ورداباسى اۋدانىندا اۋىلشارۋاشىلىعى ماقساتىنداعى تراكتور قۇراستىرىلاتىن بولدى دەگەن اقپارعا العاش كوپشىلىك ونشا يلانا قويماعان بولاتىن. بۇل دا ءبىر «جارناماسى جەر جارعانىمەن، جورگەگىندە تۇنشىعاتىن جوبا» دەپ ويلاعانىن نەسىنە جاسىرامىز. بىراق، بۇل ەرتەگى ەمەس ەكەن. «كازكيوتي» زاۋىتىنىڭ ءوندىرىس جونىندەگى جاۋاپتى قىزمەتكەرى نۇرلان ساتىبالديەۆ وڭتۇستىك كورەيالىق كومپانيامەن بىرلەسىپ ىسكە اسىرعان زاۋىتتىڭ قۇرىلعىلارىن كورەيالىق ماماندار ورناتىپ، قالاي جۇمىس ىستەۋ كەرەكتىگىن ۇيرەتىپ كەتكەنىن ايتتى. بۇل جاقتىڭ ماماندارى دا كورەياعا بارىپ، 2-3 اي سوندا وقىپ كەلگەن. زاۋىت ىسكە كىرىسكەلى بەرى 98 تراكتور قۇراستىرىپ، ساتىلعان. ازىرگە تراكتوردىڭ ءۇش ءتۇرلى ماركاسى قۇراستىرىلۋدا. ونىڭ ەڭ قۋاتى تومەنىنىڭ 60 اتتىق كۇشى بار بولسا، ودان كەيىنگىسى – 76 جانە 100 اتتىق كۇشى بار تەحنيكالار. «جاڭا جىلدان كەيىن 160 جانە 230 اتتىڭ كۇشى بار تەحنيكا قۇراستىرۋ جوسپارلانىپ وتىر. وسى ماقساتتا تۇركيا مەن رەسەيدەن قۇرىلعىلارعا تاپسىرىس بەرگەنبىز. ولار كەلسە، تەحنيكانىڭ ءتۇرى تاعى كوبەيەدى. تراكتورلارىمىز اۋىلشارۋاشىلىق جۇمىستارىنىڭ بارلىعىنا دا قولايلى، كەشەندى ەسەپتەلەدى. ءسۇت وندىرەتىن، قۇس فابريكالارى دا ارنايى تاپسىرىپپەن ىستەتتى. تۇركىستان، ماقتارال جاقتان تاپسىرىس كوپ»، - دەيدى نۇرلان ساتىبالديەۆ.

زاۋىتتا قازىر 33 ادام بار جۇمىس ىستەپ جاتسا، تۇراقتى ىسكە كىرىسكەن جاعدايدا جۇمىسشىلار سانى 76-عا جەتەدى. جالاقىلارى – 60-140 مىڭ تەڭگەنىڭ ارالىعىندا. بارلىعى دا اۋىلدىڭ ادامدارى. دانەكەرلەۋشى، ەلەكتريك دەگەن سەكىلدى ماماندار عانا شىمكەنتتەن قاتىناپ ىستەيدى. بۇل ماقساتتا زاۋىتتان كولىك قارالعان، تۇسكى استارى دا كاسىپورىن ەسەبىنەن.

كاسىپورىننىڭ قۋاتتىلىعى جىلىنا ەكى مىڭ تراكتور قۇراستىرۋعا لايىقتالعان. تەحنيكالاردىڭ باعاسى 24-28 مىڭ اقش دوللارى ارالىعىندا. ساپاسى جاقسى، ىشىندە بار جاعداي جاسالعان، جەلدەتكىشىنە دەيىن بار. بۇزىلعان جاعدايدا سەرۆيس ورتالىعى جۇمىس ىستەيدى. ءۇش جىلعا دەيىن كەپىل بەرىلەدى. بۇزىلسا، قوسالقى بولشەكتەرىن اپارىپ، جوندەپ بەرەدى. زاۋىت وكىلدەرى تراكتوردىڭ نەگىزى ءۇش جىلعا دەيىن بۇزىلا بەرمەيتىنىن ايتىپ وتىر. الداعى ۋاقىتتا تراكتور كوپتەپ شىعارىلا باستاسا ليزينگكە دە ساتۋ جوسپاردا بار ەكەن.

Abai.kz