ءبىلىم جانە عىلىم مينيسترلىگى ۇلتتىق بىرىڭعاي تەستىلەۋدى ەكىگە ءبولدى. ەندى، مەكتەپتى ءبىتىرۋ ەمتيxانى وقۋشىنىڭ ورتا ءبىلىمدى تامامداعانىن دالەلدەسە، ۇلتتىق بىرىڭعاي تەستىلەۋدىڭ قورىتىندىسىمەن مەكتەپ تۇلەكتەرىنە مەملەكەتتىك گرانتتار تاعايىندالادى.

بۇل تۋرالى بۇگىن وقو ايماقتىق كوممۋنيكاتسيا قىزمەتىندە وتكەن بريفينگتە وڭتۇستىك قازاقستان وبلىسى ءبىلىم باسقارماسى باسشىسىنىڭ ورىنباسارى راۋشان ەرگاشەۆا ايتتى.

ونىڭ  ايتۋىنشا، جاڭا فورماتقا سايكەس «التىن بەلگى» تاعايىنداۋدى مەكتەپتەردىڭ وزدەرى جۇرگىزەدى. ۇلتتىق بىرىڭعاي تەستىلەۋ كەزىندە اتالعان اتاقتى راستاۋ قاجەت ەمەس. تەستىلەۋ تەك گرانت يەگەرلەرىن عانا انىقتاپ، جوعارى وقۋ ورنىنا ءتۇسۋ مۇمكىندىگىن بەرەدى.

«التىن بەلگى» يەگەرلەرى، جالپى ءبىلىم بەرەتىن پاندەر بويىنشا حالىقارالىق، رەسپۋبليكالىق وليمپيادالاردىڭ، عىلىمي جوبالاردىڭ جەڭىمپازدارى مەن جۇلدەگەرلەرى ۇبت-نى جالپى نەگىزدە تاپسىرادى. بالل سانى بىردەي بولعان جاعدايدا ءبىلىم بەرۋ گرانتتارىن الۋ باسىمدىعى ولارعا بەرىلەدى. ماسەلەن، ءبىتىرۋشى جانە «التىن بەلگى» يەگەرى دە 122 بالل السا، گرانت «التىن بەلگى» يەگەرىنە بەرىلەدى. ەگەر ءبىتىرۋشى كوبىرەك بالل جيناعان جاعدايدا، «التىن بەلگى» يەگەرىنە باسىمدىق بەرىلمەيدى.

جالپى ءبىلىم بەرەتىن پاندەر بويىنشا 5 حالىقارالىق وليمپيادانىڭ جەڭىمپازدارى مەن جۇلدەگەرلەرىنە ارنايى گرانتتار بولىنەدى.

«2017 جىلى تۇلەكتەر ءۇشىن قورىتىندى اتتەستاتسيالاۋ وزدەرى وقىعان مەكتەپتە وتكىزىلەدى، ياعني كەلەسى جىلدىڭ 1-10 ماۋسىم ارالىعىندا وتكىزۋ جوسپارلانىپ وتىر. ال ۇلتتىق بىرىڭعاي تەستىلەۋ، ياعني جوعارى وقۋ ورنىنا ءتۇسۋ ەمتيxانى 20-شى ماۋسىم مەن 1-ءشى شىلدە ارالىعىندا رەسپۋبليكا بويىنشا 165 تەستىلەۋ بەكەتتەرىندە وتكىزىلەدى. 2017 جىلعى تامىز ايىندا جانە 2018 جىلدىڭ قاڭتار ايىندا ۇبت اقىلى نەگىزدە قايتا تاپسىرۋ مۇمكىندىگى بەرىلەدى. شەكتى بالل – 50.»، – دەپ اتاپ كورسەتتى ر.ەرگاشەۆا.

مەكتەپ ءبىتىرۋشى تۇلەكتەردىڭ جوعارى وقۋ ورنىنا قابىلدانۋ ءۇشىن تاپسىراتىن ۇبت فورماتى ءۇش مىندەتتى پاننەن تۇرادى. ولار – ماتەماتيكالىق ساۋاتتىلىق، وقۋ ساۋاتتىلىعى جانە قازاقستان تاريحى. ولاردىڭ ارقايسىسىنا 20 سۇراقتان، ال ەكى تاڭداۋ پانىنە 30 سۇراقتان بەرىلەدى. جالپى تەستىلەۋ ۋاقىتىنا 210 مينۋت بولىنەدى. سۇراقتار سانىنىڭ ارتقانىنا قاراماستان،  ەڭ تومەن بالل دەڭگەيى 50 بالل كۇيىندە وزگەرىسسىز قالاتىنى ايتىلدى.

مىندەتتى پاندەر قاتارىنا ءبىلىم العان ءتىلى – قازاق نەمەسە ورىس ءتىلى جانە ادەبيەت – ەسسە تۇرىندە، قازاقستان تاريحى – اۋىزشا ەمتيحان، ماتەماتيكا – باقىلاۋ جۇمىسى، مەڭگەرگەن ءتىلى بويىنشا تەستىلەۋ (قازاق ءتىلى – ورىس ءتىلدى مەكتەپتەر ءۇشىن، ورىس ءتىلى قازاق، وزبەك، ۇيعىر، تاجىك ءتىلدى مەكتەپتەر ءۇشىن). ال تاڭداۋ پاندەرى بويىنشا – فيزيكا، حيميا، بيولوگيا، گەوگرافيا، گەومەتريا، دۇنيەجۇزى تاريحى، ادەبيەت نەمەسە شەت تىلىنەن تەست تاپسىرادى.

اباي اقپارات