ەلباسى وڭتۇستىككە جاساعان ءبىر جۇمىس ساپارىندا وبلىستىڭ كوكونىس پەن جەمىس-جيدەك وندىرەتىن ناعىز «فابريكاعا» اينالۋعا بارلىق مۇمكىندىگى بار ەكەندىگىن اتاپ وتكەن بولاتىن. بۇگىنگى كۇنى وبلىس اكىمى جانسەيىت تۇيمەباەۆ شارۋالارعا "وسى مۇمكىندىكتى بارىنشا قولدانۋ ءۇشىن بۇگىنگى كۇنى باۋ-باقشا شارۋاشىلىعىن دامىتۋىمىز كەرەك»،- دەگەن تالاپ قويىپ وتىر.

بۇگىندە جەمىس جيدەك وسىرۋگە ەرەكشە كوڭىل بولە باستاعان وڭتۇستىك قازاقستان وبلىسىنىڭ شارۋالارى الما، الحورى، شابدالى، شيە، ءجۇزىم جەمىس-جيدەكتەرىن وسىرەتىن سەرىكتەستىك ونىمدەرىن قازاقستان اۋماعىنان بولەك، وزبەكستان، اۋعانستان، تاجىكستان رەسپۋبليكالارىنا شىعارۋدا. سونداي-اق، ولار مۇنداعى جەمىس-جيدەكتەر مەن كوكونىستەردى ساقتايتىن سىيىمدىلىعى 2 مىڭ توننالىق قويمانى جانە تۇقىم باعىندا وندىرىلەتىن الما مەن ءجۇزىم كوشەتتەرىنە ەرەكشە كوڭىل ءبولىپ وتىر. 

ماسەلەن ورداباسىلىق شارۋالار بيىل 306 گەكتار جەرگە جەمىس جيدەك ەكسە، 81,7 تسەنتنەر ءونىم الىپ، بيىلعى جيىن تەرىمدى ابىرويمەن اتقارىپ وتىر. ول ازداي بارلىعى 2500 توننا ءونىم جيناعان. جالپى وڭتۇستىكتىڭ تابيعاتى جەمىس-جيدەك وسىرۋگە وتە قولايلى. سوندىقتان سوڭعى كەزدەرى وڭتۇستىكتىڭ كەيبىر اۋداندارى جەمىس جيدەك وسىرۋگە ايرىقشا دەن قويا باستادى. سىرتى جىلتىراعان، ىشىندە ءدامى جوق شەكارا اسىپ كەلەتىن باسقا ەلدىڭ جەمىس جيدەكتەرىنەن گورى ەلىمىزدە وڭتۇستىكتىڭ ەرەكشە ىستىعىندا بابىمەن پىسىرىلگەن ءتاتتى جەمىس جيدەكتەرىنىڭ ماڭىزى زور بولىپ وتىر. ارينە وزىمىزدە وندىرىلگەننەن كەيىن ولاردىڭ باعاسى دا شەتەل اسىپ كەلگەن ونىمدەردەن گورى الدەقايدا قولجەتىمدى. سوندىقتان وڭتۇستىك ءوڭىردىڭ جەمىس جيدەك ونىمدەرىن وسىرۋگە دەگەن قىزىعۋشىلىعى زور سۇرانىسقا دا يە بولاتىن سەكىلدى. 

Abai.kz