ەلباسىنىڭ ۇلت جوسپارىندا كورەستىلگەن شاعىن جانە ورتا كاسىپكەرلدىكتى دامىتۋ، ءوندىرىس ورىندارىن اشۋ ماسەلەسى سوزاق اۋدانىندا وڭدى جولعا قويىلىپ كەلەدى. اۋداندا 3130-دان استام كاسىپكەرلىك سۋبەكتى جۇمىس ىستەيدى. جىل سايىن ورتا ەسەپپەن 270-كە جۋىق جاڭا سۋبەكتىلەر قوسىلىپ وتىرادى ەكەن. ونىڭ ىشىندە ساۋدا-ساتتىق، قىزمەت كورسەتۋ باعىتى باسىمداۋ.

اۋداندا ءوندىرىس از بولعاندىقتان، ورتا كاسىپكەرلىكتى دامىتۋ قيىن شارۋا. 110 شاقىرىم جەردە تۇركىستان قالاسى بار. وعان باراتىن جول دا اسفالت. تۇرعىندار قاجەتتى زاتتارىنىڭ بارلىعىن سول جاقتان الىپ كەلەدى. جەرگىلىكتى اكىمدىك كاسىپكەرلىكتى دامىتۋ ءۇشىن «قازاتومپروم» اق-ىنا قاجەتتى ونىمدەر وندىرۋگە باسىمدىق بەرۋدى ويلاستىرعان.

وسى ماقساتتا 50 گەكتار جەرگە يندۋستريالدى ايماق اشىپ، قازىردىڭ وزىندە وندا 4 جوبا جۇزەگە استى. بىرەۋى بوشكە شىعارسا، ەكىنشىسى ارماتۋرالانعان قۇبىر وندىرەدى. ءۇشىنشىسى تۇرمىسقا قاجەتتى قۇبىر، تاعى بىرەۋى اس تۇزىن وندىرەدى. اۋداندا تۇزدىڭ ۇلكەن كەن ورنى بار. قازىر تۇز ءوندىرۋ باستالدى. ول ارالتۇزدان كەم ەمەس. بەسىنشى جوبا – اۆتول، توسول مايىن قۇياتىن بوشكە وندىرەتىن زاۋىت. ون ايدىڭ قورىتىندىسىمەن 400 ميلليون تەڭگەدەن استام ءونىم وندىرىلگەن. ونداعى كاسىپورىنداردا 70-كە جۋىق ادام جۇمىس جاساۋدا. بەسىنشى زاۋىت ىسكە قوسىلسا تاعى 50 ادام جۇمىسپەن قامتىلماق.

Abai.kz