وڭتۇستىك وڭىردەگى ماقتانىڭ باسىم بولىگىن وسىرەتىن ماقتارالدا بيىل تەرىم جۇمىسى جىلداعىعا قاراعاندا ءبىرشاما ەرتە باستالىپ، ءساتتى اياقتالدى. ءا دەمەي-اق، اپپاق شاعالاداي بولىپ اشىلا باستاعان "اق التىن" القاپتارىندا بەلدەرىنە اق فارتۋكتارىن بايلاعان تەرىمشىلەر ناۋقاندىق جۇمىسقا بىلەك سىبانا كىرىسىپ، ەگىندى دەر كەزىندە شاشپاي توكپەي جيناپ الدى.

ۇستىمىزدەگى جىلى ماقتارالدىقتار 83 مىڭ گەكتارعا ماقتا ەگىپ، ودان 200 مىڭ توننا ءونىم جيناۋدى باستى ماقسات ەتكەن ەدى. ديحاندار ءۇشىن وسىناۋ مول بايلىقتى كۇزگى جاۋىن شاشىنعا ۇرىندىرماي دەر كەزىندە ىسىراپسىز جيناپ الۋ باستى شارۋا ەكەنى بەلگىلى. وسىناۋ اسا ماڭىزدى جاۋاپتى ناۋقان كەزىندە اۋدان اكىمدىگى مەن قازاق ماقتا شارۋاشىلىعى عىلىمي زەرتتەۋ ينستيتۋتىنىڭ ۇيىمداستىرۋىمەن "ماقتا شارۋاشىلىعىن دامىتۋ جانە جيىن تەرىمگە دايىندىق ماسەلەلەرى بويىنشا" سەمينار كەڭەس ءوتتى. مۇنداي جيىنداردىڭ باستى ارتىقشىلىعى ديحانداردىڭ جەردى يگەرۋ، ءونىم كولەمىن ارتتىرۋ، سوڭعى زاماناۋي جەتىستىكتەردى پايدالانۋ سەكىلدى جاڭالىقتارمەن قارۋلانۋىنا جول اشادى. 

شارۋالار وسىعان دەيىن اتالمىش ينستيتۋتتىڭ ەكسپەريمەنتالدى ماقتالىق القابىندا بولىپ، ءتۇرلى ماقتا سورتتارىنىڭ سالىستىرمالى ءوسۋ دەڭگەيىمەن، ءونىم قورلاندىرۋ پروتسەسىمەن تانىستى. ءار سەگىز جۇيەككە بولەك بولەك ەگىلگەن ماقتا قوزالارىن ءار ءتۇرلى مولشەردە كەشەندى تىڭايتقىشتارمەن ۇستەپ قورەكتەندىرۋ ناتيجەسىندە مول ونىمگە نەگىز قالانعانىن كوزبەن كورۋگە بولادى. ماسەلەن "ماقتاارال-4017" سورتىنا ەگۋ، شاناقتاۋ گۇلدەۋ كەزدەرىندە نيتروموفوس پەن اممياك سەليتراسى ۋاقىتىلى نورماعا ساي بەرىلگەن كەزدە ءار ءتۇپ قوزا 25-30 كوسەككە دەيىن ءونىم سالعان. ديحاندارعا وتكىزىلەتىن مۇنداي ماماندار كەڭەسىنىڭ ماڭىزى زور! سوندىقتان جەرگىلىكتى شەنەۋنىكتەر ديحاندارعا ارناپ مۇنداي كەڭەس سەمينارلاردى ءجيى وتكىزەدى. بيىلعىداي رەكوردتى كورسەتكىشكە مۇنداي شارالاردىڭ ماڭىزى زور سەكىلدى. 

Abai.kz