سوڭعى جىلدارى وڭتۇستىكتىڭ ونىمدەرى ءوڭىر حالقىنا قوسا كورشى مەملەكەتتەرگە دە ەكسپورتتالۋدا. ماسەلەن قازىعۇرت اۋدانىنا قاراستى «امانكەلدى» جشس-ءى 150 تونناعا جۋىق ءجۇزىمدى كورشى ەلدەرگە ەكسپورتتاۋدا. سەرىكتەستىكتە 275 گەكتارعا الما، 88 گەكتارعا شابدالى، 31 گەكتارعا شيە، 94 گەكتارعا الحورى، 25 گەكتارعا ورىك، 17 گەكتارعا المۇرت، 115 گەكتارعا ءجۇزىم ەگىلگەن.

«بۇل تامشىلاتىپ سۋعارۋ ءادىسىن قولداناتىن سەرىكتەستىك جۇمىسىنىڭ ءبىر باعىتى عانا. بيىل 150 گەكتارداي جەرگە ەگىلگەن ءجۇزىمدى باپتاۋ وڭاي بولعان جوق» – دەيدى سەرىكتەستىك باسشىسى نۇرلان قۇرالوۆ. – «اۋا رايى قولايسىز بولعاندىقتان، وسىمدىكتى اۋرۋدان امان ساقتاۋ ءۇشىن زيانكەستەرگە قارسى بىرنەشە رەت دارىلەۋگە تۋرا كەلدى. سونىڭ ناتيجەسىندە جاقسى ءونىم الىنۋدا. جۇزىمدەر الماتى، استانا سياقتى ءىرى قالالار مەن بىرگە، ەلىمىزدىڭ وزگە دە وڭىرلەرىندە ساتىلۋدا. ال، قازىر رەسەيدىڭ ماسكەۋ، نوۆوسيبيرسك، ەكاتەرينبۋرگ سياقتى قالالارىنا ەكسپورتقا جىبەرىپ جاتىرمىز. بۇگىنگى تاڭدا 150 توننادان استام ءجۇزىم، 100 تونناعا جۋىق الما، سونداي-اق، شابدالى، كيۆا، المۇرت، الحورى سياقتى ونىمدەرەكسپورتتالدى. اۋدان ورتالىعىنان، قىزىلقيا، قاقپاق، قىزىلتاڭ اۋىلدىق وكرۋگتەرى بويىنشا 300-دەن استام ادام ەڭبەك ەتۋدە. قازىر شارۋاشىلىقتىڭ 2 مىڭ توننالىق كوكەنىس ساقتاۋ قويماسىندا مىڭ تونناعا دەيىن ءونىم قويىلىپ ساقتالۋدا. ونداعى ماقسات – جەرگىلىكتى نارىقتى جىل بويىنا بالعىن كۇيىندە ساقتالعان جەمىسپەن قامتاماسىز ەتۋ»، - دەيدى شارۋاشىلىق باسشىسى نۇرلان قۇرالوۆ مىرزا. 

جاسىراتىنى جوق، وسى ۋاقىتقا دەيىن وزگە ەلدەردەن جەمىس جيدەك پەن كوكونىستىڭ سان ءتۇرىن تاسىپ كەلدىك. ەندى سول كەتكەن ەسەنى قايتاراتىن كەز جەتكەندەي، شارۋالارىمىزعا تەك تابىس تىلەيمىز!

Abai.kz