سەيسەنبى, 16 شىلدە 2024
قۇيىلسىن كوشىڭ 6261 0 پىكىر 13 جەلتوقسان, 2016 ساعات 12:43

ىشكى ىستەر مينيسترلىگى جالعان اقپارات بەرگەن. نەگە؟

7 جەلتوقسان كۇنى "نۇر وتان" پارتياسىنىڭ رەسپۋبليكالىق قوعامدىق قابىلداۋ بولمەسىندە قر ىشكى ىستەر ءمينيسترى ق.قاسىموۆپەن وتكەن قابىلداۋعا 9 جاسار قىز مەيىرگۇل الماتى قالاسىنان كەلىپ، اتا-اناسىنىڭ ۆيزا مەرزىمى ءوتىپ كەتۋىنە بايلانىستى بەس جىلسىز كەلە المايتىن ەتىلىپ ەلدەن تىسقارى جەرگە شىعارىلعانىن، ءوزىنىڭ الماتىدا جالعىز قالعانىن ايتىپ، اكە-شەشەسىن قايتا ورالتۋ تۋرالى مينيستردەن كومەك سۇراعان بولاتىن.

وسى ماسەلەگە بايلانىستى، 8 جەلتوقسان كۇنى قر ىشكى ىستەر مينيسترلىگى مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋباەۆ قازاقپارات («inform.kz») ارقىلى تۇسىنىكتەمە بەرىپ، «... قازىرگى ۋاقىتتا ءىىم تاراپىنان ولاردىڭ قازاقستانعا كەلۋىنە ەشقانداي شەكتەۋ جوق. قحر-داعى قازاقستان رەسپۋبليكاسىنىڭ ەلشىلىگىندە ۆيزا راسىمدەگەن جاعدايدا ولار قازاقستانعا ەش كەدەرگىسىز كەلە الادى» دەپتى.

http://www.inform.kz/…/ministrlik-meyirgulge-ata-anan-viza-…

ال، بۇگىن ۇرىمجىدەگى مەيىرگۇلدىڭ اناسى ورالحانعا تەلەفون ارقىلى حابارلاسىپ ەدىك، ول بۇل مالىمەتتى جوققا شىعاردى.

مەيىرگۇلدىڭ اتا-اناسى قىتايعا بارعان سوڭ، ۇرىمجىدەگى قازاقستان كونسۋلدىعىنان 2016 جىلدىڭ 22 تامىزىنان باستاپ، 2017 جىلدىڭ 21 تامىزىنا دەيىن ءبىر جىلدىق قازاقستانعا ءوتۋ ۆيزاسىن العان. بىراق، كونسۋلدىق بازاداعى اكىمشىلىك جاۋاپقا تارتىلعان دەگەن مالىمەتكە سۇيەنىپ، ولاردىڭ ۆيزالارىنا «جويىلدى» دەگەن تاڭبا باسىپ تاستاعان. سول سەبەپتى ولاردىڭ قازاقستانعا قايتىپ كەلە الماي وتىرعانىن ايتادى. ونىڭ ۇستىنە، ورالحان ەكىنشى بالاسىنا جۇكتى ەكەن. قازاقستاندا بوسانعىسى كەلەتىنىن ايتىپ ول كومەك سۇراپ وتىر...

قازاقستان رەسپۋبليكاسىنىڭ ۇرىمجىدەگى كونسۋلدىعىمەن تەلەفون ارقىلى بايلانىسقا شىعىپ ەدىك، تىلدەسۋ مۇمكىن بولمادى.

"نۇر وتان" پارتياسى بۇل ماسەلەمەن ءالى دە اينالىسۋ ۇستىندە. ناتيجەسىن الداعى جەردە ارنايى جاريالايتىن بولامىز.

قازىر وسى اكىمشىلىك قۇقىق بۇزۋشىلىق جازاسىنا تارتىلىپ، مەيىرگۇل سەكىلدى تۋمالارىنان ءبولىنىپ قالعان جانداردىڭ سانى از ەمەس.

مىسالى، سەناتور مۇرات باقتيارۇلىنىڭ 6 قازاندا قر ىشكى ىستەر مينيسترلىگىنە دەپۋتاتتىق ساۋال جىبەرىپ انىقتاۋىنشا، 2015 جىلى جالپى 307 ەتنيكالىق قازاق ەلدەن تىس جەرگە شىعارىلىپتى. 
2016 جىلدىڭ العاشقى توعىز ايىندا 199 قانداسىمىز جازاعا تارتىلىپ، كەلگەن ەلىنە قايتارىلىپتى. 
ال، 2014 جىلعى كورسەتكىش بۇدان دا كوپ بولۋى مۇمكىن!

بۇرىن ءبىر مارتە اكىمشىلىك قۇقىق بۇزعان شەتەلدىك ازامات جازاعا تارتىلىپ، كوشىپ كەلگەن جاعىنا قايتارىلاتىن بولسا، وتكەن جىلى قايتا قابىلدانعان زاڭ جوباسىندا بۇل نورمانى بىرنەشە رەت بۇزعان جاعدايدا ەلدەن شىعارىلادى دەپ وزگەرتىلدى («حالىقتىڭ كوشى-قونى تۋرالى» زاڭنىڭ 49-باپ، 5-تارماعى).
سوعان قاراماستان، بيىلعى – 2016 جىلدىڭ العاشقى توعىز ايىندا 199 قانداسىمىزدىڭ جازاعا تارتىلىپ، كەرى قايتارىلۋى – جۇرتتى قاتتى الاڭداتىپ وتىر.

مىنە، قازاقستان تاۋەلسىزدىگىنىڭ 25 جىلدىعى مەرەكەسىنە وراي ۇلت كوشباسشىسى نۇرسۇلتان نازارباەۆتىڭ تاپسىرماسىمەن 30000 قىلمىسكەرگە راقىمشىلىق جاساۋ تۋرالى زاڭ جوباسى قابىلداندى.

سوندىقتان، قازاقستان رەسپۋبليكاسىنىڭ قر ىشكى ىستەر مينيسترلىگى دە 2013 جىلعى 10 جەلتوقساندا قابىلدانعان «كوشى-قون» زاڭىنىڭ تىم قاتاڭدىعىن ەسكەرە وتىرىپ، قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە سايكەس، كوشى-قون زاڭناماسىن بۇزعانى ءۇشىن، 2014 جىلدىڭ 1 قاڭتارىنان بەرى سوت شەشىمىمەن ەلدەن تىس جەرگە شىعارىلعان سول قانداستارىمىزعا دا ءبىر مارتە راقىمشىلىق جاساسا، وتە دۇرىس ءھام ساۋاپ ءىس بولار ەدى!

اۋىت مۇقيبەك

Abai.kz

0 پىكىر

ۇزدىك ماتەريالدار

اباي مۇراسى

اباي ىلىمىندەگى ءومىر ماقساتى نە؟

دوسىم وماروۆ 1226
وي تۇرتكى

المەرەك ابىزدىڭ ورالۋى - ەلگە ءدىننىڭ ورالۋى

باقتىباي اينابەكوۆ 1934
كورشىنىڭ كولەڭكەسى

رەسەي تىلدىك ءھام ساياسي ەكسپانسيانى قالاي جۇرگىزدى؟

بەيسەنعازى ۇلىقبەك 1974