وڭتۇستىك قازاقستان وبلىسىنىڭ اكىمى جانسەيىت تۇيمەباەۆ ايماققا ارنايى جۇمىس ساپارىمەن كەلگەن تۇركيا رەسپۋبليكاسىنىڭ دارىگەرلەردەن جاساقتالعان ءبىر توپ دەلەگاتسياسىمەن كەزدەستى. ەرتە جاستاعى بالالارعا كورسەتىلەتىن مەديتسينالىق كومەكتىڭ ساپاسىن جاقسارتۋ، نارەستەلەر ءولىم-ءجىتىمىن تومەندەتۋ ماقساتىنداعى تاجىريبەسىمەن بولىسۋگە كەلگەن جۇمىسشى توپقا تۇركيا رەسپۋبليكاسى ۇكىمەتى جانىنداعى ىنتىماقتاستىق جانە ۇيلەستىرۋ جونىندەگى تۇرىك اگەنتتىگى (TIKA) ۇيىتقى بولىپ، ونى وقۋ ءبولىمىنىڭ باستىعى مۋستافا حاسيم باستاپ كەلىپ وتىر.

كەزدەسۋدە تاراپتار باۋىرلاس قوس مەملەكەتتىڭ قارىم-قاتىناسى مەن بىرلەسكەن جوبالار جايىن ءسوز ەتىپ، بۇگىننەن باستالاتىن شەبەرلىك ساباعىنىڭ ناقتى مىندەتتەرى بويىنشا اڭگىمەلەستى.

اتاپ ايتقاندا، 2-4 جەلتوقسان ارالىعىندا تۇركيادان كەلگەن ماماندار وبلىستاعى بالالار مەن بوساناتىن ايەلدەرگە مەديتسينالىق كومەك بەرۋ قىزمەتىنىڭ دارىگەرلەرىنە – نەوناتولوگتارعا، وفتالمولوگتارعا، پەدياترلارعا، اكۋشەر ماماندارعا، نەوناتالدىق مەيىربيكەلەرگە تەوريالىق جانە پراكتيكالىق دارىستەر ءوتىپ، بىلىكتىلىگىن جوعارىلاتۋ بويىنشا ارنايى وقىتۋ كۋرسىنان وتكىزەدى. شەبەرلىك ساباعىنا 30-عا جۋىق مامان قاتىسادى دەپ جوسپارلانۋدا.

وبلىستىق بالالار كلينيكالىق اۋرۋحاناسىنىڭ حالىقارالىق تەحنولوگيالار ورتالىعىنىڭ بازاسىندا وتەتەتىن شارادا جاڭا تۋعان بالالاردا كەزدەسەتىن ءتۇرلى شۇعىل جاعدايلار (اسفيكسيا، تىنىس الۋ جەتكىلىكسىزدىگى) كەزىندە ءتيىمدى رەانيماتسيالىق كومەكتى ساپالى جۇرگىزە بىلۋگە، ناۋقاس جانە دەنى ساۋ جاڭا تۋعان بالالارعا مامانداندىرىلعان كۇتىم جاساۋعا، ەرتە جاستاعى بالالارداعى كورۋدىڭ بۇزىلىستارىن ۋاقتىلى انىقتاۋعا وقىتۋ باعدارلامالارى جوسپارلانعان. سونىمەن قاتار، مەديتسينا قىزمەتكەرلەرى جاڭا تۋعان بالالارعا رەانيماتسيالىق كومەك كورسەتۋ بويىنشا زاماناۋي سيمۋلياتسيالىق مانەكەندەرگە تاجىريبە جاساپ داعدىلانادى.

وسىنداي وقىتۋ باعدارلاماسىمەن تانىستىرعان تۇركيالىق دارىگەرلەر مۇنداي تاجىريبە الماسۋ شارالارىنىڭ بۇعان دەيىن ازەربايجاندىق دارىگەرلەرمەن ۇيىمداستىرىلىپ، وڭ ناتيجە كورسەتكەنىن اتاپ ءوتتى. وسىناۋ جەتىستىكتەرگە قانىق بولعان ايماق باسشىسى ج.تۇيمەباەۆ جۇمىسشى توپقا ساتتىلىك تىلەدى.

ايتا كەتۋ كەرەك، ءۇش كۇندىك ءدارىس كەزىندە ەرەكشە كوزگە ءتۇسىپ، ارنايى ەمتيحاننان سۇرىنبەي وتكەن بىرقاتار مەديتسينا قىزمەتكەرلەرىنە سەرتيفيكاتتار تابىستالىپ، ولارعا تۇركيادا ءبىلىمىن جەتىلدىرۋگە جولداما بەرىلمەك.

Abai.kz