وڭتۇستىك قازاقستان وبلىسىندا اۋىلشارۋاشىلىعى سالاسىنىڭ دامۋى قارقىندى تۇردە جۇرگىزىلىپ كەلەدى. اتالمىش وڭىردە ەگىس كولەمىن ۇلعايتۋ، يەسىز جەرلەردى يگەرۋ، زاماناۋي تەحنولوگيامەن تامشىلاتىپ سۋارۋ ءادىسىن كەڭىنەن ەنگىزۋ، جىلىجايلار سالۋ، باۋ-باقشالاردى كوبەيتۋ، جەردى ءتيىمدى يگەرۋ بويىنشا ايتارلىقتاي جۇمىستار جۇرگىزىلۋدە.

وڭتۇستىك قازاقستان وبلسىندا 1991 جىلى جەمىس-جيدەك جانە جۇزىمنەن 60,9 مىڭ توننا ءونىم الىنعان بولسا، بيىل ونىمدىلىگى جوعارى 2100 گا ينتەنسيۆتى باۋلار ەسەبىنەن 198,0 مىڭ توننا ءونىم جيناۋ كۇتىلۋدە. سونىمەن قاتار، بيىل 470 مىڭ توننا استىق جينالدى. بۇل تاۋەلسىزدىك كەزەڭىندەگى ەڭ ۇلكەن رەكوردتىق كورسەتكىش. رەسپۋبليكا حالقىن قىس جانە ەرتە كوكتەم مەرزىمدەرىندە ساپالى كوكونىس ونىمدەرىمەن قامتاماسىز ەتۋ ماقساتىندا جىلىجايلار سالۋ ءىسى قولعا الىنىپ، بۇگىندە ولاردىڭ كولەمى 1 112 گا جەتتى، بۇل رەسپۋبليكاداعى بارلىق جىلىجايلاردىڭ 87 پايىزىن قۇرايدى.

وسى جىلىجايلاردا سارىاعاش، قازىعۇرت اۋداندارىندا باسقا ونىمدەرمەن بىرگە العاش رەت تسيترۋس تۇقىمداس ليمون ءوسىرۋ قولعا الىندى. سونىڭ ىشىندە ورداباسى اۋدانىنىڭ دا بۇل كورسەتكىشكە قوسار ۇلەسى زور. ماسەلەن بيىلعى جىلى 1437 گەكتار جەرگە كۇنباعىس ەككەن ورداباسىلىق شارۋالار 14,5 تسەنتنەر ءونىم الىپ، 2081 توننا ءونىم جيناعان. سونداي-اق 3315 گەكتار جەرگە كوكونىس ەگىپ، 207 تسەنتنەردەن ءونىم الىپ، 68650 توننا ءونىم جينالعان. بۇل تاۋەلسىزدىكتى ەڭ العاش العان تۇستاعى كورسەتكىشپەن سالىستىرساق اۋىز تولتىرىپ ايتارلىقتاي كورسەتكىش دەۋگە بولادى.

Abai.kz