وڭتۇستىك قازاقستان وبلىسى، شاردارا اۋدانىندا بالىق ءوندىرىسى وركەندەپ، ءونىم شەتەلگە ەكسپورتتالىپ جاتىر.

بۇگىندە اۋداندا بالىق شارۋاشىلىعىمەن اينالىساتىن ەكى كاسىپورىن جۇمىسىن ءساتتى جۇرگىزىپ كەلەدى.

ونىڭ ءبىرى  - «حاميت» بالىق وڭدەۋ كومپانياسى. بۇل كاسىپورىن بالىقتىڭ ەتىن گرۋزيا، گەرمانيا، ۋكراينا رەسپۋبليكالارى مەن رەسەي فەدەراتسياسىنا جونەلتۋدە. بالىق شاباعىن كاسىپورىن سىرتتان تاسىمالدايدى. تاۋاردى تەرەڭدەتىپ وڭدەيتىن زاۋىت سوڭعى ۇلگىدەگى قوندىرعىلارمەن جابدىقتالعان. ءوندىرىس ورنى 200 جەرگىلىكتى تۇرعىندى جۇمىسپەن قامتىپ وتىر. زاۋىت جىلىنا 3 مىڭ تونناعا دەيىن ءونىم وندىرۋگە قاۋقارلى. مۇندا قوس بىردەي جەلى جۇمىس ىستەيدى. الدىمەن، بالىق سۇيەگىنەن اجىراتىلادى، سوسىن سۇبە ەتتەن فيلە جاسالادى. ءتىپتى، قالدىعىنان ۇن دا شىعارىلادى ەكەن. تيىمدىلىگى سول، شيكىزات قالدىقسىز وڭدەلەدى. «ساپالى ونىمگە سۇرانىس تا جوعارى»، - دەيدى تسەح باسشىسى. «حاميت» سەلولىق تۇتىنۋشىلار كووپەراتيۆى جىلىنا وندىرگەن ءونىمىنىڭ 70 پايىزىن شەتەلگە جونەلتەدى. قازىر زاۋىت بالىقتىڭ سۇيەكتەن اجىراتىلعان تازا ەتى مەن قاقتالعان تۇرىنە باسىمدىق بەرگەن. كاسىپورىن ءوز ءونىمىن ەۋرووداققا كىرەتىن مەملەكەتتەردىڭ نارىعىنا شىعارۋعا ارنايى رۇقسات العان ەلىمىزدەگى 10 بالىق وڭدەۋشى زاۋىتتىڭ ءبىرى. زاۋىت نەگىزىنەن كوكسەركە مەن الابۇعانىڭ تازا ەتىن ەكسپورتتايدى. قاقتالعان قاراكوز بەن تابانعا دا سۇرانىس جوعارى. سوندىقتان ءوندىرىس باسشىلىعى بالىق شاباعىن قاراعاندىدان تاسىمالداپ، ونى قولدان ءوسىرىپ جاتىر. سونىڭ ارقاسىندا رەسەي، بەلارۋس ەلدەرىمەن قاتار، گەرمانيا مەن فرانتسياعا دايىن ونىمدەرىن ەكسپورتتاۋعا كوشتى.

بيىلعى جىلى اتالعان اۋداندا تاعى دا ەكى بالىق زاۋىتى سالىنىپ، ىسكە قوسىلۋ كۇتىلۋدە.

Abai.kz