وڭتۇستىك قازاقستان وبلىسى شارۋالارىنىڭ سوڭعى جىلدارى جەردى ءتيىمدى يگەرىپ، يەسىز جەرلەردى كادەگە اسىرىپ، ەڭبەك ونىمدىلىگىن ارتتىرا باستاۋى كوڭىل قۋانتادى.

جالپى اۋىلدى رەفورمالاۋ باستالعالى بەرى ازاماتتاردىڭ كوزقاراسى وزگەرىپ، ولار نارىقتىق ەكونوميكانىڭ جاعدايلارىنا كوندىگە باستادى. اۋىل شارۋاشىلىعى ءوندىرىسى ماسەلەلەرىن دەربەس شەشەتىن ناعىز جەر يەسى پايدا بولدى. وزدەرىنىڭ پايلارى مەن ۇلەستەرىن العان جاڭا مەنشىك يەلەرى دەربەس شارۋا قوجالىقتارىن قۇرىپ، قالاۋلارىمەن وندىرىستىك كووپەراتيۆتەرگە، اكتسيونەرلىك قوعامدارعا جانە ءتۇرلى سەرىكتەستىكتەرگە بىرىكتى. ناتيجەسىندە، 1999 جىلدىڭ اياعىندا بۇرىنعى 182 ۇجىمشار-كەڭشار جانە مەملەكەتتىك شارۋاشىلىقتار بازاسىندا جەكەمەنشىككە نەگىزدەلگەن 20,0 مىڭنان استام اۋىل شارۋاشىلىعى قۇرىلىمى پايدا بولدى. بۇگىنگى كۇنگە ولاردىڭ سانى 70,0 مىڭنان استى. بۇل باسقا وڭىرلەرگە قاراعاندا ەڭ جوعارى كورسەتكىش. بۇگىنگى كۇنى سولتۇستىك قازاقستان وبلىسى دا استىقتى ءوڭىر رەتىندە وڭتۇستىك قازاقستان وبلىسىندا جەدەل دامىپ جاتقان اۋىل شارۋاشىلىعى سالاسىنىڭ تاجىريبەلەرىن وزدەرىنە ۇلگى ەتۋدە. 

ايتا كەتەر جايت ەگىن شارۋاشىلىعى بويىنشا جۇرگىزىلگەن جۇيەلى ءارتاراپتاندىرۋدىڭ ارقاسىندا 1991 جىلمەن سالىستىرعاندا مايلى داقىلداردىڭ ەگىس كولەمى 73,0 مىڭ گا، باقشا 49,0 مىڭ گا، كوكونىس 27,0 مىڭ گا، كارتوپ 9,0 مىڭ گا ارتىپ، ەگىس كولەمىمەن قاتار الىنعان ءونىم كولەمى دە وڭىردە ەسەلەنە تۇسكەن. 1991 جىلى وبلىستا 163,4 مىڭ توننا كوكونىس، 127,0 مىڭ توننا باقشا ونىمدەرى، 50 مىڭ توننا كارتوپ وندىرىلسە، بيىلعى جىلى 913,0 مىڭ توننا كوكونىس، 1379,0 مىڭ توننا باقشا داقىلدارى، 260,0 مىڭ توننا كارتوپ جينالدى. وڭىردەگى شارۋالار دا ەل سەنىمىن اقتاعاندارىنا ءدان ريزا!

Abai.kz