"اشىق اكىمدىك" جوباسى اياسىندا مۇمكىندىگى شەكتەۋلى ازاماتتار ۇيدەن شىقپاستان قۇجات تولتىرىپ، ورتالىق قىزمەتىنە جۇگىنە الادى. جىلدىڭ باسىنان وڭتۇستىك قازاقستان وبلىسىندا مۇمكىندىگى شەكتەۋلى 230 تۇرعىن مەملەكەتتىك قىزمەتتەردى ۇيلەرىنەن شىقپاستان الدى. وبلىس بويىنشا 275 مەملەكەتتىك قىزمەت ءتۇرى ۇيگە بارا وتىرىپ كورسەتىلدى.

وتىنىمدەردىڭ باسىم بولىگى تۇركىستان، كەنتاۋ جانە شىمكەنت قالالارىنان كەلىپ ءتۇستى. مامانداردىڭ ايتۋىنشا جالپى وڭتۇستىك قازاقستان وبلىسى بويىنشا 1, 2 توپتاعى 52 260 مۇمكىندىگى شەكتەۋلى ازاماتتار مەملەكەتتىك قىزمەتتەردى ءۇي جاعدايىندا الۋ مۇمكىندىگىنە يە ەكەن.  مۇگەدەكتەرگە ءۇي جاعدايىندا قىزمەت كورسەتۋ ماسەلەسى حقكو وبلىستىق فيليالىنىڭ وكىلدەرى جانە مۇگەدەكتەردى وڭالتۋ ورتالىعىنىڭ وكىلدەرىنىڭ قاتىسۋىمەن  وتكەن دوڭگەلەك ۇستەل بارىسىندا تالقىلانىپ، قولعا الىنعان.

«وبلىستاعى مۇمكىندىگى شەكتەۋلى ازاماتتارىمىز مەملەكەتتىك قىزمەتتەردى ەشقانداي توسقاۋىلسىز الۋىنا بارلىق مۇمكىندىكتەردى قاراستىرۋدامىز. حقكو-لارعا «كەدەرگىسىز» كىرۋ ءۇشىن پاندۋستار مەن شاقىرۋ باتىرمالارى ورناتىلعان. 1, 2 – توپتاعى مۇگەدەكتەرگە ۇيلەرىنە بارىپ، ەستۋ قابىلەتى ناشار ازاماتتارعا SMS كومەگىمەن قىزمەت كورسەتۋدەمىز.سونىمەن قاتار، مۇگەدەكتەردىڭ كومپيۋتەرلىك ساۋاتىن اشىپ، كورسەتىلەتىن قىزمەتتى ءوز ىڭعايىنا قاراي پايدالانا الۋى ءۇشىن ەلەكتروندى ۇكىمەت پورتالىمەن جۇمىس ىستەۋدى ۇيرەتۋدەمىز. ۇيدە كورسەتىلەتىن قىزمەتتەردىڭ ىشىندە مەكەنجاي انىقتامالارى، جىلجىمايتىن مۇلكىنىڭ جوق/بار ەكەندىگى تۋرالى انىقتاما، زەينەتاقى اۋدارىمدارى تۋرالى انىقتامالار كوپ سۇرانىمعا يە. سول سياقتى مەملەكەتتىك تۇرعىن ءۇي قورىنان تۇرعىن ۇيگە مۇقتاج ادامداردى ەسەپكە الۋ جانە كەزەككە قويۋ، تولقۇجاتتار مەن جەكە كۋالىكتەر رەسىمدەۋ جانە تۇرعىلىقتى جەرى بويىنشا تىركەۋ سياقتى قىزمەتتەرگە دە سۇرانىستار تۇسەدى.» - دەيدى «حقكو» رمك وڭتۇستىك قازاقستان وبلىسى بويىنشا فيليالىنىڭ مۇمكىندىگى شەكتەۋلى ازاماتتاردىڭ ۇيىنە بارىپ قىزمەت كورسەتۋ، قىزمەتىن قاداعالاۋعا جاۋاپتى قىزمەتكەر داۋرەن ماۋلەنوۆ.

«حقكو- نىڭ ۇسىناتىن بارلىق مەملەكەتتىك قىزمەتتەرىن ۇيىنەن شىقپاي-اق الۋ ءۇشىن «1414»  بىرىڭعاي بايلانىس ورتالىعىنا قوڭىراۋ شالساڭىز بولادى. وسىلايشا ءسىز قاجەتتى مەملەكەتتىك قىزمەتتەر تۋرالى كەڭەس الىپ، وزىڭىزگە كەرەكتى مەملەكەتتىك قىزمەتكە تاپسىرىس بەرە الاسىز. وسىدان كەيىن حقكو قىزمەتكەرلەرى سىزگە حابارلاسىپ، مەملەكەتتىك كورسەتىلەتىن قىزمەتتى الۋ ءۇشىن قاجەتتى قۇجاتتار تىزبەسىن ۇسىنادى جانە بارۋ ءۇشىن قولايلى ۋاقىتتى بەلگىلەيدى. بۇل ۇدەرىس 72 جۇمىس ساعاتى ىشىندە جۇزەگە اسىرىلادى.

اباي اقپارات