بيىل قازاقستاننىڭ تاۋەلسىزدىك العانىنا 25 جىل تولدى. وسى قىسقا مەرزىم ىشىندە قازاقستان كوپتەگەن شارۋالاردى تىندىرىپ، الەمگە تانىلىپ ۇلگەردى. بۇل تۋرالى «rgmedia.kz» سايتى حابارلايدى.

 كەلەسى جىلى الماتى، استانادا بۇكىل الەمنىڭ نازارى اۋاتىن ۋنيۆەرسيادا جانە EXPO كورمەسى وتەدى. اتالعان شارالارعا الەمنىڭ تۇكپىر-تۇكپىرىنەن ءجۇز مىڭداعان دەلەگاتسيا، ءار سالانىڭ ماماندارى، تۋريستەر كەلەدى. ولار سوندا قازاقستانمەن تەرەڭىرەك تانىسادى. قازاقستاننىڭ دامۋ كورسەتكىشىنە باعا بەرەدى. ولار تەك، الماتى، استانا قالالارىمەن شەكتەلىپ قالماي، بۇكىل قازاقستاندى ارالايدى. سەبەبى، تۋريستەر كوپ كەلەدى. ولار قازاقستاننىڭ بارلىق جەرىن ارالاعاندى قۇپ كورەدى. شەتەل تۋريستەرىنىڭ وڭتۇستىك قازاقستان وبلىسىنا كەلۋ مۇمكىندىگى وتە جوعارى. سەبەبى، وقو ورتالىعى – شىمكەنت قالاسى قازاقستانداعى ءۇشىنشى مەگاپوليس. مىنە، وسى سەبەپتى دە، وڭتۇستىك قازاقستان وبلىسىندا ەلباسىنىڭ «100 ناقتى قادام» - ۇلت جوسپارىنىڭ 94 قادامى اياسىندا «اشىق اكىمدىك» جوباسى ىسكە استى. «اشىق اكىمدىك» جوباسى اياسىندا اۋدان، قالا اكىمدەرىنىڭ رەسمي سايتتارى توپتاستىرىلىپ، وقو اكىمدىگىنىڭ رەسمي سايتىنىڭ شەڭبەرىنە كىردى. سايتتار ارقىلى وبلىس تۇرعىندارى مەن بيلىك وكىلدەرى تىعىز بايلانىس ورناتتى. دەگەنمەن، وسى سايتتاردى كوپ ادام بىلە بەرمەۋى مۇمكىن. قايدا شاعىمدانارىن بىلمەگەن ادام نە ىستەرىن بىلمەيدى. شاعىمدانباعان سوڭ، كوپتەگەن ماسەلەلەر شەشىلمەي قالىپ جاتادى.

قازىرگى تاڭدا شىمكەنت قالاسىندا «Green Bus» جشس اۆتوبۋستارىندا ورناتىلعان ەكرانداردا www.shymkent.gov.kz سايتىن قالا تۇرعىندارىنا كەڭىنەن ناسيحاتتاۋدا. ەگەر اۆتوبۋسقا وتىرساڭىز، ءسىز قالا اكىمىنىڭ رەسمي پاراقشاسىن ناسيحاتتايتىن بەينەروليكەردەن بولەك، قالالىق ىشكى ساياسات ءبولىمىنىڭ تاپسىرىسىمەن تۇسىرىلگەن بەينەماتەريالداردى تاماشالاي الاسىز. بۇل بەينەماتەريالداردا قالادا اتقارىلىپ جاتقان جۇمىستار جايلى، سەنىم تەلەفوندارىنا قالاي بايلانىسۋعا بولاتىنى جونىندە اقپاراتتار بەرىلەدى.

قالا اكىمىنىڭ رەسمي سايتىنا كىرىپ، ءسىز تالاپ-تىلەكتەرىڭىزدى قالدىرا الاسىز. مۇندا «اشىق اكىمدىك» جوباسىن ىسكە اسىرۋعا باعىتتالعان حالىقتىق باقىلاۋ، قالا اكىمىنىڭ ۆيرتۋالدى قابىلداۋ بولىمدەرى جۇمىس ىستەيدى. سونداي-اق، ارنايى «اشىق اكىمدىك» تەتىگىن باسىپ، ونلاين كونفەرەنتسيا ارقىلى دا سۇراقتار قويا الاسىز. 

اباي اقپارات