كەشە جالپىۇلتتىق تەلەكوپىر بارىسىندا ەلباسى نۇرسۇلتان ءابىشۇلى ءساندى اياقكيىم شىعاراتىن «كازلەگپروم-الماتى» جشس-نىڭ جاڭا ءوندىرىسىن ىسكە قوستى.

رەسپۋبليكا كولەمىندە وتكەن يندۋستريالاندىرۋ كۇنىنە ارنالعان تەلەكوپىر بارىسىندا مەملەكەت باسشىسى بىرقاتار جاڭا ءوندىرىس ورىندارىن ىسكە قوسقان بولاتىن.

اتالعان شارا اياسىندا مەملەكەت باسشىسى ەلىمىزدىڭ ەڭ ءىرى مەگاپوليسى سانالاتىن الماتى قالاسىندا دا ءبىرسىپىرا ءوندىرىس ورىندارىنىڭ جۇمىسىمەن تانىستى.

«كازلەگپروم-الماتى» جشس-نىڭ قازاقستاندىق جانە شەتەلدىك ساۋدا نارىعىنداعى مودەلدى اياقكيىمدەر شىعارۋدا قارقىندى دامىپ كەلە جاتقانى تۋرالى بايانداعان ءوندىرىس باسشىلىعى، ەلباسىنىڭ رۇقساتىمەن جاڭا ءوندىرىستى ىسكە قوستى.

كاسىپورىن بۇگىنگى تاڭدا 450-گە جۋىق ادامدى جۇمىسپەن قامتىپ وتىر.  بۇل زاۋىت قىزمەتكەرلەرىنىڭ سانى العاشقى كەزەڭدەرمەن سالىستىرعاندا 15 ەسەگە ارتقاندىعىن كورسەتەدى. سايكەسىنشە ءوندىرىس كولەمى دە 7  ەسەگە ۇلعايعان. ەلباسىنىڭ قاتىسۋىمەن وتكەن تەلەكوپىردە كاسىپورىن باسشىسى ايبەك بەكتۇرعانوۆ وسى جايتتەردى ءمالىم ەتتى.

كاسىپورىننىڭ وندىرىستىك قۋاتى - جىلىنا 1,5 ميلليونعا دەيىن تىگىن بۇيىمدارى مەن 500 000 جۇپ اياقكيىم شىعارۋعا جەتەدى ەكەن. بۇل قازاقستاندىق ۇلەستىڭ 84%-ىن قۇرايدى.

ەلباسىنىڭ تىكەلەي تاپسىرماسىمەن ەلىمىزدە يندۋستريالدى-يننوۆاتسيالىق دامۋ قارقىندى جۇرگىزىلىپ كەلەدى. سونداي-اق، كاسىبىنەن ءناسىپ تاۋىپ، ءبىر قاۋىم جۇرتتى جۇمىسپەن قامتۋعا نيەتتى ازاماتتارعا مەملەكەت تاراپىنان كورسەتىلىپ جاتقان قولداۋلار دا از ەمەس. مىسالى، ۇستىمىزدەگى جىلى اتالعان كاسىپورىن مودەلدى اياقكيىمدەر شىعارۋعا ارنالعان قۇنى 300 ميلليون تەڭگەنى قۇرايتىن جاڭا قوندىرعىلارمەن قامتاماسىز ەتىلگەن.

تيىسىنشە، 70 جاڭا جۇمىس ورنى قۇرىلعان.

وسى جاڭا جەلىنىڭ وندىرىستىك قۋاتى جىلىنا اينالىمى 2,5 ملرد. تەڭگە بولاتىن 150 000 جۇپ اياقكيىم شىعارادى. اتالعان كاسىپورىندا جىلدىڭ ءار ماۋمىسىنا ارنالعان ەرلەر اياقكيىمىنىڭ 75-تەن استام ءتۇرى وندىرىلەدى ەكەن.

«وتكەن جىلى بىزگە قولداۋ ءبىلدىرىپ، «كازلەگپروم-الماتى» جشس-ءنىڭ تىگىن – اياقكيىم فابريكاسىندا بولدىڭىز. بيىل ءسىزدىڭ تاپسىرماڭىز بويىنشا، اياقكيىم ءوندىرىسىن مودەرنيزاتسيالاپ، جاڭا يتالياندىق قوندىرعىلار ساتىپ الدىق. بۇل جوبانى ىسكە اسىرۋ بارىسىندا نارىققا يمپورتتىق اياقكيىمدەردى الماستىراتىن ونىمدەر شىعاراتىن بولامىز. ءسىزدىڭ وتاندىق جەڭىل ونەركاسىپتى دامىتۋعا دەگەن جەكە قولداۋىڭىزعا جانە ەلدى يندۋستريالاندىرۋ جونىندەگى ساليقالى ساياساتىڭىزعا ۇجىم اتىنان العىسىمىزدى بىلدەرىمىز»، - دەدى مەملەكەت باسشىسى الدىندا ءسوز سويلەگەن كاسىپورىن باسشىسى ا.بەكتۇرعانوۆ.

ايتا كەتەيىك، «كازلەگپروم-الماتى» جشس قازاقستاننىڭ جەڭىل ونەركاسىبىندەگى ءىرى جوعارى تەحنولوگيالى ءوندىرىس ورىندارىنىڭ ءبىرى بولىپ تابىلادى. قازىرگى كەزدە فابريكا الماتى مەن الماتى وبلىسىنداعى ءىرى جۇمىس بەرۋشىلەر قاتارىندا. «كازلەگپروم-الماتى» جشس جانىندا 2014 جىلدان بەرى قاراي «شەبەر» وندىرىستىك وقۋ ورتالىعى جۇمىس ىستەيدى. مۇندا دۋالدى تەحنولوگيا بويىنشا تىگىن جانە اياقكيىم فابريكالارىنىڭ جۇمىسشىلارى ارنايى دايىندالىپ، 7 باعدارلاما بويىنشا ءدارىس الىپ، فابريكاعا جانە وزگە جەرلەرگە جۇمىسقا ورنالاسادى. «شەبەر» وقۋ ورنى تىگىن جانە اياقكيىم سالاسىنىڭ 300 –دەن استام ماماندارىن دايارلاپ شىعاردى.

Abai.kz