وڭتۇستىك قازاقستان وبلىسى ەلباسىنىڭ «100 ناقتى قادام» - ۇلت جوسپارىنىڭ 94 قادامىندا ايتىلعان «اشىق ۇكىمەتتى» ەنگىزۋ جايلى تاپسىرماسىن رەسپۋبليكادا العاش بولىپ ىسكە اسىردى. بۇل تۋرالى «rgmedia.kz» سايتى حابارلايدى.

بۇل جوبا – «اشىق اكىمدىك» دەپ اتالدى. اتالعان جوبا اياسىندا تۇرعىندار مەن باسشىلار اراسىنداعى كەدەرگىلەر جويىلىپ، توسقاۋىلدار بولماۋى كەرەك. تۇرعىندار كەز-كەلگەن ماسەلەگە قاتىستى ارىز-شاعىمدارىن «اشىق اكىمدىك» قىزمەتى شەڭبەرىندە ىستەپ تۇرعان بايلانىس ورتالىقتارىنا حابارلاسىپ، جەتكىزە الادى. وسىعان وراي كوممۋنالدىق ماسەلەگە قاتىستى Call ورتالىعى اشىلعان بولاتىن. سوندا 3 اي ىشىندە  تۇرعىن ءۇي-كوممۋنالدىق شارۋاشىلىق ماسەلەلەرى بويىنشا بىرىڭعاي بايلانىس ورتالىعىنا 2420 تۇرعىننان ءتۇرلى ساۋالدار كەلىپ ءتۇسىپ، ءتيىستى شارالار اتقارىلعان. اتالعان سۇراقتاردىڭ 731-ءى جىلۋ ماسەلەسىنە قاتىستى بولسا، كوگىلدىر وتىن بويىنشا 238, ەلەكتر قۋاتىمەن قامتاماسىز ەتۋ ماسەلەسى نەگىزىندە 254, اۋىز سۋ بويىنشا 160, شىمكەنت قالالىق تۇكش بولىمىنە 238, شىمكەنت قالاسى اۋداندارىنىڭ اكىمدىكتەرىنە 413 حابارلاما جولدانعان. ال قالعان 386 ارىز-شاعىم وزگە دە جاۋاپتى مەكەمەلەرگە جىبەرىلىپ، تۇرعىنداردىڭ وتىنىشتەرى قاناعاتتاندىرىلعان.

بايلانىس ورتالىعىنىڭ ماماندارى بۇدان بىلاي تۋىنداعان بارلىق كوممۋنالدىق ماسەلەر جونىندە وبلىس بويىنشا وتىنىشتەر قابىلدايتىنىن ايتادى.

وڭىردەگى كوممۋنالدىق ماسەلەلەردى وڭتايلى شەشىپ، جۇمىستاردى جۇيەلەۋ ماقساتىندا بارلىق اۋدان، قالالارداعى جەرگىلىكتى گازەتتەردە بىرىڭعاي بايلانىس Call-ورتالىعىنىڭ 8(7252) 39-55-55 نومىرلەرى كورسەتىلگەن حابارلاندىرۋ جاريالاناتىن بولادى. سونداي-اق، بۇل ورتالىقتىڭ ءنومىرىن كوممۋنالدىق تۇبىرتەكتەردەن دە تابا الاسىز.

«اشىق اكىمدىك» اياسىندا وڭىرىمىزدەگى كەز-كەلگەن بايلانىس ورتالىقتارىنا حابارلاسا الاسىز. 

اباي اقپارات