تاياۋدا ازەربايجاننىڭ شەكي شاھارىندا تۇركسوي تۇراقتى كەڭەسىنىڭ 34-ءشى وتىرىسى ءوتتى. وندا ەر تۇرىكتىڭ بەسىگى اتانعان قازاقستاننىڭ تۇركىستان قالاسىن تۇركى الەمىنىڭ 2017 جىلعى مادەني استاناسى ەتىپ بەكىتۋ تۋرالى شەشىم قابىلداندى.

اتالمىش جيىنعا تۇركسوي-عا مۇشە ەلدەردىڭ مادەنيەت قايراتكەرلەرى، سونداي-اق تۇركى كەڭەسى، تۇركىتىلدەس مەملەكەتتەر پارلامەنتتىك اسسامبلەياسى، حالىقارالىق تۇركى اكادەمياسى، تۇركى مادەني ميراس قورى سەكىلدى حالىقارالىق ۇيىمداردىڭ وكىلدەرى قاتىستى.

جيىندا كونە شاھار - تۇركىستاندى 2017 جىلى تۇركى الەمىنىڭ مادەني استاناسى ەتىپ بەكىتۋ جونىندە شەشىم قابىلداندى. تۇراقتى كەڭەستىڭ 35-ءشى وتىرىسىنىڭ ۇيلەستىرۋشىسى بولۋ قازاقستان رەسپۋبليكاسىنىڭ مادەنيەت جانە سپورت مينيسترلىگىنە جۇكتەلىپ، ونىڭ وتىرىسى 2017 جىلدىڭ سوڭىنا قاراي تۇركىستاندا وتەتىن بولىپ بەلگىلەندى.

بۇعان قوسا، ازەربايجان مادەنيەت جانە تۋريزم مينيسترلىگىنىڭ ۇسىنىسىمەن تۇركسوي ۇيىمىنا مۇشە ەلدەردە 2017 جىل «موللا پاناح ۆاگيفتى ەسكە الۋ جىلى» دەپ جاريالاندى.

وتىرىستا تۇركسوي-دىڭ باس حاتشىسى دۇيسەن قاسەينوۆ تۇركى مادەنيەتىنىڭ حالىقارالىق ۇيىمىنىڭ (تۇركسوي) 20 جىلدان استام ۋاقىتتان بەرى تۇركى تىلدەس ۇلتتار اراسىنداعى باۋىرلاستىق بايلانىستار مەن دوستىقتى، تۇركىلىك مادەنيەتتى ۇرپاقتان ۇرپاققا جەتكىزىپ، ونى الەمگە تانىتۋدا تىندىرىمدى تىرلىكتەردىڭ اتقارىلىپ كەلە جاتقانىن جەتكىزدى. سونىمەن بىرگە، ول تۇركسوي-دىڭ ەڭ ءساتتى جوبالارىنىڭ ءبىرى رەتىندە 2012 جىلدان باستاپ ىسكە اسىرىلىپ كەلە جاتقان تۇركى الەمىنىڭ مادەني استانالارىن تاڭداۋ جۇمىسى ەكەنىن اتاپ ءوتتى.

تۇركىستاننىڭ مادەني استانا اتاناتىن جىلىندا بىرقاتار شارالار ۇيىمداستىرىلىپ، ىسكە اسىرىلماق. اتاپ ايتقاندا، ءتۇبى تۇركى تىلدەس حالىقتار ۇلىستىڭ ۇلى كۇنى – ناۋرىز تويىن مەرەكەلەپ، تەاتر فەستيۆالىن وتكىزبەكشى. كىتاپ جارمەڭكەسى مەن قولونەر شەبەرلەرىنىڭ ورتا ازيالىق فەستيۆالى مەن ۇلى دالا ءداستۇرلى مۋزىكالىق فەستيۆالىن، سونىمەن بىرگە، سۋرەتشىلەر كەزدەسۋى سىندى ءىرى باعدارلامالاردى ۇيىمداستىرۋدى كوزدەپ وتىر.

Abai.kz