110 مىڭ حالقى بار تۇلكىباس اۋدانى ەل تاۋەلسىزدىگىنىڭ 25 جىلدىعىن  ەرەكشە  قارسى الدى. اۋداندا سوڭعى ءبىر ايدا  20-عا جۋىق  الەۋمەتتىك نىسان  پايدالانۋعا بەرىلدى. بۇل تۋرالى «اباي اقپارات» پورتالى وقو اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

اۋداندا ەل تاۋەلسىزدىگىنىڭ 25 جىلدىعىنا تارتۋ رەتىندە حالىققا قاجەتتى تازا اۋىز سۋ بەرىلىپ،  شالعاي اۋىلداردا ءبىلىم مەن مادەني وشاقتارى،  دەنساۋلىق نىساندارى مەن تۇرعىن ۇيلەر بوي كوتەردى.  وركەنيەت ەلدەردەگىدەي   اۋىلدارعا اياق جولدار سالىنىپ، ىشكى كوشەلەر جوندەۋدەن ءوتتى.  حالىقتى جۇمىسپەن قامتىپ وتىرعان كاسىپورىندا قوسىمشا تسەحتار اشىلىپ، قاراپايىم سپورت الاڭشالارى  مەن اكىمشىلىك عيماراتى دا  ەل يگىلىگىنە بەرىلدى.

جاڭا نىسانداردىڭ اشىلۋىندا اۋدان  باسشىسى اۋەلحان تۇرعىمبەكوۆ  سوڭعى 25 جىلدا اتقارىلعان جۇمىستاردى تىلگە تيەك ەتتى.

سونىمەن قاتار، جاقىندا تۇركىستان جۇرتشىلىعى كوگىلدىر وتىنمەن قامتاماسىز ەتىلدى. حالىقارالىق ماڭىزى بار «بەينەۋ-بوزوي» ماگيسترالدى گاز قۇبىرىنىڭ شاراپاتىن كورۋشىلەر قاتارىندا تۇركىستاندىقتاردىڭ دا سانى ارتىپ كەلەدى. 

قۇرىلىسى 2015 جىلى باستالعان جوباعا وبلىستىق بيۋدجەت ەسەبىنەن جالپى قۇنى 1 ملرد. 120 ملن. تەڭگە بولىنگەن. قازىرگى تاڭدا شاھارداعى «ساۋران» ىقشام اۋدانىنا تولىعىمەن گاز تاراتۋ جۇيەلەرى جۇرگىزىلىپ، جەكە تۇرعىن ۇيلەرگە گاز كىرگىزۋ جۇمىستارى جالعاسۋدا. جوبا بويىنشا اتالعان ىقشام اۋدان اۋماعىنداعى 7500 ابونەنت تابيعي گازبەن قامتىلۋى ءتيىس بولسا، بۇگىنگى كۇنگە دەيىن 500-گە تارتا ابونەنتكە تابيعي گاز كىرگىزىلگەن. الداعى كۇندەرى قالعان ابونەنتتەردى گازداندىرۋ جۇمىستارى جالعاسىن تاپپاق.  

Abai.kz