ونەر نە ءۇشىن كەرەك؟ اۋادا قالقىپ جۇرگەن، كوپتى تولعاندىراتىن، بىراق فورماسىن تاپپاعان ويلاردى، ءتيىستى فورماسىنا سالىپ،"شەكپەن جاۋىپ" وزىنە قايتارۋ ءۇشىن. كەيدە.

الماتىداعى (مودنىي) "اRTيشوك" تەاترىنىڭ "ۇيات" دەگەن دراماسىن (ناكونەتس-تو) كورىپ سونى ويلادىق. سپەكتاكلدە ءبىز كەلىسەتىن جانە كەلىسپەيتىن كوپ ويلار ايتىلدى. بىراق نەگىزگى ارقاۋى - "ۇيات پەن ناداندىقتى شاتاستىرىپ العان" (ا.سارىم) قازاقتىڭ مىنەزدەرى. العاشقى اسەر - تاقىرىپ تولىق اشىلمادى. دەگەنمەن. بۇگىنگى كۇن تۋرالى كوپ قويىلىمداردان ايىرماشىلىعى - ايىپتاۋ جوق. "زامان تۋرالى ايتامىز" دەپ شاقىرىپ الىپ، ەكى ساعات بويى اقىل ايتىپ شىعارىپ سالاتىن اكادەميالىق تەاترلار سياقتى ەمەس. بىزدە اۆتورلار تەاترعا كەلگەن ادامدى تاربيەلەپ جىبەرۋگە، پوزيتسياسىن استارلاپ ەمەس، تەپسىنىپ تۇرىپ قاق شەكەدەن قويىپ قالۋعا شەبەر عوي. پروبلەمانى ايتىپ تۇرىپ، كوسەمسوزگە ۇرىنباعان، پافوس پەن پاتەتيكانىڭ سالقىنى تيمەگەن شىعارمانى كەزدەستىرۋ نەكەن-ساياق.
"ۇياتتا" قوعامدى زەرتتەۋ، ساراپتاما جاساۋعا ۇمتىلىس بار. اۋىلدىڭ قازاعىنا سىرت كوزبەن قارايدى، قالانىڭ قازاعىنا يرونياسى بار. ەكەۋىن ءبولىپ تۇرعان تەمىر شارباعى بار. ناتيجەسىندە بۇگىنگى يۋ-قيۋ، ءبىر-بىرىمەن قابىسپايتىن، بولەك تىلدەردە سويلەيتىن، بولەك الەمدەردە ءومىر سۇرەتىن قازاقتاردىڭ (قازاقستاندىقتاردىڭ) بولمىسى تۋرالى شىنايى قويىلىم كوردىك. 

سوندىقتان دا ونىڭ (ارزان ەمەس) بيلەتتەرى ەكى اپتا بۇرىن ساتىلىپ كەتەدى.

دراماتۋرگتەرگە (پروزاشىلارعا دا) جاقۇت سىرعا. ءوزىمىز تۋرالى ءجىبى ءتۇزۋ قويىلىم كورۋ ءۇشىن ۋكراينادان دراماتۋرگ شاقىرتۋ مىندەت ەمەس شىعار. جان-جاقتارىڭىزعا قاراساڭىزدارشى. نەبىر وقيعا بولىپ جاتىر عوي. "ۇيات" ونىڭ بىرەۋىن عانا ايتىپ تۇر. ء"سابيىن تۋالەتكە تاستاپ كەتەتىن انالار قايدان شىقتى؟". "ەل ءبىلىپ قويماسىن" دەگەن كوربىلتەلىكتەن" دەيدى. جالعىز شىندىق وسى بولماۋى مۇمكىن. ءوز پىكىرىڭىزدى ۇسىنىڭىز. سەندىرە الساڭىز. ال "ۇياتتىڭ" جاعدايىندا زەرتتەۋگە دەگەن تالپىنىس قۇندى.
ويتكەنى بۇگىنگى ادامدار تۋرالى اۋەزوۆپەن، گوگولمەن عانا ەمەس، ءوز زامانداسىڭمەن پىكىرلەسكىڭ كەلەدى. كەيدە.

ءاسيا باعداۋلەتقىزى

Facebook-تەگى پاراقشاسىنان