اقتوبە وبلىسىندا ازىق-تۇلىك ونىمدەرى مەن جانار-جاعارماي ماتەريالدارى باعاسىنىڭ وسۋىنە جول بەرمەۋ شارالارى قابىلدانۋدا، - دەپ حابارلايدى "اقبوبە" باسىلىمى.

وبلىس اكىمدىگىندە ايماق باسشىسى بەردىبەك ساپارباەۆتىڭ توراعالىعىمەن وتكەن كەڭەستە الەۋمەتتىك ماڭىزدى تاۋارلاردىڭ باعاسىنا قاتىستى ماسەلە تالقىلاندى دەپ حابارلادى «اقتوبە اقپارات» ءباسپاسوز ورتالىعىنان.

وبلىستىق كاسىپكەرلىك باسقارماسىنىڭ باسشىسى انار دارجانوۆا اعىمداعى جىلدىڭ قاڭتار-قازان ايلارىندا ازىق-تۇلىك تاۋارلارىنا ينفلياتسيا دەڭگەيى 104,4 پايىز قۇرادى، بۇل رەسپۋبليكالىق دەڭگەيدەن 1,3 پايىزعا تومەن.

— مونيتورينگكە سايكەس 21 پوزيتسيا بويىنشا الەۋمەتتىك ماڭىزى بار ازىق-تۇلىكتىڭ 33 ءتۇرىنىڭ بولشەك ساۋدا باعاسى بۇرىنعى دەڭگەيدە قالۋدا. 5 پوزيتسيا: كەسپە، قاراقۇمىق جارماسى، اق قاۋداندى قىرىققابات، ءتۇيىندى پياز، قۇمشەكەر بويىنشا باعا تومەندەپ، 7 پوزيتسيا بويىنشا باعانىڭ ءوسۋى بايقالادى: ولار — وسىمدىك مايى، 2,5% مايلىلىقتاعى ءسۇت، مايەكتى ىرىمشىك، 2,5% جانە 3,2% مايلىلىقتاعى ايران، تاۋىق جۇمىرتقاسى جانە تۇيىرشەكتەلگەن شاي،— دەپ اتاپ كورسەتتى انار دارجانوۆا.

وبلىستا 715 كاسىپورىنمەن، بولشەك ساۋدامەن شۇعىلداناتىن ءىرى كاسىپورىندارمەن، كوتەرمە جەتكىزۋشىلەرمەن جانە تاۋار وندىرۋشىلەرمەن جاسالعان 530-دان استام مەموراندۋم جۇمىس ىستەۋدە، سوعان سايكەس وندىرىلەتىن ونىمدەرگە باعانىڭ نەگىزسىز وسۋىنە جول بەرىلمەيدى.

قر تاۋەلسىزدىگىنىڭ 25 جىلدىعىن مەرەكەلەۋ قۇرمەتىنە 1 قاراشادان 31 جەلتوقسانعا دەيىن وبلىس باسشىلىعىنىڭ باستاماسى بويىنشا «انۆار» جانە «دينا» ءىرى ساۋدا جەلىلەرى ءسۇت، تاۋىق جۇمىرتقاسى، ەت، قانت، ت.ب. قوسپاعاندا، الەۋمەتتىك ءمانى بار ازىق-تۇلىك تاۋارلارىنىڭ 20 تۇرىنە، باعانى تۇراقتى ۇستاۋ بويىنشا اكتسيا وتكىزۋدە. جۇيەلى شارالاردى قابىلداۋ، باقىلاۋ جاساۋ، مونيتورينگ بويىنشا جۇمىستار تۇتىنۋ نارىعىنداعى باعالاردى تۇراقتاندىرۋ جونىندەگى وبلىستىق شتابتىڭ وتكىزىلەتىن ماجىلىستەرىندە ۇيلەستىرىلەدى، وسىنداي شتابتار وبلىستىڭ اۋداندارىندا دا جۇمىس ىستەۋدە. جىل باسىنان بەرى وبلىستا 350 وبلىستىق جانە اۋداندىق اۋىل شارۋاشىلىعى جارمەڭكەلەرى وتكىزىلىپ، ولاردا بازارداعىدان 10-15 پايىزعا تومەنگى باعامەن 898,3 ميلليون تەڭگەنىڭ ونىمدەرى وتكىزىلدى. تۇراقتاندىرۋ قورىن قالىپتاستىرۋ اياسىندا «بازارلاردى باسقارۋ» جشس مەن «پريگورودنىي اۋىل شارۋاشىلىعى فيرماسى» جشس اراسىندا كيلوگرامى 50 تەڭگەدەن 1000 توننا كارتوپ، 45 تەڭگەدەن 136 توننا ءسابىز، 30 تەڭگەدەن 60 توننا قىرىققابات، 55 تەڭگەدەن 10 توننا قىزىلشا جەتكىزۋگە كەلىسىمشارت جاسالدى.

ايماقارالىق كووپەراتسيا اياسىندا ەلىمىزدىڭ وڭتۇستىك وڭىرلەرىنەن كوكونىس جانە باسقا ونىمدەردى تىكەلەي جەتكىزۋ ۇيىمداستىرىلدى. قازىردىڭ وزىندە قىزىلوردا وبلىسىنان 88 توننا كۇرىش، 64 توننا اس تۇزى، قوستاناي وبلىسىنان ءبىرىنشى سورتتى 40 توننا ۇن، 40 توننا سيىر ەتى، جامبىل جانە وڭتۇستىك قازاقستان وبلىستارىنان 200 توننادان استام كوكونىس ونىمدەرى جەتكىزىلدى. بۇل ونىمدەر «تابىس» كوممۋنالدىق بازارىندا 10 پايىزدان اسپايتىن ساۋدا ۇستەمەسىمەن جالپى سوماسى 70,6 ميلليون تەڭگەگە ساتىلدى. سونداي-اق، «انۆار» جانە «دينا» ساۋدا جەلىلەرى قىزىلوردا وبلىسىنىڭ 18 كاسىپورىندارىمەن 353 ميلليون تەڭگەگە ونىمدەر جەتكىزۋگە ءوزارا ىنتىماقتاستىق تۋرالى كەلىسىمشارتقا قول قويدى. وبلىستا الەۋمەتتىك جاعىنان قورعالماعان تۇرعىندار ءۇشىن 166 الەۋمەتتىك بۇرىشتار، 2 الەۋمەتتىك دۇكەن، 2 كوميسسيالىق ءبولىم جۇمىس ىستەيدى.

تابيعي مونوپوليالاردى رەتتەۋ جانە باسەكەلەستىكتى قورعاۋ جونىندەگى كوميتەتتىڭ وبلىستىق دەپارتامەنتىنىڭ باسشىسى گۇلنۇر ماسينا الەۋمەتتىك ماڭىزدى تاۋارلارعا باعانى تۇراقتاندىرۋدى قامتاماسىز ەتۋ ءۇشىن مونوپولياعا قارسى ورگان اپتا سايىن ازىق-تۇلىك تاۋارلارى مەن جانار-جاعارماي ماتەريالدارىنا باعا مونيتورينگىن جۇرگىزەتىندىگىن، سونداي-اق باعانىڭ كۇرت جانە نەگىزسىز كوتەرىلۋىنىڭ سەبەپتەرىن، تاۋار قاردارلىلىعى، مونوپوليالىق جوعارى باعا، باعالىق «كەلىسىمدەر» جونىندە انىقتايتىندىقتارىن حابارلادى.

قازىرگى ۋاقىتتا ازىق-تۇلىك تاۋارلارى بازارلارىنداعى تەكسەرۋلەر اياقتالا كەلدى، ونىڭ ىشىندە نان مەن قانتقا بوساتۋ باعاسىن بەلگىلەۋدە كەلىسىلگەن ارەكەتتەر، تاۋىق جۇمىرتقاسى باعاسىن ءوسىرۋ، سونداي-اق سۇيىتىلعان گازدى 16 بولشەك وتكىزۋشىلەر تۇرعىسىنان دەرەكتەر بار.

— ەڭ باستى ماسەلە — بۇل نان، جۇمىرتقا، ماي، قانت جانە سۇيىتىلعان گاز باعاسىنىڭ نەگىزسىز وسۋىنە جول بەرمەۋ. قازىرگى ۋاقىتتا وڭىردە باعانى كوتەرۋ ءۇشىن ەشقانداي نەگىز جوق. بۇعان قاراماستان، بۇل ماسەلەنى ۇدايى باقىلاۋدا ۇستاپ، كۇن سايىن باعا مونيتورينگىن جۇرگىزىپ، الەۋمەتتىك ماڭىزدى ونىمدەرگە باعانىڭ كوتەرىلمەۋى ءۇشىن بارلىق شارالار قابىلدانۋى ءتيىس. مەموراندۋمداردىڭ ورىندالۋى مەن اۋىل شارۋاشىلىعى جارمەڭكەلەرىن وتكىزۋگە دە وسىنداي تالاپپەن قارايمىز، مەرەكەلەر الدىندا تۇرعىندار قاجەتتى ازىق-تۇلىك ونىمدەرىن تومەنگى باعامەن ساتىپ الۋى ءتيىس، — دەپ تۇجىرىمدادى ءسوزى وبلىس اكىمى بەردىبەك ساپارباەۆ.