سوزاق – وڭتۇستىك قازاقستان وبلىسىنداعى ەڭ شالعاي جاتقان اۋدانداردىڭ ءبىرى. جەر كولەمى جاعىنان وبلىستىڭ ۇشتەن ءبىر بولىگىن الىپ جاتقان جاتقان اۋداننىڭ كوپ جەرى شولەيت بولىپ كەلەدى. سول سەبەپتى دە سوزاقتىڭ تابيعاتى مال شارۋاشىلىعىن دامىتۋعا قولايلى. ال، ەگىس كولەمى از. بار بولعانى 13 مىڭ عانا گەكتار. ونىڭ سۋارمالىسى 5 مىڭ گەكتار. تاۋەلسىزدىك العان جىلدارى اۋداندا ۋاق مالدىڭ ءوزى 500 مىڭعا جەتكەن. 1995-96 جىلدارى مال سانى ءۇش ەسەگە دەيىن تومەندەپ، سوڭعى 4-5 جىلدان بەرى مال باسى ورتا ەسەپپەن 2 پايىز كولەمىندە وسۋمەن كەلەدى. قازىر اۋداندا 260 مىڭعا جۋىق ۋاق مال، 27 مىڭنان استام ءمۇيىزدى ءىرى قارا، 10 مىڭ تۇيە، 12 مىڭ جىلقى بار. اۋداننىڭ جەر كولەمى 4 ميلليارد گەكتار بولسا، سونىڭ 3,5 ميلليونى جايىلىم ەسەپتەلەدى. 778 شارۋا قوجالىقتارىنىڭ پايدالانىپ وتىرعان جەرلەرى 950 مىڭداي گەكتاردى قۇرايدى. بۇل جايىلىمنىڭ 30 پايىزىن عانا پايدالانىپ وتىرعاندىعىن كورسەتەدى.

- وبلىستاعى تۇيەنىڭ 48 پايىزى سوزاقتا. سول سەبەپتى قىمىران ءوندىرۋدى دە جولعا قويۋ جوسپاردا بار. تۇيە شارۋاشىلىعىمەن اينالىساتىن ازاماتتاردىڭ باسىن قوسىپ، «ارۋانا» دەگەن كووپەراتيۆ قۇردىق. قازىر عيماراتىن دايىنداپ جاتىرمىز. «ىرىس» قارجى ۇيىمىنان 12 ميلليون تەڭگە نەسيە الىپ، ونىڭ 8 ميلليونىن قۇرال-جابدىقتار الۋعا جۇمسادىق. جىل سوڭىنا دەيىن ونى ورناتىپ، پاستەرلەنگەن قىمىران شىعارۋدى قولعا الۋىمىز قاجەت. اۋداندا جىلىنا 12 مىڭ توننا ءتىرى سالماقتا ەت، 14 مىڭ توننا ءسۇت وندىرەمىز. ەكى جەردەن مال سويۋ الاڭشاسىن اشتىق، - دەيدى سوزاق اۋدانىنىڭ اكىمى ماقسات يساەۆ.

مال شارۋاشىلىعىن دامىتۋعا بەل بايلاعان اۋداندا ۆەتەريناريا سالاسىنا دا ايرىقشا كوڭىل بولمەسكە بولمايدى. وسى ماقساتتا بيىلدىڭ وزىندە اۋداندا مال شومىلدىراتىن تيپتىك ءۇش اۋەت سالىندى. بۇل ءىس الداعى ۋاقىتتا دا جالعاسىن تاباتىن بولادى. ويتكەنى، ءار اۋىل وكرۋگكە ارنايى ورىن بەلگىلەنىپ، سمەتالىق قۇجاتتارىن دايىندالىپ قويىلىپتى. جىل سايىن 3-4 اۋەتتەن سالىنىپ وتىرسا، تولىق بىتىرۋگە بولادى ەكەن.

Abai.kz