2026 جىلعى 29 ساۋىردە الماتى قالاسىنداعى «اۋەزوۆ ءۇيى» عىلىمي-مادەني ورتالىعىندا «احمەت جۇبانوۆ جانە قازىرگى زامانداعى مۋزىكاتانۋ عىلىمى» تاقىرىبىندا حالىقارالىق عىلىمي-تاجىريبەلىك كونفەرەنتسيا ءوتتى. اتالعان ءىس-شارا كورنەكتى كومپوزيتور، ديريجيور، مۋزىكالىق ونەر سالاسىنداعى تۇڭعىش اكادەميك، سونداي-اق قازاق كسر عىلىم اكادەمياسىنىڭ نەگىزىن قالاۋشىلاردىڭ ءبىرى احمەت جۇبانوۆتىڭ تۋعانىنا 120 جىل تولۋىنا ارنالدى.

سۋرەت: شارا ۇيىمداستىرۋشىلارىنان الىندى.

ءىس-شارانى م.و.اۋەزوۆ اتىنداعى ادەبيەت جانە ونەر ينستيتۋتى تۇركى مادەنيەتى جانە مۇراسى قورىنىڭ، قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ، قازاقستان رەسپۋبليكاسى مادەنيەت جانە اقپارات مينيسترلىگىنىڭ، قازاقستان رەسپۋبليكاسى پرەزيدەنتى جانىنداعى ۇلتتىق عىلىم اكادەمياسىنىڭ جانە ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ قولداۋىمەن ۇيىمداستىردى.
كونفەرەنتسياعا عىلىمي جانە مادەني ورتا وكىلدەرى قاتىستى. اشىلۋ سالتاناتىندا قازاقستاننىڭ مەملەكەتتىك قايراتكەرلەرىنىڭ قۇتتىقتاۋ حاتتارى وقىلدى. قاتىسۋشىلارعا قازاقستان رەسپۋبليكاسى پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا، عىلىم جانە جوعارى ءبىلىم ءمينيسترى ساياسات نۇربەك، سونداي-اق ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ قۇتتىقتاۋ ءسوز سويلەدى.

سۋرەت: شارا ۇيىمداستىرۋشىلارىنان الىندى.

ءىس-شارا اياسىندا قۇرمەتتى قوناق رەتىندە تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا ءسوز سويلەپ، كومپوزيتوردىڭ مۇراسى تەك قازاق حالقىنىڭ عانا ەمەس، بۇكىل تۇركى الەمىنىڭ ورتاق رۋحاني بايلىعى ەكەنىن اتاپ ءوتتى. ول كورنەكتى قازاقستاندىق كومپوزيتور عازيزا جۇبانوۆانىڭ شاكىرتى بولعانىن ماقتان تۇتاتىنىن ايتىپ، ۇستاز بەن شاكىرت اراسىنداعى وسى بايلانىس ءوزىنىڭ شىعارماشىلىق جولىندا باعىت-باعدار بولعانىن جەتكىزدى. سونداي-اق ول احمەت جۇبانوۆ كاسىبي قازاق مۋزىكاسىنىڭ نەگىزىن قالاعان، تۇركى حالىقتارىنىڭ مادەني ساباقتاستىعىن تەرەڭ تۇسىنگەن جانە وسى ورتاق مۇرانى كەلەر ۇرپاققا جەتكىزگەن كورنەكتى تۇلعا ەكەنىن اتاپ ءوتتى.
اشىلۋ سالتاناتىندا سونداي-اق م.و. اۋەزوۆ اتىنداعى ادەبيەت جانە ونەر ينستيتۋتىنىڭ باس ديرەكتورى كەنجەحان ماتىجانوۆ، قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ديرەكتورى مەدەت قۋانىشەۆ، قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى گاۋحار تاسبەرگەنوۆا جانە تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى ارمان جۇدەباەۆ ءسوز سويلەپ، مەرەيتوي يەسىنىڭ وشپەس مۇراسى تۋرالى ايتتى.
پلەنارلىق وتىرىس بارىسىندا احمەت جۇبانوۆتىڭ عىلىمي جانە كومپوزيتورلىق قىزمەتىنە ارنالعان باياندامالار تىڭدالىپ، ونىڭ مۇراسىنا قاتىستى جاڭا باسىلىمداردىڭ تۇساۋكەسەرى ءوتتى.
ءىس-شارا «وسكەن ونەر» اتتى ارنايى كونتسەرتتىك باعدارلامامەن جالعاسىن تاپتى. باعدارلاما اياسىندا «اباي» وپەراسىنان اريالار مەن كومپوزيتوردىڭ باسقا دا كلاسسيكالىق شىعارمالارى ورىندالدى.
حالىقارالىق كونفەرەنتسياعا ازەربايجان، قىرعىزستان، وزبەكستان جانە رەسەي ەلدەرىنەن كەلگەن مامانداردىڭ قاتىسۋى جۇبانوۆ مۇراسىنىڭ قازىرگى ونەرتانۋداعى ماڭىزىن كەڭ گەوگرافيالىق اۋقىمدا تالقىلاۋعا مۇمكىندىك بەردى.

Abai.kz