەكى مىڭ تراكتور قۇراستىرۋعا لايىقتالعان. تەحنيكالاردىڭ باعاسى 24-28 مىڭ اقش دوللارى ارالىعىندا. ساپاسى جاقسى، ىشىندە بار جاعداي جاسالعان، جەلدەتكىشىنە دەيىن بار. بۇزىلعان جاعدايدا سەرۆيس ورتالىعى جۇمىس ىستەيدى. ءۇش جىلعا دەيىن كەپىل بەرىلەدى. بۇزىلسا، قوسالقى بولشەكتەرىن اپارىپ، جوندەپ بەرەدى. زاۋىت وكىلدەرى تراكتوردىڭ نەگىزى ءۇش جىلعا دەيىن بۇزىلا بەرمەيتىنىن ايتىپ وتىر. الداعى ۋاقىتتا تراكتور كوپتەپ شىعارىلا باستاسا، ليزينگكە دە ساتۋ جوسپاردا بار ەكەن.

Abai.kz