وقو-دا «ىرىس» ميكروقارجى ۇيىمى ارقىلى «جۇمىسپەن قامتۋ 2020» باعدارلاماسى بويىنشا قارجىلاندىرۋ ءجۇرىپ جاتىر.

بۇل تۋرالى وقو ايماقتىق كوممۋنيكاتسيالار ورتالىعىندا وتكەن ءباسپاسوز بريفينگىندە «ىرىس» ميكروقارجى ۇيىمىنىڭ ديرەكتورى حيلولا نازارمەتوۆا مالىمدەدى. «بيىل «جۇمىسپەن قامتۋ 2020» جول كارتاسى باعدارلاماسى بويىنشا وبلىسىمىزعا 7,0 ملرد.تەڭگەدەن استام قاراجات ءبولىنىپ، ونىڭ 3,8 ملرد.تەڭگەسى «اۋىلشارۋاشىلىعىن قارجىلاي قولداۋ قورى» ارقىلى تاراتىلدى.

اتالمىش قور ارقىلى بەرىلەتىن نەسيەنىڭ ەڭ جوعارعى سوماسى 3,0 ملن.تەڭگەنى قۇراسا، «ىرىس» ميكروقارجى ۇيىمى ارقىلى تاراتىلاتىن نەسيەنىڭ ماكسيمالدى سوماسى 6,0 ملن. تەڭگەنى قۇرايدى»،- دەدى ح.نازارمەتوۆا. «جۇمىسپەن قامتۋ 2020» جول كارتاسى باعدارلاماسى اياسىندا نەسيە الۋعا نيەت بىلدىرگەن ازاماتتار ەڭ الدىمەن باعدارلامانىڭ تالاپتارىنا ساي كەلۋ كەرەك. بەرىلەتىن نەسيەنىڭ ماكسيمالدى سوماسى 6,0 ملن.تەڭگە، جىلدىق سىياقىسى 7%، 54 ايعا دەيىن بەرىلەدى. ال نەسيە الۋشىلارعا قويىلاتىن تالاپتار: بيزنەستى (جوبانى) ىسكە اسىراتىن ورنىنىڭ بولۋى، نەسيە تاريحىنىڭ تازا جانە سوڭعى 12 اي ىشىندە تولەمى كەشىكتىرىلگەن نەسيەسى بولماۋى شارت.

ايتا كەتەيىك، وڭىرىمىزدە 2011-2013 جىلدار ارالىعىندا «ىرىس» ميكروقارجى ۇيىمى ارقىلى اتالعان باعدارلاما اياسىندا 1003 جوبا 2,1 ملرد.تەڭگەگە قارجىلاندىرىلعان. ونىڭ ىشىندە مال شارۋاشىلىعى بويىنشا 1,8 ملرد. تەڭگەگە 888 جوبا; ەگىن شارۋاشىلىعى بويىنشا 106,5 ملن.تەڭگەگە 44 جوبا; ال ءار ءتۇرلى قىزمەت تۇرلەرى بويىنشا 150 ملن. تەڭگەگە 71 جوبا قارجىلاي قولداۋ تاپقان. 

Abai.kz