وبلىس كولەمىندە ەل تاۋەلسىزدىگىنىڭ 25 جىلدىعىن مەرەكەلەۋ اياسىندا قولعا الىنعان سەنبىلىك شاراسى تۇركىستان قالاسىندا كەڭ قولداۋعا يە بولدى. 

قالاداعى ءوتىپ جاتقان تازالىق كۇنىنە مەملەكەتتىك مەكەمە قىزمەتكەرلەرى جانە جەكە سەكتور وكىلدەرى قاتىسۋدا. سونىڭ ىشىندە، تۇركىستان قالاسىنىڭ ورتالىعىنداعى ساياجايلار، كوشە جيەكتەرى تازالانىپ، اعاش كوشەتتەرى وتىرعىزىلۋدا. جانە دە قالاعا قاراستى اۋىلدىق وكرۋگ تۇرعىندارى دا اتاۋلى كۇنگە ءوز ۇلەستەرىن قوسۋدا. 

سونىمەن بىرگە، ەل تاريحىنداعى تاۋەلسىزدىك اتتى ايتۋلى مەرەكەنى ۇلىقتاۋعا باعىتتالعان ءىس-شارا جوسپارىنا ساي بۇگىن «تاۋەلسىزدىك قۇرداستارىنىڭ» اعاش كوشەتتەرىن وتىرعىزۋ اكتسياسى وتۋدە. بۇل شارادا 100-دەن استام جاس مىڭعا جۋىق اعاش كوشەتتەرىن وتىرعىزۋدا.

اكتسياعا قاتىسۋشى تۇركىستان قالاسىنىڭ تۇرعىنى اباي بەردەن: «تاۋەلسىزدىك قۇرداستارىنىڭ» اعاش كوشەتتەرىن وتىرعىزۋ شاراسىنا مەن دە ءوز ۇلەسىمدى قوسۋ ءۇشىن كەلىپ وتىرمىن. قالامىز كوركەيىپ، تۋعان ولكەمىزدىڭ گۇلدەنۋىنە قۇربى-قۇرداستارىممەن قاتار قولتاڭبامدى قالدىرعىم كەلەدى. كەلەشەكتە ەلىمىزدىڭ ءوسىپ-وركەندەۋىنە مول ۇلەس قوسامىن دەپ سەنەمىن» - دەپ ىزگى نيەتىن جەتكىزدى. 

وسىلايشا ەكولوگيالىق شارانىڭ ءمان-ماڭىزىن ءوز ىستەرىمەن ارتتىرۋعا ۇلەس قوسىپ جاتقان تۇركىستاندىقتار قىزۋ ىسكە كىرىسىپ كەتكەن.

Abai.kz