وڭتۇستىك قازاقستان وبلىسى ىشكى ساياسات باسقارماسىنىڭ تاراتقان مالىمەتتەرىنە قاراعاندا، تاۋەلسىزدىك جىلدارىندا وڭتۇستىك قازاقستان وبلىسىندا حالىق سانى 51,4 پايىزعا وسكەن. ياعني 25 جىلدا ءوڭىر حالقى 1 ميلليون 889 مىڭ 300-دەن 2 ميلليون 861 مىڭ 300-گە جەتكەن. جالپى وڭتۇستىك قازاقستان وبلىسىندا وزگە وڭىرلەرمەن سالىستىرعاندا تابيعي ءوسىم جوعارى. توقسانىنشى جىلدارعى قيىن-قىستاۋ كەزەڭدەردە وبلىستا تۋ كورسەتكىشى ازايعانىمەن، سوڭعى جىلدارى ونىڭ قايتادان جوعارىلاعانى بايقالادى.

وڭىردە قازىر جالپى 164 ينۆەستيتسيالىق جوبا جۇزەگە اسىرىلۋدا. 197 ميلليارد تەڭگە ينۆەستيتسيا تارتىلدى. وسى جوبالار ءساتتى جۇزەگە اسسا، 12 200 جۇمىس ورنى قۇرىلادى. وبلىستا قازىر يندۋستريالدى ايماقتار تابىستى جۇمىس ىستەۋدە. «وڭتۇستىك» ارنايى ەكونوميكالىق ايماعىندا 27,8 ميلليارد تەڭگەگە 10 جوبا جۇزەگە اسىرىلىپ، 2 145 جۇمىس ورنى قۇرىلدى.

بۇل ءوز كەزەگىندە الەۋمەتتىك سالاعا دا وڭ اسەرىن تيگىزۋدە. وتكەن جيىرما بەس جىلدا جۇمىسسىزدىق دەڭگەيى 14,3 پايىزدان 5,2 پايىزعا تومەندەگەن.

ءبىر ايتا كەتەرى، ەلباسىنىڭ «100 ناقتى قادام» ۇلت جوسپارىنىڭ 94 قادامىنداعى بارلىق اقپاراتتاردىڭ اشىقتىعىن قامتاماسىز ەتەتىن «اشىق ۇكىمەت» جوباسىن قۇرۋ ءۇشىن قابىلدانعان «اقپاراتقا جول جەتكىزۋ تۋرالى» زاڭ بويىنشا مەملەكەتتىك ورگاندار وزدەرىنىڭ اتقارعان جۇمىستارى تۋرالى مالىمەتتەرلى جاريالاپ وتىرۋعا ءتيىستى. ءاربىر ازامات ءۇشىن اتقارۋشى ورگاندار تۋرالى اقپاراتتار اشىق ءارى قول جەتىمدى بولۋى كەرەك. تۇرعىندار اقپاراتتاردى پايدالانۋمەن بىرگە وعان قاتىستى وي-پىكىرلەرىن دە ەركىن بىلدىرە الۋى ءتيىس.

Abai.kz