ەلباسى تاپسىرماسىمەن وڭتۇستىك قازاقستان وبلىسىندا جۇزگە اسقان «اشىق اكىمدىك» جوباسى وڭ ناتيجەسىن بەرۋدە. بۇل تۋرالى «rgmedia.kz» سايتى حابارلايدى.

اتالعان باعدارلاما شەڭبەرىندە وڭىرىمىزدە اتقارىلىپ جاتقان قىرۋار تىرلىك ونلاين تۇردە كەڭىنەن ناسيحاتتالىپ جاتىر. وڭىرىمىزدەگى وڭ وزگەرىستەر تۋرالى ناقتى اقپاراتتاردى ونلاين رەجيمدە وقو اكىمدىگىنىڭ رەسمي سايتىنان، ءتۇرلى الەۋمەتتىك جەلىدەگى پاراقشالارىنان بىلە الاسىزدار. وقو اكىمدىگىنىڭ Ontustik_derek اتاۋىمەن تىركەلگەن ينستاگرام جەلىسىندەگى رەسمي پاراقشاسىندا وڭىرىمىزدەگى اۋىز سۋعا قاتىستى اتقارىلعان جۇمىستار تۋرالى اقپاراتتار بەرىلدى.

الەمدەگى ەڭ دامىعان 30 مەملەكەتتىڭ قاتارىنا قوسىلىپ، باي دا قۋاتتى ەلدەرمەن يىق ءتۇيىستىرۋ ءۇشىن ءبىز ەڭ الدىمەن وڭىرلەردەگى كوممۋنالدىق ماسەلەلەردى وڭتايلى شەشۋىمىز قاجەت. ەلباسى كەزەكتى جولداۋىندا جاھاندىق داعدارىس، ەكونوميكانىڭ دامۋى ماسەلەلەرىنە توقتالدى. بۇل رەتتە ءبىز العا قويعان ماقساتتارىمىزعا جەتۋ ءۇشىن بىرلەسە قىزمەت اتقارۋىمىز ماڭىزدى.

ماسەلەن، «وڭىرلەردى دامىتۋ 2020 جىلعا» دەيىنگى باعدارلاماسىنا سايكەس وبلىس ەلدى مەكەندەرىن ساپالى اۋىز سۋمەن قامتاماسىز ەتۋ ماقساتىندا 2015 جىلى 31 اۋىز سۋ نىسانىنىڭ قۇرىلىسى ءجۇرىپ، 13 نىساننىڭ قۇرىلىسى پايدالانۋعا بەرىلدى. ال قالعان 18 نىساننىڭ قۇرىلىسى 2016 جىلعا وتپەلى. ناتيجەسىندە وبلىس كولەمىندەگى 929 ەلدى مەكەننىڭ 676-ى ەلدى مەكەنى ياعني 72,8 % ورتالىقتاندىرىلعان سۋ قۇبىرىمەن قامتاماسىز ەتىلدى.

ال 2016 جىلى 28 سۋمەن جابدىقتاۋ جانە سۋ بۇرۋ نىساندارىن ىسكە اسىرۋعا وبلىستىق بيۋدجەتتەن 6,9 ملرد.تەڭگە قاراستىرىلىپ، سۋ قۇبىرى مۇلدەم جوق 7 ەلدى مەكەنگە (5,6 مىڭ حالىق) جاڭا اۋىز سۋ قۇبىرلارىنىڭ قۇرىلىسى جۇرگىزىلىپ، پايدالانۋعا بەرىلەدى. سونىمەن قاتار، 14 ەلدى مەكەندەگى (59,5 مىڭ حالىق) توزىعى جەتكەن اۋىز سۋ جۇيەلەرى جاڭارتىلاتىن بولادى. ناتيجەسىندە، وبلىستاعى 927 ەلدى مەكەنىندەگى 2,371 ملن. ادامدى ورتالىقتاندىرىلعان سۋ قۇبىرىمەن قامتاماسىز ەتۋ جوسپارلانۋدا. 

Abai.kz